تاوارجيت ن يوحنّا

تيخلي ن تمدينت ن بابل

‏1 ضارت ن-وياد، ئدّود غوري يون زݣ سبعا ن لمالايكا نّا غر لّان سبعا ن-ئغرّافن، ئنّاييي: «أورا أد-اش نعتخ ميمشي ئدّا ربّي أد ئعاقب تامدنيت تاخاتارت نّا ݣ-ئلّا لفساد نّا ئلّان تاما ن شايݣان ن-وامان.

‏2 فسدن أݣّيتس ئݣلّيدن ن دّونيت، سكرن ئمزداغ ن واشال س- شراب لّيݣ فسدن أم نتات.

‏3 داي ياسيييي لمالاك غر لخلا س لجهد ن رّوح ن ربّي. أنّايخ يوت ن تمطّوطّ تني خف يون ن لوحش أزݣّاغ. لوحش-اد ئغمس س-ئسماون ن لكفر، ئلين غورس سبعا ن-ئقرّا د عشرا ن واشّيون.

‏4 تامطّوطّ-اد تلسا لكسوت تازݣّاغت ئغلان، تلس ئزبيان ن دّهب د لجوهر ئغلان د أزرو ن لمعدن ئغلان. ييلي ݣ-ؤفوس نّس يون ن لكاس ن دّهب. ئعمّرن س-وينّا ؤر ئحلين د تيخّوت ن لفساد نّس.

‏5 أها ئتيارو يون ئسم خف تينرت نّس، أود يون ؤر ئسّين لمعنا نّس: تامدينت ن بابل تاخاتارت أيد ئݣان مايس ن تنفسادين د-ؤينّا ؤر-ئحلين ݣ دّونيت.

‏6 داي أنّايخ تامطّوط تسكر س-ئدامّن ن صّاليحين د-ئدامّن ن وينّا ئمّوتن خف عيسى. نتّا أنّايخت تعجبخ شايݣان.

‏7 داي ئنّايي لمالاك: «مّاخ ألّيݣ تعجبت؟ دّيخ أد-اش نعتخ سّر ن تمطّوطّ د سّر ن لوحش نّا خف تني، ونّا غر لّان سبعا د-يقرّا د عشرا ن واشّيون.

‏8 د لوحش نّا تانّايت ئلّا مشتيد أياد، دغي ؤر ئلّي. والاينّي ئدّا أد دّيالي زݣ وانو وار لحدّ، ئدّو غر أرواس. داي دّان أد تعجبن ئمزداغ ن واشال، وينّا مي ؤر تّوارين ئسماون نسن ݣ لكتاب ن تودرت زݣّوس تلّا دّونيت. أدّاي أنّاين لوحش ئس ئلّا. دغي ؤر ئقّيم، ماشان ئدا أد ياغول.

‏9 ئخصّا يي ميدّن تانژّي د-ؤنّلي حما أد فرون ئسكّين-اد: سبعا ن-ئقرّا ݣان سبعا ن تيشّاو نّا خف تقّيم تمطّوطّ، أها ئݣين ألتو سبعا ن-ئݣلّيدن،

‏10 تّوتين زّيكسن خمسا، ويسّ ستّا ئسول دا ئتنباض، ئد ويسّ سبعا ئسول ؤر دّيدّي. ماشان أدّاي دّيدّو، ئدّا أد ئقّيم شان شوي ن لوقت.

‏11 ئد لوحش نّا ئلّان مشتا أياد أها ؤر ئلّي دغي، ئݣا أݣلّيد ويسّ تمانييا، أود نتّا ئݣا زݣ سبعا أها ئدّا أد ئدّو غر أرواس.

‏12 ئد عشرا ن واشّيون نّا تانّايت، ݣان عشرا ن-ئݣلّيدن سولن ؤر دا تنباضن، ماشان دّان أد نبضن شان لوقت ئدروسن د لوحش.

‏13 د ويد مساسان ئنݣراتسن أد وشين يي لوحش لجهد نّسن د تنباطّ نّسن.

‏14 داي دّان ئݣلّيدن-اد أد نّاغن د-ؤعلّوش، ماشان أت تن ئرّو، ئدّخ ئݣا ربّي ن-ئد ربّي د-ؤݣلّيد ن-ئݣلّيدن، ميدّن-اد ئعزلتنيد، ئغراسن أها أر ت تتفارن س وولاون نّسن».

‏15 داي ئنّايي لمالاك ألتو: «أمان نّا تانّايت، تاما ن مي تقّيم تمطّوطّ تانفساتّ، لمعنا نّسن: مايد ئݣان شّعوب، مايد ئݣان تيربيعين، د مايد ئݣان لݣنوس د مايد ئݣان ألسيون.

‏16 ئد عشرا ن واشّيون نّا تانّايت د لوحش، دّان أد كرهن تامطّوطّ تانفساتّ. دّان أت تكشّضن، أدجّينت حژّوضي، تشّين أكسوم نّس أها سغوسنت س لعافيت،

‏17 ئدّخ ئݣا ربّي ݣ وولاو نّسن أد ݣين لموراض نّس أها مساسان أد ؤشين تانباطّ نّسن يي لوحش ألّ ئجرو واوال ن ربّي.

‏18 ئد تامطّوط نّا تانّايت نتّات أيد ئݣان تامدينت تاخاتارت ئتّنباضن خف ئݣلّيدن ن واشال».