7
ئمومن س لمسيح ݣان ئسمغان ن ربّي
1 داي أنّايخ ضارت ن-وياد، ربعا ن لمالايكا بدّين ݣ ربعا ن تغمّورا ن دّونيت. ؤمژن ئزووتن س ربعا ن دّونيت، حما ؤر ئتصوض أود يون زّيكسن خف واشال نغد خف لبحر نغد خف ئسكلا.
2 أها أنّايخ يون ن لمالاك ياضن يوليدّ زݣ تنيلا ن-ؤنقّر ن تافوكت، يوسي طّابع ن ربّي ئدّرن، ئغردّ س-وغويّي ئجهدن يي لمالايكا س ربعا نّا غر تلّا تنباطّ أد خلون أشال د لبحر.
3 ئنّاياسن: «أد-ؤر ؤخلّويات أشال د لبحر د-ئسكلا غاس أر نرشم ئسمغان ن ربّي نّخ خف ئنير نسن».
4 داي سلخ ئس لّان مييّا د ربعا ؤربعين ألف ن-وينّا مي تتّواݣّ طّابع ݣ تقبيلين كول ن واراو ن-إسرائيل.
5 تناعش ألف زݣ وينّا مي تتّواݣّ تماتارت ز ݣ أيت يهوذا د تناعش ألف زݣ أيت رأوبين د تناعش ألف زݣ أيت جاد
6 د تناعش ألف زݣ أيت أشير د تناعش ألف زݣ أيت نفتالي د تناعش ألف زݣ أيت مانسّى
7 د تناعش ألف زݣ أيت شمعون د تناعش ألف زݣ أيت لاوي د تناعش ألف زݣ أيت يسّاكر
8 د تناعش ألف زݣ أيت زبولون د تناعش ألف زݣ أيت يوسف د تناعش ألف زݣ أيت بنيامين.
شايݣان ن ميدّن لسان ئعبان ئملّالن
9 ضارت ن-ؤياد، أنّايخ شيݣان ن ميدن ؤر-ئتّيغيي أود يون أتن تيحاسب، زݣ لݣنوس كول د مايد ئݣان تاقبيلت د مايد ئݣان لقوم د مايد ئݣان ئلس. بدّين دات ن لكرسي د دات ن-ؤعلّوش، س-ئعبان ئملّالن أها ؤسين ݣ-ئفاسّن نسن ئسطوان ن تزدايت.
10 أر سغويّون س-ؤغويّي أخاتار أر تّينين: «أفوكّا دا د-ئتدّو زݣ ربّي نّخ نّا ئقّيمن خف لكرسي د زݣ ؤعلّوش!»
11 ئلين لمالايكا كول ضورن يي لكرسي د ئمغارن د لموخليقات دّرنين س ربعا، سجدن دات ن لكرسي أها عبدن ربّي.
12 أر تّينين: «أمين! لحمد د لعزّ د تنژّي د تنمّيرت د لوقر د تنباط د لجهد يي ربّي نّخ أبدا، أمين!»
13 ئسقسايي يون زݣ ئمغارن، ئنّايي: «مايد مسن ويد لسانين ئعبان ئملّالن؟ د ما زݣ ددّان؟»
14 داي نّيخاس: «أسيدي، شݣّين أيد ئسّن ماي مسين». أها ئنّايي: «ويد أيد ئراحن زݣ تمارا تاخاتارت، هاتين سّيردن ئعبان نسن أها سملولنتن س-ئدامّن ن-ؤعلّوش.
15 أياد أخف لّان دات ن لكرسي. دا تّعبادن ربّي س واسّ د ييض ݣ تادّارت نّس. أر غيفسن ئسمالو ونّا ئقّيمن خف لكرسي.
16 أها ؤسار دّين أت تن ئنغ لاژّ نغد ئريفي ؤلا تسغوستن تافوكت نغد أزال.
17 ئدّخ أعلّوش ئلّان ݣ وامّاس ن لكرسي أت تن ئكس، ئحريتن غر ئغبولا ن وامان ن تودرت. أها ئصفّض ربّي ئمطّي كول زݣ والّن نسن».