تاوارجيت ن يوحنّا

تامطّوط د لهيشت

‏1 داي تضهردّ يوت ن تماتارت تاخاتارت ݣ-ئݣنّا: يوت ن تمطّوطّ تغمساس تافوكت أم شا ؤعبان، ييلي وايور دّاو ن-ئضارن نّس، ييلي خف ؤقرّو نّس يون ن تّاج ن تناعش ن-ئتري.

‏2 تيلي س-ؤديس، أر تسغويّو س لحرّ ن-ؤقضاع ن تاروا.

‏3 أها تضهردّ يوت ن تماتارت ياضن ݣ-ئݣنّا، داي هان يوت ن لهيشت تاخاتارت ئݣان تازوݣّاغت، غورس سبعا د-ئقرّا د عشرا ن واشّيون، ييلي خف كو أقرّو يون ن تّاج.

‏4 أها تنزغ تّولوت ن-ئتران ن-ئݣنّا س-ؤݣجّيم نّس تݣرتن خف واشال. أتبدّ لهيشت-اد دات ن تمطّوطّ ئدجّاورن أت تارو حما أت تفرس ممّيس أدّاي د-ئلال.

‏5 داي تارو يون ن-ؤربا. نتّا أيد ئدّان أد-ئنبض خف لݣنوس كول س-ؤعمّود ن ووزّال. ماشان أربا-ياد ئتواسي غر ربّي د لكرسي نّس ن لحكام.

‏6 ئد تامطّوط ترول غر صّحرا، أدغار نّا س-ئسّوجد ربّي حما أد ديكس ئنهلّا ألف د ميتاين د ستّين ن واسّ.

‏7 داي ئكّر ئمنغي ݣ-ئݣنّا: ميخائيل د لمالايكا نّس نّاغن د لهيشت د لمالايكا نّس.

‏8 لهيشت د لمالايكا نّس تّوغلبن، أها ؤرغورسن ئقّيم ؤدغار فّير ن-ؤينّا ݣ-ئݣنّا.

‏9 داي تتوݣر لهيشت تاخاتارت غر برّا، نتّات أيد ئݣان تيفغري تامحايلت نّا مي دا تّينين: إبليس نغد شّيطان، نّا ئتغشّان ميدّن ن دّونيت كول. ئتّوݣر ݣ واشال أها تّوݣرن أود لمالايكا نّس أݣّيدس.

‏10 فّير ن-ؤينّا، سليخ يي شان يون دا ئساوال س-ؤغويّي ݣ-ئݣنّا أر ئتّيني: «ئدّاد ؤفوكّا ن ربّي نّخ دغي، د لجهد نّس، د لحكام نّس، د تنباطّ ن لمسيح نّس. ئدّخ ئتّوݣر ونّا ئشّتكون س أيتماتنخ، ونّا ئسّن ئشّتكون ݣّيض د واسّ غر ربّي نّخ.

‏11 نيتني غلبنت س-ئدامّن ن-ؤعلّوش د واوال ن شّهاتّ نسن غيفس، ئدّخ ؤر غورسن تعزّ تودرت نسن أها ؤر دا تݣّدن زݣ لموت.

‏12 خف ؤياد غاس فرحات أييݣنوان د-ئمزداغ نّا ديكسن ئلّان، أيايد ياغن وينّا زدغنين ݣ واشال د لبحر، ئدّخ ئضّرد غورون شّيطان س-ؤحراق أخاتار د نتّا ئسّن ؤسّان نّس دروسن».

‏13 نتّا تانّاي لهيشت ئخف نّس تتّوݣر ݣ واشال، تكّر أر تژّع تامطّوط نّا يورون أربا.

‏14 أها تّواوشن يي تمطّوطّ أفريون ن لباز أخاتار حما أت تافرو غر أدغار نّس ݣ صّحرا، ماني ݣ تتّا شراض ن-ئسݣّاسن د نّص أها ؤر ت تّاوض تفيغري.

‏15 داي تسّوفغدّ تفيغري زݣ ؤقمو نّس شيݣان ن وامان أم واسيف فّير ن تمطّوطّ حما أت تاوي لحملت.

‏16 ماشان أشال ئعاون تامطّوط، ئرژم يي ئمي نّس أها ئسو أمان نّا تسّوفغ لهيشت زݣ ؤقمو نّس.

‏17 داي تحرق لهيشت خف تمطّوطّ، تدّو أت تسكّر ئمنغي د-تريكت نس، وينّا ئسولن دا تݣّين س واوال ن ربّي أها أر تشاهدن ئس تفارن أبريد ن عيسى لمسيح.