22
1 فّير-اس ئنعتييي لمالاك يون ن واسيف ݣ لّان وامان ن تودرت ئسفليلّين، ݣين أم لبنّار. ئفّغدّ واسيف زݣ لكرسي ن ربّي د-ؤعلّوش.
2 أها أر ئتّازّلا ݣ وامّاس ؤبريد ن تمدينت لقدس توجديت. د-ؤسكلو ن تودرت ئمغيد ݣ-تاميوين ن واسيف، أر ئتّارو لغلت يوت ن لمرت ݣ وايور، تناعش ن تيلمرت ݣ-ؤسݣّاس. أر جّوجوين وافريون نّس ميدّن كول ن مايد ئݣان تامازيرت.
3 ئد سّخض ؤر ئدّي أد ييلي ݣ تمدينت أبدا. أد ديكس ييلي لكرسي ن ربّي د-ؤعلّوش. د ميدّن نّا أر تتفارن ربّي دّان أت تعبدن،
4 دّان أد-انّاين ؤدم نّس، د-ئسم نّس أد ئتواري خف تينار نسن.
5 أها ؤر ئتّيلي ئض دينّا، ؤر دّين أد رزون أسيدّ ن لفتّاشا نغد أسيدّ ن تافوكت، ئدّخ ئدّا مولانا ربّي أد غيفسن ئسيدّ. أها دّان أد نبضن خف وابدا.
لمسيح ئدّا أد دّياغول
6 داي ئنّايي لمالاك: «ئواليون-اد لحقّ د ستيتّ أيد ݣان، د مولانا نّا ئݣان ربّي ن لانبييا صّالحين يوزندّ لمالاك نّس أد ئسنعت يي ئسمغان نّس مايد ئدّان أد ئجرو دغيا.
7 داي ئتّني عيسى: ها يي دّيخ أد ددوخ فيمرّا. أياعريت نّس يي ونّا ئتضاعن ئواليون ن لانبييا نّا ئلّان ݣ لكتاب-اد».
8 نكّ يوحنّا، سليخ أها أنّايخ أياد. ضارت ماي سّفلدخ أها أنّايخ، تّوتّيخ خف ئفادّن ئنو دات ن-ئضارن ن لمالاك نّا أر يي ئتّنعاتن أياد، حما أت تعبدخ.
9 ماشان ئنّايي: «غوراش أد تݣت أياد! ئدّخ ݣيخ ئسمغ أم شݣّين د-امّ أيتماش لانبييا د وينّا ئتضاعن ئواليون ن لكتاب-اد، بندق غاس يي ربّي».
10 داي ئنّايي ألتو: «أد-ؤر خزّن ئواليون ن لانبييا نّا ش ئسنعت ربّي ݣ لكتاب اد، ئدّخ تدجّاور لوقت أد جرون ئسكّين-اد كول.
11 د ونّا ئتݣّين تيخّيت أد ئتامّا ݣ تيخّيت نّس، د ونّا ؤر-ئحلين أد ئتامّا ݣ ؤينّا ؤر-يحلين، د ونّا ئتݣّين لحقّ أد ئتامّا ݣ لحقّ، د ونّا ئݣان أݣرّام أد ئتامّا أد ئݣ أݣرّام.
12 داي ئتّني عيسى: هايي دّيخ أد ددوخ فيمرّا، ئلينت تغراض ئنو أݣّيدي حما أد خلّصخ يي كو يون خف ؤينّا ئݣا.
13 نكّين أيد ئݣان لّيف د لييا، ݣيخ تيزويري د تينݣيرا د-ؤمزوارو د-ؤنݣّارو».
14 أياعريت ن وينّا ئتݣّين أينّا ئتّيني ربّي حما أد غورسن ييلي لحقّ ݣ-ؤسكلو ن تودرت أها كشمن غر تمدينت زݣ لبيبان نّس.
15 ئدّخ ݣ برّا ن تمدينت دا تّيلين غاس ئضان د أيت تحرݣا د لفساد د وينّا ئنقّان د وينّا ئتّعبادن لاصنام د وينّا ئسحيلّيلن أها أر تّيرين ئحلّالن.
16 داي ئتّني عيسى: «نكّ ؤزنخ لمالاك ئنو حما أد-اون ئشاهد خف ئسكين-اد ݣ ئݣراون ن ئمومن. نكّين أژور ن داود د ترّيكت نّس. نكّين ئتري أسفاقّاس ن تيفاوت».
17 رّوح ن ربّي د تسليت دا تّينين: «أورا!» د ونّا ئسّغادن أد ييني: «أورا!» د ونّا ئنغا ئريفي أد دّيدّو، د ونّا ئران أد ئسو أمان ن تودرت ؤر ئتخلاّص شا.
أنݣّارو ن واوال
18 غوراون، ها نكّين دا تشاهادخ دات ن كو يون نّا ئسّغادن يي ئواليون ن لانبييا نّا ئلّان ݣ لكتاب-اد، مش ئلّا ونّا ئزايدن خف ئواليون ن لانبييا، أد غيفس ئزايد ربّي لمصيبات ئتّوارين ݣ لكتاب-اد.
19 نغد مش ئلّا ونّا ئكّسن شا زّيكسن، ربّي أد ئكّس أمور نّس زݣ ؤسكلو ن تودرت د زݣ تمدينت ن ربّي د زݣ ؤينّا يورين ݣ لكتاب-اد.