ثابراتّ ن ـ ؤمازان بولوس ئي يمومنّ ن ـ ثمدينث ن ـ فيليبّي
1
سّلام ن ـ بولوس
1 ثابراتّ أد زّيݣي نكّين بولوس د ـ ثيموثاوس ݣانين ئسمغان ن ـ سيدنا عيسى لماسيح، نوزناونتّين أوينّا ݣانين كول وين ربّي، وينّا زدينين د ـ سيدنا عيسى لماسيح، كونّي نّا يلّان ݣ ـ ثمدينث ن ـ فيليبّي، س ـ ئخاثارّ ن ـ ؤݣراو نّون د ـ ئنبدادن نّس.
2 أداون ئوش ربّي ئبّاثنخ د ـ مولانا عيسى لماسيح رّحمث د ـ لهنا.
ثاژالّيتّ ن ـ بولوس زݣ ثنيلا ن ـ ئمومنّ ݣ ـ فيليبّي
3 هاثين دا تّحمادخ ئي ربّي نو غيفون داكّ مانيݣ كونيد شثيخ.
4 د ـ ديما ݣ ـ ثژيلّا نو كول، داس تتّرخ ئي ربّي غيفون كول نّون س ـ ؤفراح،
5 ئدّخ ثامّوم أݣيدي ݣ ـ ؤبرّح س ـ ئنغميسن ژيلنين زݣ واسّ أمزوارو نّاݣ ثومنم أر دغي.
6 د ـ نكّين سّنخ ئيس ؤر ئلّي شّكّ ݣ ـ ؤياد: ئيد ربّي نّا ديݣون ئسفالّن لخدمث أد ئژيلن ئقّانثينّ أد ديكس ئزايد أرد ئي تّيشمّل ݣ ـ واسّ نّاݣ دّيتّاغول سيدنا عيسى لماسيح.
7 هاثين غوري لحقّ أد أشيخ د ـ ؤياد زݣ ثنيلا نّون كول نّون ئدّخ ثلّام ݣ ـ وول ئنو، كول نّون ثامّوم أݣيدي ݣ ـ لباركاث نّا يي يوشا ربّي، أمّ لّيخ ݣ ـ لحبس تّوشرفخ نغد دا تكّرخ خف ئنغميسن ژيلنين أر ثنصّوحاخ.
8 هان ربّي يݣا غيفي ئنيݣي ئيس ئي ينغا ومارݣ نّون كول نّون عنوݣّا، أر كون تّيريخ زݣ وول ئنو ييمشينّا دا كون ئتّيري سيدنا عيسى لماسيح.
9 أر ثژلّاخ ئي ربّي زݣ ثنيلا نّون أتعدّو ثايري نّون ؤݣار د ـ ووݣار، أها ثيغيم أتّيسينم ثفروم مايد ئݣان شا،
10 حما أتّيغيم أتّاكزم أينّا يوفن كول، داي ثزديݣم ؤر غيفون ئتّيلي أود يان ؤلامّا حما أتّوجيدم ئي واسّ نّاݣ ديتّاغول لماسيح.
11 أها أر تݣّام ݣ ـ ثودرث نّون غاس أينّا يصلحن نّا ديكّان زݣ غر سيدنا عيسى لماسيح حما أد سّمغوران ميدّن س ـ ربّي أر ثتّحمادن.
ثودرث، لماسيح أي تّيݣان
12 دغي ريخ أتّيسينم أيايثما د ـ ئسثما ئيد أينّا غيفي يكّان ئسعاون ئي ينغميسن ژيلنين أد ساقّان ؤݣار،
13 ألّيݣ أغولن ئعسّاسن ن ـ ئغرم ن ـ ؤݣلّيد د ـ وييّاض كول سّنن ئس لّيخ ݣ ـ لحبس خف لماسيح.
14 د ـ ئمومنّ س ـ ؤماثا يزايد ليمان نسن ݣ ـ مولانا زݣّوس تّييمژخ ݣ ـ لحبس، أها ياغولن زعمن أد تبرّاحن س ـ واوال ن ـ ربّي ؤر دا تݣّدن شا.
15 سثيتّ، لّان ييتّس زّيكسن دا تبرّاحن س ـ ئنغميسين ژيلنين خف لماسيح غاس س ـ لحسد د ـ ؤمّنزاغ؛ ماشان لّان وييّاض نّا دا ييسّ تبرّاحنين س ـ نّيث ئصفان.
16 مشد ويد دا تݣّن أياد س ـ ثايري، ئدّخ سّنن ئيد ربّي أيد ئي يسثين أد تكّرخ خف ئنغميسن ژيلنين.
17 ئيد وينّ ضنين دا تبرّاحن س ـ ئنغميسن ژيلنين خف لماسيح غاس س ـ ومّنزاغ ؤر ئيد س ـ نّيث ئصفان، غالن ئيد أد ئغين أد ئي زايدن ثامارا دغي ݣ ـ لّيخ ݣ ـ لحبس.
18 ماشان أياد ؤر ديكس كّولخ، ماحدّ دا تبرّاحن كول نسن س ـ لماسيح أم س ـ نّيث ئصفان أمّ س ـ ݣار نّيث، د ـ ؤياد ئسّفرحي. أها دّيخ ألثو أد فرحخ ؤݣار،
19 ئدّخ سّنخ ئيس ئدّا وياد كول نّا غيفي يكّان أد ئي دّيرار أفوكّا س ـ لفضل ن ـ ثژيلّا نّون د ـ رّوح ن ـ سيدنا عيسى لماسيح نّا دا يي يسعاوانن.
20 هاثين ريخ س ـ وول ئنو أومي ؤر سار قصّيرخ ݣ ـ ؤينّا غيفي ئلّان، ماشان أد غوري ثيلي أود دغي زّعامث ثاخاثارث أمّ ثين كّوياسّ، حما أد ئتّومجّد لماسيح ديݣي أمّ دّرخ نغد مّوثخ.
21 ئدّخ ثودرث غوري نكّين لماسيح أي تّيݣّان، د ـ لموث لفضل أيد غوري ثݣا.
22 ماشان مش قّيميخ دّرخ، دّيخ أد ئغيخ أد زايدخ أد ݣخ لخدمث نّا ݣ ـ ثلّا لفايتّ، ئوا ما غا سثيخ؟ ؤر سّينخ ماي ريخ!
23 هاثين ؤشكيخ ئنݣراتسن س ـ سينّ: نكّين مّور ؤفيخ أد فّغخ دّونيث أد أها ييليخ د ـ لماسيح، ئدّخ أياد أيد يوفن ؤݣار،
24 ماشان غيفون كونّي، يوف ؤݣار مش قّيميخ دّرخ.
25 داي دغي ݣ ـ ؤر غوري يلّي شّكّ ݣ ـ ؤياد، سّنخ ئيس دّيخ أد قّيمخ دّرخ، أها ييليخ أݣيدون كول نّون أكون سعاونخ أتّمغورم ݣ ـ ليمان ييلي غورون ديكس ؤفراح.
26 د ـ س ـ ثوادا نّا غا نّݣخ غورون ديخ ألثو ثدّام أتّزايدم أداون ئبورز س ـ سيدنا عيسى لماسيح.
27 غاس ئخصّاياون أتّيديرم يوث ن ـ ثودرث ئݣان منيد ن ـ ئنغميسن ژيلنين ن ـ لماسيح. داي أمّ دّيخنّ غورون أكون أنّايخ نغد ئي دّيوضن ئنغميسن غيفون، دّيخ أد ئسينخ ئيس ثزݣّام ثݣيم أمّ يوكّ، أها أر تكّرم كول نّون خف يان رّاي نتّا ليمان نّا يلّان ݣ ـ ئنغميسن ژيلنين.
28 أد ؤر تݣّداث وارضاراس زݣ وينّا كون ݣانين د ـ ئنضليبن نسن، هاثين زّعامث نّون ثدّا أداسن ثيݣ ثماثارث ئيس دّان أد دّون س ـ أرواس، ئيد كونّي أداون ئيݣ ثاماثارث ئيس ثدّام أتفوكّام، د ـ ؤياد زݣ ربّي.
29 ئدّخ ثوكّي ن ـ ربيّ ؤر ئيد غاس أتّامنم س ـ لماسيح، ماشان أود أكون يادّج أد غيفس ثتّوكرفصم.
30 داي ثامّوم أݣيدي ݣ ـ ئمنغي نّا يي ثنّاينم أر ثتّناغخ، أر تسلّام ئيس ديكس سولخ دغي.