تاوارجيت ن يوحنّا

طّابع ويسّ سبعا

‏1 داي نتّا ئرژم ؤعلّوش يي طّابع ويسّ سبعا، ئبّي واوال ݣ-ئݣنّا أتّاي ن نّص ن تاسّاعت.

‏2 أنّايخ سبعا ن لمالايكا نّا ئبدّين دات ن ربّي، أها ئتّمّوشاسن سبعا ن-ئد لبوق.

‏3 ئدّود يون ن لمالاك ياضن يوسين يوت ن تالمجمّرت ن دّهب، ئبدّ تاما ن ؤدغار ن ؤسغوس ن لبخور، أها ئتّمّوشاس شايݣان ن لبخور. أدّاي دا تژالّا ن صّالحين، دا ت-ئسغوسا ݣ-ؤصغرس ن دّهب ئلّان دات ن لكرسي.

‏4 داي يالي واݣّو ن لبخور زݣ ؤفوس ن لمالاك غر دات ن ربّي أها تالي أود تژالّيت ن- صّالحين.

‏5 يامژ لمالاك تالمجمّرت ئعمّرت س لعافيت زݣ ؤدغار ن ؤسغوس ن لبخورئݣرت خف واشال، داي كّرن ئغويّان، سيولنت تݣناو، وتن ؤسمان أها ئحرّش واشال.

لابواق

‏6 كّرن لمالايكا س سبعا نّا يوسين سبعا ن لابواق، سّوْجدن ئخفاون نّسن أد برّحن.

‏7 ئبرّح لمالاك أمزْوارو ݣ لبوق نّس: ياتّوي خف واشال تّابروري د لعافيت ئروين س-ئدامّن. ئغوس تّولوت ن واشال، تّولوت زݣ ئسكلا د توݣا تازݣزاوت كول.

‏8 ئبرّح لمالاك ويسّين ݣ لبوق نّس: تاتّوي ݣ لبحر شا ن لحاشت ئݣان أم عاري أمقران يوغن س لعافيت، داي ياغول تّولوت ن لبحر ئݣا ئدامّن.

‏9 أها ئمّت تّولوت زݣ لمخليقات نّا ئلّان ݣ لبحر، ئخلو تّولوت ن-ئغرّوبا.

‏10 ئبرّح لمالاك ويسّ شراض ݣ لبوق نّس، داي ياتّوي زݣ ئݣنّا يون ن-ئتري أخاتار يوغن أم ؤصفض ن لعافيت خف تّولوت ن-ئسافّن د-ئغبولا ن وامان.

‏11 أر-اس تّينين يي ئتري-اد سّم، أها ياغول تّولوت ن وامان ئݣا سّم، مّتن شايݣان ن ميدّن، ئدّخ أمان-اد ديكسن سّم.

‏12 ئبرّح لمالاك ويسّ ربعا داي ئتّواوت تّولوت ن تافوكت د تّولوت ن وايور د تّولوت ن-ئتران، أها ئبخّين تّولوت ن واسّ د تّولوت ن ييض ألتو.

‏13 فّيراس أنّايخ أها سليخ يي يون ن لباز ئتّافراون ݣ-ئݣنّا أر ئتّيني س يون ن-وغويّي أخاتار: «أويها نّسن! أويها نّسن! أويها نّسن يي ئمزداغ ن واشال، أدّاي سغويّن لابواق نّا ئسولن ن شراض ن لمالايكا نّا ئدّان أد برّحن».