9
1 ئبرّح لمالاك ويسّ خمسا ݣ لبوق نّس، داي أنّايخ يون ن-ئتري ياتّويدّ زݣ ئݣنّا خف واشال أها تتّمّوشاس تساروت ن وانو وار لحدّ.
2 لّيݣ ئرژم يي وانوياد، ياليدّ زّيكس واݣّو ئݣان أم واݣّو ن-ؤفرّان أخاتار. تبخّين تافوكت د-ئݣنّا س واݣّو ن وانو.
3 داي تفّغدّ تمورغي زݣ واݣّو تغمس يي واشال، أها تتّمّوشاس تنباط ئݣان أم تنباط ن تغيرضام ن واشال.
4 داي ئتّويناس ؤر تضرّا توݣا ن واشال ؤلا شا ئݣان أزيݣزا ؤلا شا ئݣان أسكلو، والاينّي أت تضرّا غاس ميدّن نّا غر ؤر تلّي خف ئنيرن نسن تاماتارت طّابع ن ربّي.
5 أها ؤر ئخصّا ات تن تنغ، ماشان أد غيفسن تسّكّ تامارا خمسا ن يورن. لحرّ ن تمارياد ئݣا أم لحرّ ن تيقّست ن تغيرضمت يي بنادم.
6 ݣ-ئيّور-ناد، دّان ميدّن أد رزون لموت والاينّي ؤر تتّافان. أد ئرين أد متّن، ماشا أد زّيكسن ترول لموت.
7 داي ترويس سّيفت ن تمورغي-اد ئسان وجدنين يي ئمنغي، خف ؤقشاش نّس تلّا شا ن لحاجت أم تّيجان ن دّهب، د-ؤدم نّس ئݣا أم ؤدم ن بنادم.
8 ئݣ وازّار نّس أم وازّار ن توتمين د توغماس نّس أم توغماس ن-ئزماون.
9 أها تݣ أمّي تلسا ئعبان ن ووزّال، ئݣ لهزّ ن وافريون نّس أمّ لهزّ ن لوكرارس ن-ئسان ئتّازّلان غر ئمنغي.
10 تامورغي-اد غورس أݣجّيم أمّ وين تغيرضام غر تلّا تيژّا، ييلي غورس تنباط أت تقّس يي ميدّن خمسا د يّورن.
11 لمالاك ن وانو وار لحدّ أيد ئݣان أݣلّيد ن تمورغي. ئسم نّس س واوال ن تعيبرانيت أبدّون، د س واوال ن-أيت تمازيرت ن ليونان أبوليّون. (لمعنا ن-ئسماون-اد "ونّا يوخلّون")
12 تزري لموصيبا تامزواروت، أها سولن أد دّوندّ سنات ن لموصيبات ديخ ألتو ضارت ن-ؤياد.
13 ئبرّح لمالاك ويسّ ستّا ݣ لبوق نّس، سليخ يي يون ن-ؤغويّي ئفّغدّ زݣ ربعا ن واشّيون ن-طابلة ن دّهب نّا خف ئلا لمجمرݣ ئتغوس لبخور دات ن ربّي،
14 دا ئتّيني يي لمالاك ويسّ ستّا غر ئلّا لبوقّ: «رژم يي ربعا ن لمالايكا ئكرفن تاما ن واسيف أخاتار ن لفورات!»
15 أها رژمن ئكوراف ن ربعا ن لمالايكا ئوجدن يي تاسّاعت-اد د-واسّ-اد د وايور-اد د-وسݣّاس-اد، حما أد نغين تّولوت ن ميدّن.
16 ئلّا لحساب ن-ئمناين س ميتاين مليون. أينّا مي سليخ.
17 أنّايخ ئمشيد ݣ توارݣيت، ئسان نّا خف نين ئمناين ݣان خف ئدمارن ؤزّال أزݣّاغ أمّ لعافيت، ئيتّس ݣان ئزيݣزاون د-ئيتّس ݣان ئوراغن أم لكبريت. ݣين ئقرّا ن-ئسان أمّ ئقرّا ن-ئزماون. أر تفّغ زݣ ئقما نسن لعافيت د واݣّو د لكبريت.
18 لمصيبات-اد شّارض نّا ئتفّعن زݣ ئقما ن-ئسان، نغان تّولوت ن ميدّن.
19 ييلي لجهد ن-ئسان ݣ-ئقّما نسن د-ئݣجّيمن نسن، لاحقّاش ݣان ئݣجّيمن نسن أم ئخفاون ن ئفيغراوين دا ئسّن تّقسن.