14
1 داي أنّايخ يون ن-ؤعلّوش ئبدّ خف عاري نّا مي تّينين صهيون، ئلين أݣّيتس مييّا د ربعا ؤربعين ألف ن بنادم، ئتواري ئسم نّس د-ئسم ن-ئبّاس خف تينار نسن.
2 سليخ يي يون ن-ؤغويّي ئدّاد زݣ-ئݣنّا ئݣان أ نغد أمّ ؤغويّي ن تݣنوت تاخاتارت. أغويّي نّا مي سليخ، ئݣا أمّ ؤغويّي ن-ئد لوطار أدّاي ئسن تّورارن ئمليازن.
3 أر تّينين تامديازت توجديد خف ربّي دات ن لكرسي نّس د دات ن ربعا ن لموخليقات د-ئمغارن. أها ؤر ئغيي أود يون أد ئعلّم تامديازت-اد غاس مييّا د ربعا ؤربعين ألف نّا ئتّوفوكّان زݣ دّونيت.
4 ويد أيد ؤر دجين حادان تيوتمين، قّيمن ݣان ئعزرين. دا تتفارن أعلّوش ماني غر ئدّا. د نيتني أيد ئتّوفوكّان زݣ ئنݣر ن ميدّن، أها تمْوشين ئ ربّي د-ؤعلّوش أمّ لغلتّ تامنزوت.
5 ؤر دجّين سيولن س-ئحلّالن أها ؤر ديكسن ئلّي لعيب.
شراض ن لمالايكات
6 ضارت ن-ؤينّا، أنّايخ يون ن لمالاك ياضن دا ئتّافراو ݣ-ئݣنّا. ييويد أݣّيدس أوال ن ربّي ن وابدا، حما أد-ئس ئبرّح يي ئمزداغ ن واشال، يي مايد ئݣان لݣنس، مايد ئݣان تاقبيلت، مايد ئݣان ئلس د مايد ئݣان شّعب.
7 أر ئتّيني س يون ن-ؤغويّي ئجهدن: «ݣدات ربّي! تݣيماس لعزّ! ئدّخ تيوض لوقت ن لحساب. عبدات ونّا ئخلقن ئݣنّا د واشال، لبحر د-ئغبولا».
8 داي ئتفارت لمالاك ويسّين، أر ئتّيني: «هاتين تاتّوي! هاتين تاتّوي تمدينت ن بابل تاخاتارت! نتّات أيد ئسنعتن يي ميدّن أد فسدن أمّ نتّات».
9 داي ئتفارتن لمالاك ويسّ شراض، أر ئتّيني س يون ن-ؤغويّي ئجهدن: «ونّا ئبندقن يي لوحش د لاصنام نّس أها ئݣ تماتارت نّس خف تاينرت نّس نغد خف ؤفوس نّس،
10 أود نتّا، ئدّا أد ئسو زݣ شّراب ن-ؤزعاف ن ربّي، ئتّوعمّرن ݣ لكاس ن-ؤقلّق ن ربّي أها ؤر ئشّور د والو. بنادم أم واد ئدّا أد غيفس ئسكّ ربّي تامارا س لعافيت د لكبريت دات ن لمالايكا نّس د-ؤعلّوش.
11 د واݣّو ن تمارا نسن أد ئتّالي خف وابدا أها ؤسار ئتّيلي ؤسݣونفا ݣّيض د واسّ غر وينّا ئتبنداقن يي لوحش د لاصنام نّس د وينّا ئݣان كول تاماتارت ن-ئسم نّس.
12 داد دا دئتضهار صّبر ن صّاليحين نّا ئحضان أوال ن ربّي د ليمان س عيسى».
13 داي سليخ يي يون ن-ؤغويّي ݣ ئݣنّا دا ئتّيني: «أرو: أياعري نّسن ئ وينّا مّتنين زݣ دغي د نيتني دا ئتّامنن س مولانا!» أها أر ئتّيني رّوح ن ربّي: «يّيه، ئمشيد أس تشمّل لخدمت نسن، أد سݣونفان، ئدّخ ݣان أينّا ئژيلن». ييه، لحقاش داتسݣونفان زݣ تمارا كول نّا غيفسن ئيكّان، أها دّان أدامزن لاجر خف لخدنت نسن.
تامݣرا لغلت ن واشال
14 هزّاخ ألّن، أنّايخ يون ؤسيݣنو أملّال. ئقّيم غيفس شان يون ئرويسن ممّيس ن بنادم. ئݣا خف ؤقرّو نّس يون ن تّاج ن دّهب. ياسي ݣ-ؤفوس نّس يون ن-ؤمݣر ئشوان.
15 أها ئفّغدّ زݣ تادّارت ن ربّي يون ن لمالاك ياضن، أر ئسغويّو س-ؤغويّي أخاتار خف ونّا ئقّيمن خف ئسيݣنو: «أسي أمݣر نّش أت تمݣرت! ئدّخ تتدّاد لوقت ن-ؤمݣر، أها تنوو لغلت ن واشال يي ؤمݣر!»
16 داي ئسّك ونّا ئقّيمن خف ئسيݣنو أمݣر نّس خف واشال أها ئتومݣر واشال.
17 داي ئفّغدّ يون ن لمالاك ياضن زݣ تادّارت ن ربّي نّا ئلّان ݣ-ئݣنّا. غورس أود نتّا ألتو يون ن-ؤمݣر ئشوان.
18 داي ئفّغدّ ألّو يون لمالاك ياضن زݣ ؤدغارنّا ئتغوس لبخور. تيلي غورس تنباطّ خف لعافيت. أها ئسغويّ س-ؤغويّي أخاتار خف ؤنّا يوسين أمݣر ئشوان، ئنّاياس: «أسي أمݣر نّش ئشوان أها تبّيد ئزرورن ن دّيليت ن واشال، ئدّخ ئنوا واضيل نّس».
19 أها ئوّت لمالاك س-ؤمݣر نّس خف واشال ئكّس ئزرورن ن دّيليت ن واشال، ئݣرتن ݣ لمعصرا تاخاتارت ن-ؤحراق ن ربّي.
20 داي ئتّوعصر واضيل س-ئضارن برّا ن تمدينت، أها فّغند ئدامّن زݣ لمعصرا ألّيݣّ ئوضن غر لقدّ ن-ئلݣامن ن-ئسان د تاغزي أتاين ن تلتمييّا ن كيلوميتر.