تاوارجيت ن يوحنّا

تابرات ئتيارون يي ؤݣراو ن ئمومن ن تمدينت أفسس

‏1 ضارت ن-ؤينّا، ئنّايي: «أرو يي ؤنبّاض ن-ؤݣراو ن ئمومن نّا ئلّان ݣ تمدينت ن أفسس، تينت-اس: هان مايد ئتّيني ونّا يومژن سبعا ن-ئتران س-ؤفاسي نّس، أر ئتدّو ݣ وامّاس ن سبعا ن لحسكات ن دّهب:

‏2 سّنخ كول أينّا تݣّات، د-تامارا نّش د-ؤساعف نّش. أها سّنخ ئس ؤر تحميلت ميدّن نّا ؤر ئحلين. تجرّبت وينّا تّينين ݣان ئمازان، ماشان نيتني ؤر تن ݣين، تافتّنين دا سحيلّيلن.

‏3 تساعفت، تݣيت شايݣان ن تمسّومانت خف ئسم ئنو أها ؤر توحيلت شا.

‏4 والاينّي دا غيفش تّيژيخ، ئدّخ ؤر دا يي تّيريد أم ݣ-ومزوارو!

‏5 أد-ؤر تتّو أبدا ماني زݣ تتاتّويت، أغول غر أبريد ن ربّي أها تݣت ئسكين نّا تݣيت تيزويري. مش ؤر تّوبت، أد غورش ندّوخ دغيا أها كّسخ لحسكا نّش زݣ ؤدغار نّس.

‏6 ماشان أينّا ديكّ ئژيلن دا تشرهت ئسكين نّا تݣّين ميدّن نّا ئتفارن نيقولاس ئمشينّا تن تشرّهخ أود نكّين.

‏7 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن: «ونّا ئغلبن، أد-اس وشخ أد-ئتشّ زݣ ؤسكلو ن تودرت نّا ئلّان ݣ وامّاس ن دّجنت ن ربّي».

تابرات ئتيارون يي ؤݣراو ن ئمومن ن تمدينت سميرنا

‏8 أرو يي ؤنبّاض ن-ؤݣراو ن ئمومن نّا ئلّان ݣ تمدينت ن سميرنا، تينت-اس: «هان مايد ئتّيني ؤمزوارو د-ؤنݣّارو نّا ئمّوتن أها ييدير.

‏9 نكّين سّنخ ئسكين نّا دا تݣّات د تمارا نّش د ژّلض نّش، ماشان تطرّحت. أها سّنخ ألتو ئحلّالن نّا غيفش تّينين وينّا دا ئتّينين ئس ݣان ؤداين ستيت د نيتني ؤر تن ݣين، والاينّي ݣان زݣ ؤݣراو ن شّيطان.

‏10 أد-ؤر تݣّد أبدا زݣ تمارا نّا ئدّان أد غيفش تكّ، هان شّيطان ئعوّل أد ئݣر ئتس زّيݣون ݣ لحبس حما أت تّوجرّبم أها تكّ غيفون تمارا عشرا د-ؤسّان. أمن ألّ تمّت، دّيخ أد-اش وشخ تّاج ن تودرت.

‏11 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن: "ونّا ئغلبن ؤر ئدّي أت تقّيس لموت تيس سنات أبدا"».

تابرات ئتيارون يي ؤݣراو ن ئمومن ن تمدينت ن برغامس

‏12 أرو يي ؤنبّاض ن-ؤݣراو ن ئمومن نّا ئلّان ݣ تمدينت ن برݣامس: «هان مايد ئتّيني ونّا غر ئلّا سّيف ئشوان زݣ تاميوين سّنات:

‏13 نكّين سّنخ أدغار نّاݣ تزدغت، تزدغت ݣ-ؤدغار نّاݣ ئتنباض شّيطان. ماشان تسولت دا تّامنت ئسّي، أها أر تّينيت بطايطاي ئس دا تݣات س واوال ئنو، أود ݣ-ؤسّان ݣ غيفي ئسّيول أنتيباس س لحقّ نّا ئتّونغن غورون ݣ ماني ݣ ئزدغ شّيطان.

‏14 ماشان دا غيفش تّيژيخ شا ن شوي، ئدّخ غورش لّان ئتس ن ميدّن ديس نّا ئتݣّين أينّا أر ئتّݣّ بلعام، نّا ئعلمن يي بالاق أد ئݣ تاژقّورت يي واراو ن-إسرائيل، حما أد فسدن أها تشّين زݣ تمغراص نّا ئتّوغرصن يي لاصنام.

‏15 أود شݣّين لّان غورش ئتس ن ميدّن نّا ئتفارن نيقولاس ئتݣّين س-ئسكين نّا شرّهخ.

‏16 ئوا أغول غر أبريد ن ربّي نغد أد ددوخ غورش دغيا حما أد نّاغخ أݣّيدسن س سّيف نّا ئتفّغن زݣ ئمي نو.

‏17 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن: هان ونّا ئغلبن، أد-اس وشخ أد ئتشّ زݣ لمنّ، أغروم ن ربّي نّا ئخزنن، أها وشخاس ألتو يوت ن تژروت تاملّالت نّا خف يوري ئسم ؤجديد ؤر ت ئتّيسين غاس ونّا ت-يومژن».

تابرات ئتيارون يي ؤݣراو ن ئمومن ن تمدينت ن تيياتيرا

‏18 أرو يي ؤنبّاض ن-وݣراو ن ئمومن نّا ئلّان ݣ تمدينت ن ثياتيرا: «هان مايد ئتّيني ممّيس ن ربّي نّا غر لّان والّن ݣانين أم ؤحدّيق ن لعافيت د-ئضارن نّس أم نّحاس ئصفان:

‏19 نكّين سّنخ لفعايل نّش د تايري نّش د ليمان نّش د لخدمت نّش د-وساعف نّش د لفعايل نّا تݣيت غر تنݣيرا ؤݣرن ئمزوورا.

‏20 ماشان دا ش تلامّاخ شا ن شوي، ئدّخ تودجّيت تامطّوط إژابيل ئتّينين ئس تݣا تانّبيت، دا تغرّا ئسمغان ئنو أها أر أسن تسنعات أد فسدن، تشّين زݣ تمغراص نّا ئتّوغرصن خف لاصنام.

‏21 ݣيخ-اس تاناهالت حما أت تغول غر أبريد ن ربي زݣ لفساد نّس، ماشان ؤر تري.

‏22 ها نكّين دّيخ أت تْوتخ س واطّان، ݣخ وينّا تفسادنين أݣّيدس ݣ تمارا ئحرّين، مش ؤر أغولن غر أبريد ن ربي زݣ ؤينّا تݣّين.

‏23 أد خلوخ أراو نّس س-لموت، حما أد ئسينن ئݣراون ن-ئمومن كول ئد نكّين أيد ئتّيسينن مايد ئلّان ݣ-يخمّيمن د وولاون، أر أكّاخ يي كويون ديݣون خف ؤينّا ئݣا.

‏24 ماشان أداون ئنيخ، ئنيخ يي وييّاض ئلّان ݣ تمدينت ن ثياتيرا، وينّا ؤر ئݣين أينّا سّنعات ئزابيل، وينّا ؤر ئسّينن لخزين ن شّيطان أم وينّا تّينين ئتس: ها نكّين ؤر دّيخ أد كون سّيژيخ س شا ن لوصيت ياضن،

‏25 ماشان حضويات غاس أينّا غورون ئلّان ألّ ندّوخ.

‏26 د ونّا ئغلبن، ئحضو لوصييات ئنو ألّ تينݣيرا، دّيخ أد-اس وشخ تانباطّ خف لݣنوس،

‏27 أم تنباطّ نّا ؤمژخ زݣ بّا نو، أد غيفسن ئنبض س يون ؤعمّود ن ووزّال. ݣين أم-ؤفشكو ن-ئتقّي أدّاي ئرّژ.

‏28 ؤشخاس أود ئتري ن تيفاوت.

‏29 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن».