تاوارجيت ن يوحنّا

أعلّوش د لكتاب

‏1 داي أنّايخ ݣ-ؤفوس أفاسي ن-ونّا ئقّيمن خف لكرسي يون ن لكتاب يارون زݣ جاج د برّا، ئتّواقّن س سبعا ن-ئد طّابع ن شّمع.

‏2 أها أنّايخ ألتو يون ن لمالاك ئجهدن أر-ئتبرّاح س-ؤغويّي أخاتار: «مايد ئستاهلن أد ئري ئد طّابع ن لكتاب أها ئرژمت؟»

‏3 والاينّي ؤر ئلّي أود يون ݣ-ئݣنّا ؤلا ݣ واشال ؤلا دّاو ن واشال نّا ئغين أد ئرژم لكتاب نغد أد يانّاي مايد ديكس ئلّان.

‏4 أها قّيمخ نكّين أر تّروخ شايݣان، ئدّخ ؤر ئلّي أود يون ئستاهلن أد ئرژم لكتاب ئقرات أها يانّاي مايد ديكس ئلّان.

‏5 داي ئنّايي يون زݣ ئمغارن: «أد-ؤر تّرو شا! هان ئزم نّا ئݣان زݣ تقبيلت ن يهوذا د تّرّيكت ن سيدنا داود ئغلب، نتّا أيد ئدّان أد ئري ئد طّابع ن لكتاب س سبعا أها ئرزمت».

‏6 داي أنّايخ يون ن-ؤعلّوش ݣ وامّاس ن لكرسي ضورناس ربعا ن لموخليقات دّرنين د-ئمغارن، ئبدّ أها ئݣ أمّي ئتّوغرص. غورس سبعا ن واشّيون د سبعا ن والّن، ݣانت سبعا ن لارواح نّا يوزن ربّي غر دّونيت كول.

‏7 ئدّود ؤعلّوش أها يامژ لكتاب زݣ ؤفوس أفاسي ن ونّا ئقّيمن خف لكرسي.

‏8 نتّا يومژ لكتاب، داي بندقن دات-اس لموخليقات دّرنين س ربعا د ربعا ؤعشرين ن-ؤمغار. ييلي لوطار غر كويون ديكسن د ئغرّافن ن دّهب عمّرنين س لبخور، نّا ئݣان تيژيلّا ن صّالحين.

‏9 أر تّينين يوت ن تمديازت توجديت: «شݣّين أيد ئواتان أت تامژت لكتاب أها تريت ئد طّابع نّس، ئدّخ تتّوغرصت، س-ئدامّن نّك تفوكّات يي ربّي ميدّن زݣ مايد ئݣان تاقبيلت د مايد ئݣان ئلس د مايد ئݣان شّعب د مايد ئݣان لݣنس،

‏10 تݣيتن زݣ تݣلّيت ن-ئخاتارن ن دّين حما أد زّيلزن خف ربّي نّخ. دّان أد نبضن خف واشال».

‏11 أنّايخ ألّو أها سليخ يي تمديازين ن شايݣان ن لمالايكا ضورن يي لكرسي د ربعا ن لموخليقات دّرنين د-ئمغارن. لّان س والف ن-ئد لولوف د مليون ن مليون.

‏12 دا تّينين س-ؤغويّي: «ئستاهل ؤعلّوش نّا ئتّوغرصن لجهد د-ؤطرّح د تنژّي د تنباطّ، د لوقر، د لعزّ، د لحمد!»

‏13 د وينّا ئلّان كول ݣ-ئݣنّا د واشال د دّاو ن واشال د وينّا ئلّان ݣ لبحر كول سليخاسن أر تّينين: «لحمد د لوقر د لعزّ د تنباطّ يي ونّا ئقّيمن خف لكرسي د-ؤعلّوش أبدا ئبديدان».

‏14 داي نّان لموخليقات دّرنين س ربعا: «أمين!» أها بندقن ئمغارن س ربعا ؤعشرين أها عبدن ونّا ئدّرن خف دّوام.