4
لكرسي ن ربّي نّا ئلّان ݣ-ئݣنّا
1 فّير ن-وياد، أنّايخ ݣ توارݣيت ئنون لباب ئرژمن ݣ ئݣنّا. أوال نّا مي سليخ زݣ قبل ئݣا أم لبوقّ، ئنّايي: «أليدّ غر داهاد أد-اش نعتخ مايد ئدّان أد ئجرو ضارت ن-وياد».
2 فيمرّا يوسيييي رّوح ن ربّي غر ئݣنّا، داي أنّايخ يون ن لكرسي، د يون ئقّيم غيفس
3 ئݣا ݣ-ؤراعا نّس أمّ يون ن-ؤژرو ن لمعدن ئغلان د أم زوزو أزݣّاغ، تيلي تسليت ن-ونژار تضور يي لكرسي، تݣا أم لبنّار أزيݣزا.
4 ضورن يي لكرسي-اد ربعا ؤعشرين ن لكرسي. أنّايخ ربعا ؤعشرين ن-ؤمغار س-ئعبان ئملّالن قّيمن غيفسن، ݣين خف ئقرّا نسن ئد تّاج ن دّهب.
5 أر كّاتن ؤسمان أر ساوالنت تݣناو د-ئغويّان زݣ لكرسي. أها أغنت دات ن لكرسي سبعا ن لفتّاشات س-وحدّيق ن لعافيت، ݣانت سبعا ن لارواح نّا ئتسخّارن خف ربّي.
6 ييلي دات ن لكرسي شا ئرويس لبحر ن جّاج ئݣان أم لبنّار. ئلين ݣ وامّاس ن لكرسي د تاما نّس ربعا ن لموخليقات دّرنين نّا غر لّان شايݣان ن والّن زݣ دات د زݣ ضارت.
7 لموخليقت تامزواروت ترويس ئزم، لموخليقت تيس سنات ترويس أݣندوز، لموخليقت تيس شراط ئلّا غورس ؤدم ئݣان أم وين بنادم د لموخليقت تيس ربعا ترويس لباز ئتّافراون.
8 لموخليقات-اد دّرنين س ربعا لّان غورسن ستّا ن وافريون. عمّرن س والّن جاج د برا. ؤر دا تسوسومن زݣ ؤسبّح ݣّيض د واسّ دا تّينين: «ئقدّس، ئقدّس، ئقدّس، مولانا ربّي أخاتار د ونّا ئتّيلين ييلي ياد د ونّا ئدّان أد دّيدّو».
9 أدّاي دا تݣّين لموخليقات دّرنين س ربعا لعزّ، وقّرن أها حمدن ونّا ئقّيمن خف لكرسي، نّا ئدّرن أبدا،
10 دا تّاتّوين ربعا ؤعشرين ن-ؤمغار خف ئفادّن دات ن ونّا ئقّيمن خف لكرسي، أر تعبادن ونّا ئدّرن أبدا، أر سروسان ئد تّاج نسن دات ن لكرسي أر تّينين:
11 «أمولانا، أربّي نّخ تستاهلت أش عبدن ميدّن ئدّخ ئلّا غورش لجهد، ئتّواݣّ-اش لعزّ د لوقر، لاحقّاش شݣّين أيد ئخلقن مايد ئݣان شا د ؤينّا تخلقت ئلّا داد س لموراد نّك».