تاوارجيت ن يوحنّا

سبعا ن ئواليون ؤسبّح

‏1 ضارت ن-ؤياد، سلّخ ئ يون ؤغويّي أخاتار ن يون ن-ؤربيع ݣ-ئݣنّا. أر ئتّيني: «هلّيلويا! أفوكّا د لعزّ د لوقر د لجهد ݣان وين مولانا، ربّي نّخ.

‏2 ئدّخ ݣانت تنباضين نّس لحقّ منونت! أها ئحكم خف تنفساتّ تاخاتارت نّا ئسخسرن أشال س لفساد نّس، يامژ زّيكس لحقّ ئدّخ تنغا ئسمغان ربّي».

‏3 داي نّان ديخ ألتو: «هلّيلويا! هان أݣّو ن تنفسات دا ئتّالي خف وابدا».

‏4 أها تّوتين ئمغارن س ربعا ؤعشرين د ربعا ن لموخليقات خف ئفادّن، بندقن يي ربّي نّا ئقّيمن خف لكرسي، أها نّان: «أمين! هليلويا!»

تامغرا ن-ؤعلّوش

‏5 داي ئسيول يون ن-ؤغويّي زݣ لكرسي، دا ئتّيني: «سبّحات يي ربّي نّخ، أييسمغان نّس كول نّا ت-ئتّݣّدن، ئمژّيان د-ئخاتارن!»

‏6 أها سفلدخ يي يون ن-ؤغويّي ئݣان أم وين يون ن-ؤربيع أخاتار ن ميدّن، أمّ لهزّ ن شايݣان ن وامان د-امّ ؤغويّي ن تݣنوت ئجهدن، دا ئتّيني: «هلّيلويا! لاحقّاش دا ئتّنباض مولانا ربّي أخاتار!

‏7 ئلازماخ أنفرح ترشقاخ! نݣاس لعزّ، ئدّخ تيوض لوقت ن تمغرا ن-ؤعلّوش أها تسواجد تسليت ئخف نّس.

‏8 وشيناس أت تلس لكتّان أملّال ئسفليلّين»، ئدّخ لكتّان-اد ئغودان، لمعنا نّس: ئسكّين ژيلنين نّا ݣان صّاليحين.

‏9 داي ئنّايي لمالاك: «أرو! أياعريت ن وينّا ئتّوعرّضن غر ئمنسي ن تمغرا ن-ؤعلّوش!» أها ئنّايي ألّو: «ويد أيد ئݣان ئواليون ن ربّي، ئواليون ن لحقّ».

‏10 داي بندقخ دات ن-ئضارن نّس حما أت تعبدخ. ماشان ئنّايي: «سموقّل، هان أت تݣت أياد! نكّين ئسمغ أم شݣّين أيد ݣيخ د-امّ أيتماش نّا ئتبشّارن س عيسى، بندق غاس يي ربّي! ئدّخ ونّا ئتبرّاحن س عيسى دا غورس ئتيلي رّوح نّا ئتيلين غر لانبيا».

أمناي ن ئييس أملّال

‏11 ضارت ن-ؤينّا، أنّايخ ئݣنّا ئرژم، داي هان يون ئييس أملّال ئني غيفس يون دا س تّينين: أمين د لحقّ، أر ئحكّم س لحقّ أها أر ئتحاراب خف لحقّ.

‏12 ألّن نّس ݣان أمّ ؤحدّيق ن لعافيت، ئلين خف ؤقرّو نّس شايݣان ن تّيجان. أها ئتواري غيفس يون ن-ئسم ؤر ئلّي ونّا تيسّن غاس نتّا.

‏13 ئلسا يون ن-ؤژنّار ئغبژن ݣ-ئدامّن، داس تّينين أوال ن ربّي.

‏14 داي أر ت تفارن ئعسكريين ن-ئݣنّا، نين خف ئسان ئملّالن أها لسين لكتّان أملّال ئسفليلّين.

‏15 أر ئتفّغ زݣ ؤقمو نّس يون سّيف ئشوان حما أد-ئوّت ئسّ لݣنوس. نتّا أيد ئدّان أد ئݣ أمكسا نّسن أها ئݣوّتن س-ؤعمّود ن ووزّال. ئدا أد-اسن دياوي لغضاب ن ربّي نّا ئغيين يي ماݣان شا أها ئعصرتن ئمشينّا تعصارن ميدّن أضيل ݣ لمعصرت.

‏16 أها ئتواري خف ؤعبان نّس د-ؤقرميم نّس ئسم-اد: أݣلّيد ن-ئݣلّيدن د مولانا ن-ئد مولانا.

‏17 داي أنّايخ يون ن لمالاك ئبدّ ݣ تافوكت، أر ئسغويّو س يون ن-ؤغويّي أخاتار، دا ئتّيني يي ئجضاض كول ئتّافراون ݣ وامّاس ن-ئݣنّا: «أوريو موناتدّ غر ئمنسي ن تمغرا تاخاتارت ن ربّي،

‏18 حما أت تشّيم أكسوم ن-ئݣلّيدن د لقيّاد د-ئصاطّن د-ئسان د-ئمناين نّسن د أكسوم ن ميدّن كول، ݣان ئحورّيين نغد ئسمغان، ݣان ئمژيان نغد ئخاتارن!»

‏19 داي أنّايخ لوحش د-ئݣلّيدن ن دّونيت د-ئعسكرين نّسن، مّونن أد نّاغن د ونّا ئنين خف ئييس د لعسكر نّس.

‏20 أها ئتّوامژ لوحش د نّبي بويحلّالن، نّا ئݣان دات-اس لموعجيزات أها ئسّوفغ يي ؤبريد وينّا ئݣان تاماتارت ن لوحش د وينّا ئبندقن يي لاصنام نّس. داي تّوݣرين سّين نّسن دّرن ݣ يون ن-ؤݣلمام ن لعافيت ئتّاغن س لكبريت.

‏21 ئد وينّا ئقّيمن مّوتن س سّيف نّا ئفّغن زݣ ؤقمو ن ونّا ئنين خف ئييس أها دجّاونن كول ئجضاض س-ؤكسوم نّسن.