2
رويساث لماسيح
1 داي مشد سثيتّ داون ياكّا لماسيح لجهد، أراون ثاكّا ثايري نّس زّعامث، أها يزديكون رّوح ن ـ ربّي، د ـ مش سثيتّ ثلّا ديݣون شان ثاسا د ـ رّحمث،
2 ئوا سّفرحاثي ؤݣار أدّاي ثمساسام ئنݣراثون، أر تّمييريم ئنݣراثون، د ـ أدّاي ثݣيم أمّ يوكّ ييلي غورون يان رّاي.
3 أد ؤر تݣّاواث أود ئميقّ س ـ ؤمّنزاغ نغد س ـ ثحرفشث؛ أد ؤر ؤرزّوياث أد تسخاثارم س ـ ئخفاون نّون، ماشان تّحاساباث وييّاض ئيس كون ؤفن.
4 أد ؤر تتّاوياث غاس ݣ ـ ؤينّا كون ئتّنفاعن كونّي ماشان أود ݣ ـ ؤينّا يتّنفاعن وييّاض.
5 ئخصّاياس ئي وݣراو ن ـ ئمومنّ أد تخمّامن ئمشينّا دا يتخمّام لماسيح:
6 نتّا يكّا زݣ ثيزويري يݣا كّيف كّيف د ـ ربّي،
ؤر ئنّي ݣ ـ ئخف نّس هان أمساسا نّس د ـ ربّي ئݣا غورس شا نّاݣ ئتشبّار،
7 ماشان ئزري س ـ لخاضر نّس أنسا ن ـ لعزّ حما أد ئيݣ ئخف نّس كّيف كّيف د ـ ئسمغ،
ياغول ئݣا أمّ بنادم. داي لّيݣ ياغول ئݣا بنادم،
8 ئسّمژيي س ـ ئخف نّس أها يضاع ربّي أر لموث، أود لموث خف ئحنيݣن ن ـ ؤطّورق.
9 خف ؤياد، ئسّيليث ربّي غر أنسا ن ـ لعزّ أنافلّا كول، أها يوشاس ئسم نّا غر ثلّا ثنباطّ نّا يوݣرن ثين ييسماون كول
10 حما كّو يوكّ ݣ ـ ئݣنوان د ـ خف واشال د ـ دّاو ن ـ واشال أدّاي يسلّا ئي ييسم ن ـ سيدنا عيسى أد ئوث خف ئفادّن نّس.
11 د ـ كّو يوكّ أد ئبرّح س ـ ؤقمو نّس ئيد سيدنا عيسى لماسيح أيد ئݣان مولانا، حما أد ئتّوسّمغر ربّي يبّاثنخ.
سّيدّاث أمّ ئسيدّن ݣ ـ دّونيث
12 ئوا أيايثما د ـ ئسثما يعزّين، ئمشينّا ديݣون ثلّا طّاعث كّوياسّ لّيݣ لّيخ أݣيدون، ئخصّا أديݣون ثيلي ؤݣار دغي ݣ ـ ؤر لّيخ أݣيدون، ثݣيم ثامسّومانث أتّسباينم لغلّث ن ـ ؤفوكّا نّون، أر تݣّدم ربّي أر زّيكس تّرݣيݣيم،
13 ئدّخ ربّي أي دا يخدّمن ݣ ـ وولاون نّون حما أتّيريم أها ثيغيم أتݣيم أينّا ثيتّرضون.
14 أد ؤسار تݣمݣيماث ؤلا ثمياماژم ثاغنّانث خف مايد ئݣان شا،
15 حما أد ؤر كون ئتّلامّا أود يوكّ خف شا أها ثزديݣم، ثݣيم أراو ن ـ ربّي ݣ ـ ؤر ئلّي أود يان لعيب ݣ ـ وامّاس ن ـ يان لجيل أنفراراغ ئفّغن أبريد ن ـ ربّي. أها أر ثسّادّام ئنݣراتسن أمّ ئسيدّن ݣ ـ دّونيث،
16 أراسن ثسنعاثم أوال ن ـ ثودرثa حما أد ئي يبورز ݣ ـ واسّ نّاݣ ديتّاغول لماسيح ئدّخ ؤر ؤزّليخ ؤلا وثخ ثامارا باطّل.
17 ليمان نّون د ـ لخدمث نّس ݣان أمّ ثمغروصث ئي ربّي، داي مغار تّونّغلان ئدامّن ئنو أمّ وامان ن ـ واضيل خف ثمغروصث أد، هاثين أد فرحخ أها سّفرحخكون أݣيدي كول نّون.
18 ئوا أود كونّي يخصّاياون أتّفرحم ئمشيد أها ثفرحم أݣيدي.
بولوس د ـ ئسمونّ نّس
19 هاثين مّور ؤفيخ أداون نّازنخ ثيموثاووس دغيا مش ئرا مولانا عيسى حما أدّاي ييسينخ مايد أون ئݣا لحال أد ئهنّا لخاضر ئنو أود نكّين زݣ ثنيلا نّون.
20 ئدّخ ؤر غوري يلّي أود يوكّ نّاون ئتّاسين أنزݣوم س ـ وول نّس أمّ نكّين غاس نتّا.
21 هاثين وييّاض ضنين كول دا يورزّون غاس نّفع نسن ؤر ئيد أينّا يرا سيدنا عيسى لماسيح.
22 ئيد ثيموثاووس، هان كونّي س ـ ئخفاون نّون ثلّام ثسّنم مايد ئواثا، ئدّخ هاثين ئخدم أݣيدي ݣ ـ ؤبرّح س ـ ئنغميسن ژيلنين ئمشينّا دا يتݣّا ممّيس ئي يبّاس.
23 مّور ؤفيخ أدوان ثينّ أزنخ ݣ ـ وانسا، غاس دا تّراعاخ ماس ثفرا دّعوث ئنو.
24 ماشان ؤمنخ ݣ ـ ربّي ئيس دّيخ أود نكّين س ـ ئخف ئنو أنّدّوخ غورون دغيا.
25 ئميل نّيخ ݣ ـ ئخف ئنو يخصّا أداون نّرارخ بعدا ݣماثنخ أبافروديتوس نّا ييد ثوزنم أد ئي يسعاون ݣ ـ ؤينّا يي يخصّان. هاثين ئݣا ياسمون ئنو ݣ ـ لخدمث ن ـ ربّي أها يبدّ أݣيدي أمّ ؤعسكري.
26 ئدّخ ئي ثينغا ومارݣ نّون كول نّون أها يطيّراس ئدّخ ئسّن ئيس ثسلّام ئيس ئكّا ياغث شا.
27 هاثين ئكّا ياغث شا ألّيݣ ييوض لموث، ماشان ئحنّا ديكس ربّي، أها يحنّا ديݣي أود نكّين حما أد ؤر ئي يتّزاياد مشرضول مش ئمّوث.
28 أياد أخف ريخ شايݣان أداون ثينّ أزنخ حما أدّاي تّانّايم أتّفرحم ديخ، د ـ نكّين أد ئي يدروس مشرضول.
29 ئوا يخصّا أد ئيسّ ثرحبم س ـ شايݣان ن ـ ؤفراح ئمشينّا واثان ئمومنّ س ـ مولانا، أها ثسّمغورم س ـ وينّا ݣانين كول أمّ نتّا.
30 ئدّخ هاثين ألّيݣ ييوض لموث خف لخدمث ن ـ لماسيح، ئيݣ ثودرث نّس ݣ ـ لخاطار حما أدّيدّو أد ئي يݣ أينّامي ؤر ثوفيم كونّي أد ئي تّݣيم.