تاوارجيت ن يوحنّا

لمالاك د لكتاب أمژّيان

‏1 ضارت ن-وياد، أنّايخ يون ن لمالاك ياضن ئجهدن ئضردّ زݣ ئݣنّا. ئلسان ئسيݣنو. تيلي تسليت ن-ونژار خف ؤقرّو نّس. ئݣ وودم نّس أمّ تافوكت. ݣين ئضارن نّس أمّ ترسال ن لعافيت.

‏2 ييلي يون لكتاب أمژّيان ئرژمن ݣ-ؤفوس نّس. ئسرس أضار نّس أفاسي خف لبحر د-وژلماض ݣ واشال.

‏3 داي ئسغوي س-ؤغويّي أخاتار أمّ وين ئزم، أها سيولنت تݣناو س سبعا فّيراس.

‏4 نتّا سيولنت تݣناو س سبعا، عولخ أد أروخ أينّا نّانت، ماشان سليخ يي شان حدّ زݣ ئݣنّا دا يي ئتّيني: «قّن لكتاب، أد ؤر تّارو أينّا نّانت تݣناو س سبعا!»

‏5 ئد لمالاك نّا أنّايخ ئݣا أضار خف لبحر د-وضار ياضن ݣ واشال، ئهزّا أفوس نّس أفاسي غر ئݣنّا.

‏6 أها ئݣّالّ س ربّي نّا ئدّرن أبدا، نّا ئخلقن ئݣنّا د مايد ديكس ئلّان د واشال د مايد ديكس ئلّان د لبحر د مايد ديكس ئلّان، أها ئنّا: «ؤسار تّيلي تّاجيلا».

‏7 ماشان أدّاي تاوض لوقت ݣ ئعوّل لمالاك ويسّ سبعا أد ئبرّح ݣ لبوق نّس، أد ئجرو سّر ن ربّي ئمشينّا ئنّا ئي لانبييا ئسمغان نّس.

‏8 ئد أغويّي نّا مي سليخ زݣ ئݣنّا ئسيولييي ديخ ألتو ئنّايي: «دّو، أمژ لكتاب أمژيان ئرژمن ݣ-ؤفوس ن لمالاك نّا ئبدّين خف لبحر د واشال».

‏9 أها دّوخ غر لمالاك نّيخاس: «وشييي لكتاب أمژّيان». داي ئنّايي: «أمژت تتّشت، ئدّا أد ئݣ رّهج ݣ-ؤعدّيس نّش، ماشان أد ياتفوط ݣ-وقمو نّش أمّ تامّنت».

‏10 أمژخ لكتاب أمژّيان زݣ ؤفوس ن لمالاك أها تّشيخت. ياتفوط ݣ-وقمو نو أمّ تامّنت. نتّا سّغليخت، ياغول ئݣا رّهج ݣ-ؤعدّيس ئنو.

‏11 داي ئنّايي: «ئخصّاش أت تسيولد ديخ ألتو س-ؤينّا ش ئسنعت ربي خف شايݣان ن لقوم د لݣنوس د-ئلسيون د-ئݣلّيدن».