5
أياعنداكن أوينّا ئطّرحن
1 أييمطرحن، روياث أها ثسغويم خف ثمارا د ؤهوّل نّا غورّون ديتدّون.
2 هان أينّا كول غورّون ئلّان ئخمج د-يعبان نّون نّا ئژيل تثشاثن تّونيا.
3 دّهب د لفضا نّون صدّان. ئدّا صدا نسن أد ئݣ شّاهد غيفون أها ئتش أكسوم نّون أم لعافيت. هان كونّي ثسمونم لكنز ݣ ؤوسان ئنݣورا!
4 د لكنز-اد نّا تجمعم زݣ تغراض نّا ؤر تشيم يي يشوّالن نّا ئيمݣرن ئݣرانّون. داسغويّونت، ئد ئغويّان ن-ئيشوّالن ئسلاياسن ربّي ئغين يي كولشي.
5 ها كني ثعيشم ݣ ؤطرّح د لهنا، ثبرعم ݣ دونيثا، أمي دا ثسعلافم ئخفاون نّون يي واسّ ن ثغرصا.
6 د ونّا ؤر ئݣين شا ثحشمم غيفس أها ثنغيمث. ؤر داون ئترارا أفوس.
صبر د تزالّيت س ليمان
7 كنّي أيايثما، صبراث ثݣونيم أعايد ن ربّي. حقّاث أحرّاث ئتݣانّان أشال أداس ئيش لغلت ئيغلان. ئصبر خف ؤينّا ئزرع أد ئسو زݣ ؤنژار ن لخريف د تفسا.
8 صبراث أود كونّي أها تعمّرم ؤلون نّون س-ؤعايد ن لمسيح نّاد يقربن.
9 أيايثما، أد ؤر تمشتكيات ئنݣراتون حما أد ؤر غيفون ئيتّوحشم. ثݣيم ݣ لبال نّون ديما، هاثين ئلّا بولحشام داث ن لباب.
10 ݣاث أيايثما أم لانبيا سيولنين س-ئيسم ن ربّي، تّوعدبن أها صبرن.
11 هاتين دا نتّيني: «أياعري نسن يي وينّا صبرنين!» هاثين تسلّام خف صبر ن سيدنا أَيُّوب، تانّايم ئس ديكّا ربّي تسݣا نس ݣ ؤمݣارو. ئدخ ربّ ثوسع رحمث نّس.
12 داث ن كولشي، أيايثما، أد-ؤر تݣالاث لا س-ئݣنا، لا س واشال، ولا س-أود ياث ن تݣالّيت ياضن. ئيخصا أد ئيݣ واوال نّون "يّيه" مش ئݣا "يّيه" نغد "لا" مش ئݣا "لا" حما أد-ؤر غيفون ديرس لحكام ن ربّي.
13 مش ديݣون ئلا ونّا ئيمرثن. ئژّال. مش ديݣون ئيلا ونّا ئيفرحن. ئسبّح يي ربّي.
14 مش ديݣون ئلّا شان يون ياغث شا، أد ئغر يي ئمغار ن ثدّارث ن ربّي. أد ژالّن زݣ لجيهت نس أها دهننث س زّيث س-ئسم ن ربّي.
15 ئدخ ثاژالّيت س ليمان دا تجّوجّوي أموضين. أر غيفس ئتّعفو ربّي. ئد ئس تياغ شا س شا ن لمعصيت نّا ئݣا، دا س-ئتسامح ربّي.
16 ئخصّا أتمقرّام ئنݣراون س دّنوب أها ئيژّال شا خف ثنيلا شا ديݣون، حما أدجّيم. هاثين أداي ئژّال يوك ئتّاقان ربّي. دا ئتسلا ربّي يي تژالّيت نّس.
17 ئكّا يون ؤرياز إسمنّس إيليّا، ئݣا بنادم أم نكني، ئژّال ئتراس يي ربّي أد ؤر ئكّاث ؤنژار أها ؤر دجّين توثي س-أود يوث ن ثمقّيت ن-ؤنژار شراض ن ئسݣاسن د ستا ن وايور.
18 ئعاود ئژال، ئشد ربّي أنژار أليݣ ئشايض أها ئشد واشال لغلت نّس.
19 أيايثما، مش يوشكا شا ديݣون خف ؤبريد أها ئرارت وايض غر لحق.
20 ئخصّا أتّيسينم ئد ونّا ئروران ونّا ئفّغن أبريد، هاثين ئفوكّاث زݣ لموت، ئستر شيݣان ن لمعصيّاث.