13
لوحش نّا دّيولين زݣ لبحر
1 داي بدّخ ݣ-ؤكژاژ ن لبحر، أنّايخ يون ن لوحش يوليدّ زݣ لبحر. ئلين غورس سبعا د-ئقرّا د عشرا ن واشّيون. ئلين خف واشّيون نّس عشرا ن تّيجان. أها ئتيارو خف كو أقرّو ئسم ن لوكفر.
2 د لوحش نّا أنّايخ ئرويس أغلياس، ئضارن نّس أم ئضارن ن دّوب د-ؤقمو نّس أم ؤقمو ن ئزم. أها توشاس لهيشت لجهد نّس، لكرسي نّس د تنباطّ تاخاتارت.
3 أها أنّايخ يون ن-ؤقرّو زݣ ئقرّا نّس أمّاني ئغرص أها ئدجاور أد ئمّت، والاينّي أترس نّا ت-ئنقّان ئجّي. داي تعجبن أيت واشال كول أها تفارن لوحش.
4 داي بندقن ميدّن يي لهيشت نّا ئوشان تانباطّ يي لوحش أها بندقن أود يي لوحش، أر تّينين: «مايد ئݣان أم لوحش؟ د مايد ئغييْن أد-اݣّيدس ئنّاغ؟»
5 داي ئتّواوش يي لوحش أقمو أد ئسيول س-لكيبر د لكفر خف ربّي. تيلي تنباطّ غورس أد ئنبض اثْنَيْن ؤرْبَعِين وايور.
6 أها ئكّر أر-ئساوال س ݣار أوال خف ربّي د-ئسم نّس د خف ؤزدّوغ نّس د خف ئمزداغ ن-ئݣنّا.
7 داي ئتّواوشاس لجهد أد ئسكّر ئمنغي د صّاليحين أها حما أتن ئغلب. تتّواوشاس تنباطّ خف مايد ئݣان تاقبيلت د مايد ئݣان شعب د مايد ئݣان ئلس د مايد ئݣان لݣنس.
8 داي دّان ئمزداغ ن دّونيت كول أد-اس سجدن، وينّا مي ؤر تّوارين ئسماون نسن ݣ لكتاب زݣّوس تلّا دّونيت، لكتاب ن تودرت ن-ؤعلّوش نّا ئتّوغرصن.
9 د ونّا غر لّان ئمجّان أد ئسّغد!
10 د ونّا يومژن وييّاض ݣ لحبس ئدّا أد ئتّوامژ ئتّواوي غر لحبس، د ونّا ئنقّان س تفروت ئلازم أد ئتّونغ س تفروت. د داهاد أيد ئتّيلي صّبر ن صّاليحين د ليمان نّسن.
لوحش نّا دّيولين زݣ واشال
11 داي أنّايخ يون ن لوحش ياضن يوليدّ زݣ واشال، ئلين غورس سين ن واشّيون ئݣان أم وين ؤعلّوش، والاينّي أر ئساوال أم لهيشت.
12 أر ئتّنباض س تنباطّ ن لوحش أمزْوارو ݣ-ؤحاضر نّس، ئݣ دّرع يي أيت واشال كول د-يمزداغ نّس أد بندقن يي لوحش أمزْوارو نّا ئجّين زݣ ؤترس نّس نّا ئنقّان.
13 أها ئݣ لموعجيزات تيخاتارين. ئسوݣّزدّ لعافيت زݣ-ئݣنّا خف واشال دات ن ميدّن.
14 داي ئغرّا ئمزداغ ن واشال س لموعجيزات نّا ئݣا دات ن لوحش أمزْوارو. أر ئتّيني يي ئمزداغ ن واشال أد ݣين يون ن لاصنام أمّ لوحش نّا ئتّورسن س تفروت أها ييدير.
15 تيلي غورس تنباطّ أد ئݣ رّوح ݣ لاصنام ن لوحش أد ئسيول. أها تّونغين كول وينّا ؤر ئبنديقن يي لاصنام ن لوحش،
16 داي ئݣ دّرع يي ميدّن كول ئخاتارن د-ئمژّيان، ئمطرّحن د-ئمژلاض د-ئحورّيين د-ئسمغان، أد-اسن تتّواݣّ يوت ن تماتارت ݣ-ؤفوس أفاسي نغد خف تاينرت.
17 حما ؤر ئتّيغيي أود يون أد ئسغ نغد أد ئزّنز غاس ونّا غر تلّا تماتارت س-ئسم ن لوحش نغد نّمرا ن-ئسم نّس.
18 داد أيد تلّا تانژّي د ونّا غر ئلّا لفهم أد ئحاسب نّمرا ن لوحش، هاتين نّمرا ن-ئسم ن يون ن بنادم د نّمرا نّس ستّمييا د ستّا ؤستّين.