تاوارجيت ن يوحنّا

سبعا ن طّوابع

‏1 داي أنّايخ أعلّوش ݣ ئرژم يي طّابع أمزوارو زݣ سبعا ن-ئد طّابع ن شّمع، سليخ يي يون زݣ ربعا ن لموخلقات دّرنين أر ئتّيني س يون ؤغويّي ئݣان أم ؤغويّي ن تݣنوت: «أورا أها تانّايت!»

‏2 أنّايخ يون ن ئيّيس أملّال، د ونّا ت ئنين ئسلّح س لقوس د نّبل. أها ئتّمّوشاس تّاج، نتا أيد ئترنون كولشي، ئفّغ حما أد ئرنو ئنضليبن نّس.

‏3 نتّا ئرژم ؤعلّوش يي طّابع ويسّين، سليخ يي لموخليقت تيسّنات أر تّيني: «أورا أها تانّايت!»

‏4 داي ئفّغدّ يون ن ئيّيس ياضن أزݣّاغ. أها تّمّوشاس يي ونّا ت ئنين تانباطّ أد ئكّس لهنا زݣ واشال، حما أد مسنغان ميدّن ݣراتسن. ئتّمّوشاس يون ن سّيف أخاتار.

‏5 نتّا ئرژم ؤعلّوش يي طّابع ويسّ شراض، سليخ يي لموخليقت تيسّ شراطّ دا تّيني: «أورا أها تانّايت!» أنّايخ يون ن ئيّيس أبخّان، د ونّا ت-ئنين يوسي لميزان ݣ ؤفوس نّس.

‏6 أها سليخ يي ؤغويّي ݣ وامّاس ن ربعا ن لموخليقات دّرنين دا ئتّيني: «كيلو ن-ئمندي س تغراض ن يون واسّ ن لخدمت، د شراض كيلو ن تمژين س تغراض ن يون واسّ ن لخدمت، ئد زّيت د شّراب أد-ؤر تن سخصار».

‏7 نتّا ئرژم ؤعلّوش يي طّابع ويسّ ربعا، سفلدخ يي لموخليقت تيسّ ربعا أر تّيني: «أورا أها تانّايت!»

‏8 أنّايخ يون ن ئيّيس أزيݣزا، د ونّا ت-ئنين ئسم نّس لموت، د ليخرا دا ت تفار، أها تّمّوشاسن تنباط أد نغين رّبع زݣ ئمزداغ ن واشال كول س سّيف د بوهيّوف د واطّان د لوحوش لخلا.

‏9 نتّا ئرژم ؤعلّوش يي طّابع ويسّ خمسا، أنّايخ دّاو ن-ؤسغرص لارواح ن وينّا ئمّوتن خف واوال ن ربّي د شّهاتّ نّا س شاهدن.

‏10 أها سغويّن س-ؤغويّي أخاتار أر تّينين: «أمولانا، أيامقدّس، شݣ لحقّ، أر مي أيد تدّيت أت تحكمد أها تامژت لحقّ زݣ ميدّن ن دّونيت نّاخ ئنغان؟»

‏11 داي ئتمْوش يي كو يون زّيكسن أعبان أملّال، أها ئتّوناسن ݣانّييات شا ن لوقت ئدروسن ديخ ألتو، ئدّخ لحساب ن-ؤربيع نّون ئسول ؤر ئشمّيل. لّان ئمدّوكال نّون د أيتماتون نّا ئتفارن أبريد ن ربّي. ئخصّا أت تن نغين ميدّن ئمشينّا كون نغان.

‏12 أنّايخ ݣ-ئرزم ؤعلّوش يي طّابع ويسّ ستّا، ئحرّش واشال شايݣان، تسولّس تافوكت أم ييض د وايور ئݣا أزݣّاغ أم ئدامّن.

‏13 تّوتّين ئتران ن-ئݣنّا غر أشال، ئمشينّا تاتّوين ئقورّان ؤرݣانين، أدّاي دّيصوض ؤزوو ئجهدن خف تازارت.

‏14 ئݣنّا ئتّل أم لشاريض ياضين. د لعواري كول د تݣزيرين حرّشن زݣ وانسيون نّسن.

‏15 ئݣلّيدن ن وشال د-ئخاتارن د وينّا ئطرّحن د لقيّاد د-ئصاطّن د مايد ئݣان ئسمغ د مايد ئݣان أحوري كول نسن دا نتّلن ݣ ئفران د-ئقشميرن ن لعواري.

‏16 أر تّينين يي لعواري د-ئقشمرن: «تّوتيات غيفنخ أها تسّنتلم-اخ زݣ ؤدم ن ونّا ئقّيمن خف لكرسي د زݣ ؤحراق ن-ؤعلّوش.

‏17 ئدّخ دّيدّا واسّ ن-ؤحراق نّس أخاتار، أها مايد ئغييْن أد ئبدّ دات-اس؟»