20
ألف ن-ؤسݣّاس
1 داي أنّايخ يون ن لمالاك ئضردّ زݣ ئݣنّا. أها تيلي ݣ-ؤفوس نّس تاساروت ن وانو وار لحدّ د يوت ن سّنسلت تاخاتارت.
2 داي يامژ لهيشت، لهيشت-اد نتّات أݣّان تيفيغري تامحايلت نّا مي دا تّينين إبليس نغد شّيطان، ئكرفت خف والف ن-ؤسݣّاس.
3 ئݣرت ݣ وانو وار لحدّ، ئقّن غيفس أها ئݣاس طّابع ن شّمع حما ؤسار ئسّاشكا لݣنوس ألّ أفضن والف ن-ؤسݣّاس. داي ئلازم أد ئتورژم ضارت ن-ؤينّا شا ن لوقت ئدروسن.
4 داي أنّايخ ئتس ن لوكراسا د وينّا غيفسن قّيمنين تتمّوشاسن تنباطّ ن لحشام. أنّايخ لارواح ن وينّا مي توابّين ئخفاون نسن خف نّيرت ن ؤبرّح بطايطاي س-عيسى لمسيح د خف واوال ن ربّي. ألتو وينّا ؤر ئبنديقن يي لوحش نغد يي لاصنام نّس أها ؤر ݣين تاماتارت خف تينار نّسن ؤلا ݣ-ئفاسّن نّسن. أغولن غر دّونييت أها ݣان ئݣلّيدن د لمسيح ألف ن-ؤسݣّاس.
5 أياد أݣّان تانكرا تامزواروت، ئد ئمتّين نّا ئسولن ؤر دّين أد-ئديرن غاس ألّ أفضن والف ن-ؤسݣّاس.
6 أياعريت ن وينّا ئكّرن زݣ لموت ݣ تنكرا تمزواروت. هاتين تّوباركن أها صلحن. لموت تيسّ سنات ؤر غورس مايد-اسن تݣا. دّان أد ݣين ئنبدادن ن تادّارت ن ربّي، زّيلزن خف ربّي د لمسيح. أها دّان أد ݣين ئݣلّيدن أݣّيدس ألف ن-ؤسݣّاس.
تاطّوط ن شّيطان
7 أدّاي أفضن والف ن-ؤسݣّاس، أد-ئرژم شّيطان زݣ لحبس،
8 حما أد ئسّوفغ ئ-ؤبريد لݣنوس نّا ئلّان ݣ ربعا ن تغمّورا ن واشال، نّا ئݣان تميزار ن جوج و ماجوج، ئسمونتنيد غر ئمنغي. ݣّوتن أنشت ن-ؤݣزاژ ن لبحر.
9 مروردن خف وودم ن واشال كول، ضورن يي شّعب ن ربّي د تمدينت ئعزّن. تضردّ لعافيت ن ربّي زݣ ئݣنّا أها تخلو لݣنوس نّا ئسمون شّيطان.
10 ئد شّيطان نّا أر تن ئسّوفوغن يي ؤبريد، ئتّوݣر ݣ-ؤݣلمام ن لعافيت د لكبريت، مانيݣ ئلّا لوحش د نّبي بويحلّالن، حما أت تكّ غيفس تمارا س ييض د واسّ أبدا.
أسّ ن لعيقاب
11 داي أنّايخ يون ن لكرسي أخاتار أملّال. ونّا ئقّيمن غيفس ئرول زݣ داتاس أشال د-ئݣنّا، أها ؤر ئقّيم لاتر نّسن.
12 داي أنّايخ ئمتّين ئخاتارن د-ئمژيان. بدّين دات ن ربّي. رژمن لكتوب أها ئرژم يون ن لكتاب ياضن ئݣان لكتاب ن تودرت. داي تّوحكمن ئمتّين س-ؤينّا ئلّان ݣ لكتوب، كويون خف ئسكّين نّا ئݣا.
13 داي ئݣردّ لبحر س-ئمتّين نّا ديكس ئلّان، تݣردّ لموت د ليخرا س-ئمتّين نّا ديكسن ئلّان. أها ئتّوحكم كويون خف ئسكّين نّا ئݣا.
14 داي تّوݣر لموت د جاهنّام ݣ يون ن-ؤݣلمام ن لعافيت، ئݣ ؤݣلمام-اد لموت تيسّ سنات.
15 أها ئتّواݣر ديكس أود ونّا مي ؤر يارو ئسم نّس ݣ لكتاب ن تودرت.