16
سبعا ن-ئغرّافن ن-ؤحراق ن ربّي
1 داي سليخ يي يون ن-ؤغويّي أخاتار ئدّاد زݣ تادّارت ن ربّي، أر ئتّيني يي لمالايكا س سبعا: «دّويات نّغلات سبعا ئغرّافن ن-ؤحراق ن ربّي خف واشال».
2 أها ئدّو لمالاك أمزْوارو، ئنّغل أغرّاف نّس خف واشال. ميدّن نّا غر تلّا تماتارت ن لوحش أها أر تبنداقن يي لاصنام نّس، تّواوتن س-ئحبوبن خّانين وعرنين.
3 داي ئنّغل لمالاك ويسّين أغرّاف نّس ݣ لبحر، ياغول ئݣ أمّ ئدامّن ن-ؤمتّين. أها ئمّت كول أينّا ئدّرن ݣ لبحر.
4 داي ئنّغل لمالاك ويسّ شراض أغرّاف نّس خف ئسافّن د-ئغبولا ن وامان أها أغولن ݣان ئدامّن.
5 أها سليخ يي لمالاك اد نّا غر تلا تنباط خف ومان دا ئتّيني: «أربي غاس شݣّين أيد ئݣان أمقدّس، زݣ واهوّا تلّيد داد أها تلّيد دّيما داد، تݣيت لحقّ ئدّخ تحكمت س-ئمشيد.
6 وينّا ئنغان صّاليحين د لانبييا، توشيتاسن أد سون ئدامّن ئدّخ تن ستاهلن!»
7 داي سليخ يي يون ؤغويّي ئدّاد زݣ ؤسغرص دا ئتّيني: «يّيه، أمولانا، أربّي نّا ئغييْن يي مايد ئݣان شا! ئصحا لحكام نّك أها ئݣ لحقّ».
8 داي ئنّغل لمالاك ويسّ ربعا أغرّاف نّس خف تافوكت، ئتّمّوشاس أت تسغوس ميدّن س لعافيت نّس.
9 غوسن ميدّن س تاغوست ئحرّين، داي سيولن س ݣار أوال خف ربّي نّا غر تلّا تنباطّ خف لمصيبات-اد، والاينّي ؤر رين أد-اغولن غر أبريد ن ربّي أها ؤر قبيلن أد-اس ݣين لعزّ.
10 ئنّغل لمالاك ويسّ خمسا أغرّاف نّس خف لكرسي ن لوحش. داي تاغول تسّيلّس تݣلديت نّس. قّيمن ميدّن أر تّغژاژن ألسيون نسن س لحرّ.
11 رݣمن ربّي ن-ئݣنّا س لحرّ نسن د-ئحبوبن نسن، ماشان ؤر أغولن غر ربي زݣ ݣار ئسكّين نسن.
12 داي ئنّغل لمالاك ويسّ ستّا أغرّاف نّس خف واسيف أخاتار، ئسم نّس لفورات. أها قّارن وامان نّس حما أد ياغول أد ئݣ أبريد يي ئݣلّيدن ن تميزار نّا ئلّان ݣ تنيلا ن-ؤنقّر ن تافوكت.
13 داي أنّايخ شراض ن لارواح خّانين رويسن ئݣرا، فّغندّ زݣ ؤقمو ن لهيشت د-وقمو ن لوحش د-وقمو ن نّبي ن-ئحلّالن.
14 لارواح-اد ݣان وين شّياطين. دا تݣّين لموعجيزات أها أر تدّون غر ئݣلّيدن ن دّونيت كول، حما أت تن سمونن أد نّاغن ݣ واسّ أخاتار، ئݣان أسّ ن ربّي نّا ئغييْن يي مايد ئݣان شا.
15 ها نكّين أد ددّوخ، ئمشينّا ئتݣ ؤخوّان! أياعريت ن-ونّا ئفافان ئحضو ئعبان نّس، ئمشيد ؤر ئتدّو حژّوضي أها ؤر ئتحشّام أدّاي دا ديكس تراعان ميدّن.
16 أها سمونن لارواح ن شّياطن ئݣلّيدن ݣ-ؤدغار نّا مي تّينين س واوال ن-ئعيبرانييين "هرمجدّون".
17 داي ئنّغل لمالاك ويسّ سبعا أغرّاف نّس ݣ-يݣنّا. أها ئفّغدّ يون ؤغويّي أخاتار زݣ لكرسي نّا ئلّان ݣ تادّارت ن ربّي، أر ئتّيني: «هاتين ئشمّل!»
18 داي وتن ؤسمان، كّرن ئغويّان، سيولنت تݣناو أها ئوّت يون ن-زّلزال أخاتار نّا ؤر دجّين ئكّي أم نتّا ݣ دّونييت زݣّوس لّان ميدّن خف واشال.
19 أها تبضو تمدينت تاخاتارت خف شراض ن-ئمورن، داي تّوتينت تمدينين ن لݣنوس، ئد تامدينت ن بابل تاخاتارت ؤر تيتّو ربّي حما أد-اس ئسّو لكاس ئركّمن س شّراب ن ؤحراق نّس.
20 داي رولنت تݣزيرين كول نسنت أها ؤر قّيمن لعواري.
21 داي ياتّويد زݣ ئݣنّا خف ميدّن تّبروري أخاتار ئژّاين، لعبار ن يوت ن تاتبروريت أتّاين خمسين ن كيلو. أها كفرن ميدّن س ربّي خف نّيرت ن تيتي ن تّبروري، ئدّخ توعر تيتي نّس شايݣان.