18
أتوتّي ن تمدينت ن بابل
1 داي أنّايخ ضارت ن-وياد يون ن لمالاك ياضن ئضردّ زݣ-يݣنّا. تلّا غورس تنباطّ تاخاتارت أها ئمسيسيدّ واشال س ؤسيدّ ن لعزّ نّس.
2 داي ئسغويّ س يون ن-وغويّي ئجهدن، أها ئنّا: «تاتّوي، تاتّوي تمدينت ن بابل تاخاتارت! أها تݣ أزدّوغ ن شّياطين، د لارياح نّا ؤر ئحلين كول د-وسنتل ن-ئجضاض نّا ئحرمن أها أر تن تكرهن ميدّن!
3 ئدّخ سوان لݣنوس كول زݣ شّراب ن لفساد نّس د تيخّيتّ نّس. أها فسدن أݣّيدس ئݣلّيدن ن واشال، د-يعطّارن ن دّونيت أغولن طرّحن زݣ تايوانت نّس تاخاتارت!»
4 داي سفلدخ يي يون ن-واوال ياضن زݣ-ئݣنّا، ئتّينين: «ألقوم ئنو، فّغات زّيكس! حما ؤر تّامّوم ݣ دّنوب نّس أها ؤر كون تّاوضن لمصيبات نّس.
5 ئدّخ عدّان دّنوب نّس أها أوضن غر ئݣنّا د ربّي ئشتي تيخّيتّ نّس نّا تݣا.
6 ݣاتاس أم ؤينّا تݣا ئ وييّاض، تݣيماس سين ن-ئمورن ن-ؤينّا تݣا. ݣ لكاس نّاݣ تسّروي شّراب ئ وييّاض، كوبّاتاس شّراب ئجهدن سنات ن لمرّات.
7 كرفصات تݣيماس مكرضول أنشت ن لعزّ نّا تݣا ئ-ئخف نّس د-ؤطرّح، ئدّخ تنّا ݣ-ئخف نّس، نكّين ݣيخ تاݣلديتّ! نكّين ؤر ݣيخ تنّا مي ئمّوت ؤرݣاز أها ؤر دّيخ أد أنّايخ لحزن.
8 داي خف نّيرت ن-وياد دّانت ݣ يون ن واسّ أد-اس جرونت لمصيبات، د واطّان نّا د ديتاوين لموت د لحزن د بوهيّوف أها تغوس س لعافيت، ئدّخ دا ت-ئتعاقاب مولانا ئݣان ربّي أخاتار».
9 ئݣلّيدن ن واشال نّا أݣّيدس ئفسدن أها عيشن أݣّيدس ݣ-ؤطرّح دّان أد غيفس رون أها وتن أݣجدور، أدّاي أنّاين أݣّو ن لعافيت نّا ت-ئسغوسان.
10 أها بدّين ݣ تّيساع، ئدّخ ݣّدن زݣ ؤخوب نّس أها أر تّينين: «أياشم ياغن! أياشم ياغن! أتامدينت ن بابل تاخاتارت، أبابل ئݣان تامدينت تاصاطّ، ئدّخ دغيا ئعاقبكم ربّي!»
11 داي رون ئعطّارن ن دّونيت وتن غيفس أݣجدور، ئدّخ أينّا زّنوزان ؤر ياد دا ت-ئسّاغ أود يون.
12 سّليعت ن وورغ د نّقّرت د تين لجوهرئغلان د تين ؤزرو ن لمعدن ئغلان د تين لكتّان د ملسيوات نا ئغلان د لحرير د-ئعبان ئزݣّاغن د تين مايد ئݣان كول لبخور د تين مايد ئݣان كول ئفشكا ن لعاج د-وكشّوض ئغلان د-ئفشكا ن نّحاس د-ئفشكا ن ووزّال د رّخام،
13 د لقرفا د-ئسوفار د لبخور د زّهر د لّوبان د شّراب د زّيت د وارّ أملّال د-ئمندي د لبهايم د وولّي د-ئسان د لوكرارس د-ئسمغان د-ئمحباسن.
14 داي دّان أد ئنين يي ميدّن ن تمدينت: «تقضا لفيكييت نّا أر تّيريم، تقضو تايوانت د-ؤطرّح ؤر ياد ت تّافام!»
15 ئد ئعطّارن نّا أر ئزّنوزان ئسكين-اد أها طرّحن زݣ تمدينت-اد دّان أد بدّين زݣ تّيساع، ئدّخ ݣّدن زݣ لعيقاب نّس. أد رون أها وتن أݣجدور.
16 أها دّان أد ئنين: «أويهانّم، أويهانّم! أتامدينت تاخاتارت نّا أر ئلسّان لكتّان د ملسيوات نّا ئغلان د-يعبان ئز ݣّاغن، د-ئزبيان ن-وورغ د-لجوهر نّا ئغلان د ؤزرو ن لمعدن نّا ئغلان.
17 ئدّخ ئدّا ؤطرّح ئݣان ئمشيد أد ئزري دغيا». د-ئد باب ن لبابورات كول د-ئمسافرن د-ئخدّامن ن-ئغرّوبا د-ئعطّارن ن-ئسكّين ن لبحر أد بدّين زݣ تّيساع،
18 أر سغويّون أر تّانّاين ݣ واݣّو ن لعافيت نّا ئسغوسان تامدينت،أر تّينين: «ماتّا تمدينت-اد ئݣان أم بابل، تمدينت تاخاتارت؟»
19 أر ݣّارن تاتشّا خف ئقرّا نسن، أر سغويّون أر تّرون أر كّاتن أݣجدور، أر تّينين: «أويهانّم، أويهانّم! أتامدينت تاخاتارت! نّاݣ طرّحن كول ئد باب ن-ئغرّوبا ݣ لبحر س-ئسكّين نّس غلانين! ئدّخ دغيا ئخلا ؤينّا ئلّان ديكس».
20 فرحات أييݣنوان د صّاليحين د-ئمازانن د لانبيا، ئدّخ ت-ئعاقّب ربّي خف ؤينّا اون تݣا.
21 ضارت ن-ؤينّا، ياسي يون ن لمالاك ئجهدن يون ؤژرو ئݣان أنشت ن-ئغرف ن ؤزري أخاتار ئݣريت ݣ لبحر، داي ئنّا: «س-امّ لجهد-اد أس تتّوݣر تمدينت ن بابل تاخاتارت، أها ؤر ت نتانّاي أبدا.
22 داي ؤسار دّين أد ديݣم سّغدن يي وينّا ئكّاتن لوطار ؤلا وينّا ئتّينين تيمديازين ؤلا وينّا ئكّاتن لغيطا ؤلا وينّا ئساوالن ݣ لبوق. ؤر ديݣم ئتّغيما شا ؤصنايعي ؤلا لهزّ ن ؤزري.
23 ؤسار ياد ديݣم ئتّاغ ؤسيدّ ن لفتّاشا، أها ؤسار ياد ديݣم ئتّيلي لحسّ ن-ئسلي د تسليت، ئدّخ ݣان ئعطّارن نّم ئخاتارن ن دّونييت، د تحرݣا نّم سّوفغن لݣنوس كول يي ؤبريد.
24 أها ديݣم أي توافين ئدامّن ن لانبييا د صّاليحين د وينّا ئتّونغن كول ݣ دّونيت».