تاوارجيت ن يوحنّا

‏1 تاد أݣان تاوارجيت ن يوحنّا، نّا ئسباين ربّي يي عيسى لمسيح حما أد ئسنعت يي ئسمغان نّس أينّا ئخصّا أد ئجرو فيمرّا. داي يازن عيسى لمالاك نّس حما أت ت-يسباين يي ئسمغ نّس يوحنّا.

‏2 داي ئشاهد يوحنّا س-ؤينّا يانّاي، تاوارجيت اد أݣّان أوال ن ربّي د شّهاتّ ن عيسى لمسيح.

‏3 أياعريت ن ونّا ئتّقران س-ؤغويي د وينّا ئسّفليدن يي ئواليون-اد نّا ديدّان زݣ ربّي، أها أر تݣّين س-ؤينّا ئتوارين ديكسن، ئدّخ تتدجّاور تاسّاعتّ.

سّلام ن ربّي يي ئݣراون س سبعا

‏4 نكّين يوحنّا، دا تّاروخ يي ئݣراون س سبعا ن-ئمومن نّا ئزدغن ݣ تمازيرت ن أسيا. دا تتّرخ يي ربّي نّا ئلّان لّيݣ تسول دّونيت ؤر تلّي، ونّا ئلّان دغي، ونّا ئدّان أد دّيدو، د زݣ سبعا ن لارواح نّا ئبدّين دات ن لكرسي نّس أداون وشين نّعمت د لهنا،

‏5 د زݣ عيسى لمسيح نّا ئساوالن خف ربّي س لحقّ، نّا ئكرن زݣ ئنݣر ن-ئمتّين د-امزْوارو، نّا ئݣان أخاتار ن-ئݣلّيدن ن واشال، نّا خ ئتّيرين أها س-ئدامّن نّس ئفوكّاخ زݣ دّنوب نّخ،

‏6 أها ئرراخ د ئخاتارن ن دّين ݣ تݣلديت نّا ئدامن دات ن ربّي ئبّاس. لعزّ د تنباطّ يي عيسى لمسيح أبدا. أمين.

‏7 رارات لبال! هان عيسى ئدّا أد دّيدّو د-ئسݣناو! أنّاينت ميدّن كول، أنّاينت أود وينّا ت-ئنوقبن. س سّباب نّس أد رون لݣنوس ن واشال كول. يّيه، أمين.

‏8 ئنّا مولانا: «نكّين أيد ئݣان لّيف د لييا، ݣيخ تيزويري د تينݣيرا، نكّين أيد ئلّان لّيݣ تسول دّونيت ؤر تلّي د ونّا ئلّان دغي د ونّا ئدّان أد دّيدو، نكّين أيد ئغييْن يي مايد ئݣان شا».

تيزويري ن توارݣيت

‏9 نكّ يوحنّا، ݣماتون د-ومدّاكل نّون نّا يامّون أݣّيدون ݣ تمارا د تݣلديت ن ربّي د صّبر ݣ-ؤدم ن عيسى لمسيح، لّيخ تّونفاخ ݣ تݣزيرت نّا مي دا تّينين بطمس ئدّخ أر سّاوالخ بطايطاي خف واوال ن ربّي أها أر تبرّاحخ س-ؤينّا ئنّا عيسى لمسيح.

‏10 داي ݣ واسّ ن مولانا، ئݣان تانشرا نّس زݣ لموت، ئضردّ غيفي لجهد ن رّوح ن ربّي، سّفلدخ ضاري يي يون ؤغويّي أخاتار ئݣان أم يون ؤغويّي ن لبوق

‏11 أر ئتّيني: «أرو أينّا تّانّايت ݣ يون ن لشتاب، تازنت يي ئݣراون س سبعا ن-ئمومن نّا ئزدغن ݣ تمازيرت ن أسيا، أݣراو ن تمدينت ن أفسس د تمدينت ن سميرنا د تمدينت ن برغامس د تمدينت ن ثياتيرا د تمدينت ن سارديس د تمدينت ن فيلادلفيا د تمدينت ن لادوكيا».

‏12 داي برّمخ أد أنّايخ مايد يي ئساوالن، ماشان ݣ برّمخ أنّايخ سبعا ن لحسكات ن دّهب.

‏13 أها ييلي ݣ وامّاس نّسن يون ئرويسن ممّيس ن بنادم، ئلسان يون ؤعبان ئغزّيفن، ئفكّس س يوت ن تستاوت ن دّهب خف ئدمارن نّس.

‏14 ئد ئخف نّس د وازّار نّس ݣان ئملاّلن شايݣان أم تاضوت نغد أم ؤدفل د والّن نّس دا سفيقيسنت أم ؤحدّيق ن لعافيت.

‏15 ئضارن نّس دا سفليلّيين أم نّحاس ئصفان س لعافيت د-ؤݣرض نّس ئݣا أم لهزّ ن شيݣان وامان.

‏16 ييلي ݣ-ؤفوس نّس أفاسي سبعا ن-ئتران، أر ئتفّغ زݣ ؤقمو نّس يون ن سّيف ئشوان زݣ تاميوين سّين. د ؤدم نّس ئݣا أم تافوكت ئسفليلّيين.

‏17 ألّيݣ ت أنّايخ، توتّيخ غر ئضارن نّس أم ؤمتّين. ئسرس غيفي أفوس نّس أفاسي داي ئنّايي: «أد ؤر تݣّد شا! نكّ أمزْوارو د-ؤنݣّارو،

‏18 نّا ئدّرن. لّيخ مّوتخ، ماشان دغي ها نكّين دّرخ، ؤر تمتاتخ أبدا. غوري تيسورا ن لموت د-ؤدغار نّاݣ لّان ئمتّين.

‏19 ئوا أرو أينّا تانّايت، د-ؤينّا ئتجرون دغي، د مايد ئدّان أد ئجرو فّير ن-ؤياد.

‏20 هان مايد ئݣان لمعنا ن سبعا ن-ئتران نّا تانّايت خف ؤفاسي ئنو د سبعا ن لحسكات ن دّهب، سبعا ن-ئتران ݣان ئنبدادن ن-ئݣراون ن ئمومن سبعا ئد سبعا ن لحسكات نّا تانّايت ݣانت سبعا ن- ئݣراون ن-ئمومن».