تاوارجيت ن يوحنّا

تابرات ئتيارون يي ؤݣراو ن ئمومن نّا ئلّان ݣ تمدينت ن سارديس

‏1 أرو يي ؤنبّاض ن-وݣراو ن ئمومن نّا ئلّان ݣ تمدينت ن سارديس: هان مايد ئتّيني ونّا ئتنباضن ݣ سبعا ن لارواح نّا ئتسخّارن خف ربّي د ونّا غر لّان ألتو سبعا ن-ئتران: «نكّين سّنخ ئسكين نّا تݣيد كول. غالن ميدّن ئس تدّرت، والاينّي شݣين تمّوت س دّنوب نّك.

‏2 خف ؤياد رار لبال أها تسصحود ئسكّين نّا ش-ئقّيمن قبل أد مّتن، ئدّخ ؤفيخ أينّا تݣّات ئناقس غر ربّي.

‏3 شتي أينّا تقبلت د-ؤينّا مي تسليت تيزويري. حضوت أها تاغولت غر أبريد ن ربّي. هاتين مش تݣنت أد ددّوخ غورش أم يون ن-ؤخوّان، أها ؤر تّيسينت ماتّا لوقت ݣ ت تدّوخ.

‏4 ماشان لّان غورش ئتس ن ميدّن دروسنين ݣ تمدينت ن سارديس ؤر سخنونسن شا ئعبان نسن، دّان أد-اݣّيدي مونن س-يعبان ئملّالن، ئدّخ ستاهلن أياد.

‏5 وينّا غلبنين دّان أد لسين ئعبان ئملّالن. ؤر تكّسخ أبدا ئسماون نّسن زݣ لكتاب ن تودرت. أدّاي ئليخ دات ن-ئبّا د لمالايكا نّس، دّيخ أد سيولخ غيفسن».

‏6 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن.

تابرات ئتيارون يي ؤݣراو ن ئمومن نّا ئلّان ݣ تمدينت ن فيلادلفيا

‏7 أرو يي ؤنبّاض ن-وݣراو ن ئمومن نّا ئلّان ݣ تمدينت ن فيلادلفيا: هان مايد ئتّيني ؤمقدّس نّا ديدّان زݣ ربّي، أر ئساوال س لحقّ، نّا غر تلّا تساروت ن-وݣلّيد داود، ونّا ئرژّمن أها ؤر دا ئتّيغي أود يون أد ئقّن، دا ئتقّن أها ؤر دا ئتّيغي أو يون أد ئرژم:

‏8 «نكّين سّنخ أينّا تݣّات. ها نكّين ݣيخ دات-اش يون ن لباب ئرژمن ؤر ئتّيغيي أود يون أت تيقن، مغار-اش ئدروس لجهد، تضاعت أوال ئنو أها ؤر يي تنكيرت.

‏9 دغي هان أينّا دّيخ أد ݣخ س وينّا ݣان زݣ-ؤݣراو ن شّيطان، أر تّينين ئس ݣان ؤداين، ماشان ؤر تن ݣين أها أر سحيلّيلن. دّيخ أت تن ددّاويخ س دّرع أد بندقن دات-اش غر ئضارن نّش أها ئسينن ئس دا ش تّيريخ.

‏10 ئدّخ تحضيت أوال ئنو أم ؤينّاش وصّاخ أها تساعفت، خف ؤياد أود نكّين دّيخ ألتو أكّ حضوخ ݣ لوقت ن تمارا نّا ئدّان أت تدّو غر دّونيت كول حما أت تّوجرّبن ئمزداغ ن-واشال.

‏11 ها نكّين دّيخ أد ددّوخ دغيا، غاس حضو أينّا غورش ئلّان، حما ؤر دّيتدّو شا ياضن ياوي تّاج نّا تربحت.

‏12 ونّا ئغلبن، أت تݣخ د تارسلت ݣ تادّارت ن ربّي أها ؤسار ياغول أد ئفّغ غر برّا، نقّشخ ئسم ن ربّي غيفس د ييسم ن تمدينت ن ربّي، نّا ئݣان لقدس ؤجديد نّا ئطّارن زݣ ئݣنّا زݣ غر ربّي، أها أروخ غيفس ئسم ئنو ؤجديد.

‏13 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن».

تابرات ئتيارون يي ؤݣراو ن ئمومن نّا ئلّان ݣ تمدينت ن لاودكيا

‏14 أرو يي ؤنبّاض ن-وݣراو ن ئمومن نّا ئلّان ݣ تمدينت ن لاودكيا: هان مايد ئتّيني ونّا مي تّينين أمين، د نتّا أيد ئتشاهادن س لحقّ، ؤر لّين تحلّال ݣ واوال نّس د نتّا أيد ئݣان لاصل ن-ؤينّا ئخلق ربّي.

‏15 نكّين سّنخ أينّا تݣّات، هات ؤر تصمّيدت ؤر تحميت. علا مور تصمّيدت نغد تحميت!

‏16 ئدّخ تلّودت، ؤر تصمّيدت ؤر تحميت، عوّلخ أكّيد سعوقّيخ زݣ ؤقمو نو.

‏17 ئدّخ دا تّينيت: "نكّين طرّحخ غوري شيݣان ن لخير ؤر حدادجاخ والو"، ماشان ؤر تسّينت ئس تݣيت بووخوب د بوتمارا د-أمژلوض، تݣيت أدرغال تيليت حژّوضي.

‏18 هاتين مش يي تݣيت س-رّاي سغ زّيݣي دّهب ئصفان س لعافيت حما أت تطرّحت، د-ئعبان ئملّالن حما أت تلست ؤر تسنعاتّ لعيب ن حژوضي نّش، د تاژولت يي والّن نّش حما أت تّانّايت.

‏19 هان ونّا تّيريخ دا غيفس تّيژيخ أر تسربّاخ، ئوا ئݣ لجهد نّش أها تغولت غر أبريد ن ربي.

‏20 هايي بدّخ غر لباب أر تدوقّاخ، مش ئلّا ونّا ئسّغدن يي أوال ئنو أها ئرژم لباب، دّيخ أد غورس كشمخ تشّخ أݣّيدس ئمنسي ئتشّيت أݣّيدي.

‏21 د ونّا ئغلبن ئدّا أد-أݣّيدي ئقّيم خف لكرسي نو، ئمشينّا غلبخ أود نكّين قّيمخ د بّا نو خف لكرسي نّس.

‏22 ونّا غر لّان ئمجّان أد ئسّغد، يي مايد ئتّيني رّوح ن ربي يي ئݣراون ن ئمومن».