تاوارجيت ن يوحنّا

سين ن شّهود

‏1 داي ئتّمْوشايي يون ن-ؤغانيم ئݣان أمّ ؤعمّود ن لعبار. أها ئنّاييي لمالاك: «كّر عبر تادّارت ن ربّي د-ؤسغرص أها تحاسبت وينّا تعبادنين دينّا.

‏2 ئد رّحبت ئلّان برّا ن تادّارت ن ربّي، أد ؤر ت تّعبار،أدجّيت، ئدّخ ت تّواوش يي لݣنوس نّا ؤر دا ئتّامن س ربّي. دّان أد عفسن س-يضارن نسن خف تامدينت ن لقدس تناين ؤربعين ن وايور.

‏3 داي دّيخ أد نّازنخ يي ميدّن سين ن شّهود ئنو، لسان ئعبان ن لحزن أد سيولن خف ربّي س- ؤينّا س نيسنعت ألف د ميتاين د ستّين ن واسّ.

‏4 د شّهود-اد سّين نيتني أيد ئݣان سين ن-ئسكلا ن زّيتون د سنات ن لحساكي ئبدّن دات ن مولانا نّا ئخلقن أشال.

‏5 داي مش ئلّا ونّا ئران أد غورسن ياژض س-ؤينّا ؤر ئحلين، أت تفّغ لعافيت زݣ ئقما نسن أها تتّش ئنضليبن نسن، يّيه، ونّا ئران أد غورسن ياژض س-ؤينّا ؤر ئحلين ئلازم أد-ئتّونغ س وامشي.

‏6 تيلي غر شّهود-اد تانباطّ أد قنن ئݣنّا حما ؤر ئكّات ؤنژار ݣ لوقت ݣ-ال سّاوالن خف ربّي. تيلي غورسن ألتو تانباطّ أد رارن أمان أد ݣين ئدامّن أها وتن أشال أدّاي ئرين س مايد ئݣان لمصيبت.

‏7 ماشان أدّاي شمّلن شّهادت نسن، لوحش نّا ئدان أد دّيالي زݣ وانو وار لحدّ، ئدّا أد ئسكّر أݣّيدسن ئمنغي، ئرّوتن أها ئخلوتن.

‏8 تّوݣرين لݣنازات نسن سّين ݣ رّحبت ن تمدينت تاخاتارت نّا مي دا تّينين س لمعنا تامدينت ن سدوم د مصر، ماني ݣ-ئتّوصلب مولانا نسن.

‏9 دّان ميدّن زݣ مايد ئݣان لقوم د مايد ئݣان تاقبيلت د مايد ئݣان ئلس د مايد ئݣان لݣنس أد دّون أد-انّاين لݣنازات نسن، شراض ن ووسّان د نّص. أها ؤر-اسن تّادجّان أت تن نضلن.

‏10 دّان أد فرحن ئمزداغ ن واشال س لموت ن لانبييا-ياد سّين، أت تّمّوشين ݣراتسن لهدييّات، ئدّخ سكّين غيفسن شايݣان ن تمارا.

‏11 ماشان، ضارت ن شراض ن ووسّان د نّص، ئدّا ربّي أت تن ئسّيدر، بدّين خف ئضارن نسن. د ميدّن نّا أر ديكسن ئتفرّاجن، أد ݣّدن شايݣان،

‏12 أها سّفلدن لانبييا سّين يي يون ن-وغويّي أخاتار زݣ ئݣنّا داسن ئتّيني: «أليياتدّ غر داد!» ألين سّين نسن ݣ-ؤسݣنيو غر-ئݣنّا. أر ديكسن تّراعان ئنضليبن نسن.

‏13 داي لوقت نّا، ئكّر يون ن زّلزال أخاتار، ياتّوي لعوشور ن تمدينت. ئنغ زّلزال سبعا ألاف ن ميدّن. ئد وينّا ئسولن يومژتن ؤخلاع، قّيمن أر تمجّادن ربّي نّا ئلان ݣ ئݣنّا.

‏14 تزري لمصيبت تيسّنات، غوراون! تسول لمصيبت تيسّ شّراطّ أت تاوض فيمرّا.

لبوق ويسّ سبعا

‏15 ضارت ن-ؤياد، ئبرّح لمالاك ويسّ سبعا. كّرن ئغويّان ئخاتارن ݣ-ئݣنّا، أر تّينين: «دغي، لحكام ن دّونيت ياغول دّاو ن تنباطّ ن مولانا نّخ د لمسيح نّس. ئدّا أد ئݣ أݣلّيد أبدا».

‏16 داي كّرن ربعا ؤعشرين ن-ومغار نّا ئقّيمن دات ن ربّي خف لكراسا نسن، بندقن يي ربّي، حمدنت

‏17 أها أر تّينين: «أمولانا، أربّي أخاتار! نّا ئلّان زݣ واهوا، ونّا ئلّان دغي د ونّا ئلّان دّيما! دا ش نتشكار، ئدّخ تݣيد مايد ئݣان شا دّاو ن تنباط نّش أها تݣيد أݣلّيد ن دّونيت.

‏18 داي حرقن ميدّن ن لݣنوس ياضن، دغي، تدّادّ لوقت ن-ؤحراق نّش غيفسن د لوقت نّاݣ تدّيد أت تحكمد خف ئمتّين، توشت أينّا ستاهلن يي ئسمغان نّش لانبييا، د صّاليحين د وينّا ك ئتواقّرن، ئمژّيان د-ئخاتارن أها تخلوت وينّا يوخلّون أشال».

‏19 داي ترژم تادّارت ن ربّي ݣ-ئݣنّا، ئضهردّ صندوق ن تاضا جاج نّس، ؤتندّ ووسمان، كّرن ئغويّان، سيولنت تݣناو،ئوّت زّلزال، ياتّوي شايݣان ن تابروري.