15
مقبلات ئنݣراتكون
1 نكني نّاي مقّورن ݣ ليمان ئخصّاياخ أنصبر ئ ميدّن نّا ئضعفن ݣ ليمان، أد-ؤر نتقلّاب غاس خف ؤوينّا نرا.
2 ئخصّا كّو يون زّيݣنخ أد ئݣ لخير ئ يماس، حما أت-ئسمغور ݣ ليمان.
3 ئتّخ لمسيح ؤرئقلّيب غاس خف ؤينا يرا ئيخف نّس. والاينّي ئمش ئيتوارو ݣ لشتاب ن ربّي: «لمعيور ن وينّا أش ئعايرن، ئتّوتّيد غيفي».
4 ئد كول أينّا ئتيارون ݣ لشتاب ن ربّي زݣ تيزويري، ئتيارو حما أداخ ئعلّم ميمش ئتّيلي غورّخ رّجا س صّبر د ؤشجّع ئلّان ݣ لشتاب ن ربّي.
5 أرتتّرخ ئ ربّي نّا دا ياكّان صّبر د ؤشجّع، أتّمسسام ݣ رّاي ئنݣراون، ئمشينّا يرا عيسى لمسيح.
6 حما أتفم لعزّ ئ ربّي ئبّاس ن مولانا نّخ عيسى لمسيح، س يون ن وول د يون ييلس.
لخبار ئ لݣنوس ؤر ݣنين ؤداين.
7 مقبالات ئنݣراون ئمشيس كُن ئقبل لمسيح، حما أد ئتّوش لعزّ ئ ربّي.
8 أر-اون تّينيخ: هاثين لمسيح ئداد أديعاون ؤوداين، حما أد ئسضهرئد ربّي ئقّيما ݣ واوال نّس. أها ئسّوفو س ئد لعاهد نّا ئشا ربّي ئ لاجدود نّسن،
9 حما لݣنوس ؤر ݣينين ؤداين أد وشن لعزّ ئ ربّي خف رّحمت نّس، ئمشينّا ئتيارو ݣ لشتاب ن ربّي: «خف ؤينّا أس داك تحمادخ أربّي ݣ واماس ن لݣنوس، أرتهلالخ س-ئسم نّش».
10 أرئتيني ربّي ݣ لشتاب نّس ألّو: «فرحات ألݣنوس ياضنين د شّعب نّا ئختار ربّي».
11 أر ئتّيني لمرت ياضنين: «سبحاث ئ ربّي ألݣنوس كول، أها توشماس لعزّ أميدّن كول».
12 أود نّبي إِشَعْيَاء دا ئتّيني: «ئدّا أد ئدّو يون زݣ ترّيكث ن يَسَّى، نتّا أݣ دان أد ئحكم خف لݣنوس ؤر ݣنين ؤداين أها ݣن ديكس رّجا نّسن».
13 دا تتّرخ ئ ربّي نّا ياكّان رّجا، أكون ئعمّر س لفراحيث د لهنا خف ليمان نّون، حما رّجا نّون أد ئمغور س جّهد ن رّوح لقدوس.
14 أيايتما، نكّين س-ئيخف ئنو ئلّا غوري ليقين زݣ لجيهت نّون ئس تعمّرم س لخير، تيلي غورّون توسنا كول ئس ثيغييم أت تمنصاحم.
15 والاينّي أروخاون س-زعامت خف شان ئسكّين حما أكون فكّرخ ئسّن، خف نّعمت نّاي ئشا ربّي،
16 حما أد خدمخ غر عيسى لمسيح خف لحساب ن لݣنوس ؤر ݣينين ؤداين، أر تݣّاخ لخدمت ن يون ؤرياز ن ربّي ئتبشّارن س لينجيل حما لݣنوس ياضن أد-اغولن أد ݣين يوت ن توكّي ئتّوقبل تقدس غر ربّي س رّوح لقدوس.
17 ئد ݣ لمسيح عيسى هاتين غوري لحقّ أد تعنّاخ س لخدمت ئنو ئ ربّي.
18 أها ؤر تّيغييخ أد سيولخ خف شا ن-ئسكّين من غير ئسكّين نّا ئݣا لمسيح ݣ ئفاسّن ئنو، حما لݣنوس ؤر ݣينين ؤداين أد ضاعن ربّي س واوال د لفعايل،
19 د س جّهد ن تميتار د لموعجيزات د جّهد ن روح ن ربّي. نكّين شمّلخ كول أبشّر س لينجيل ن لمسيح، زݣ تمدينت ن لقدس د تمناضين نّس أر تمازيرت ن تمدينت نّا مي دا قّارن: "إِلِّيرِيكُون".
20 أها أر تّيريخ دّيما أد بشّرخ س لينجيل ݣ وانّسيون نّا ݣ ؤر سلين ميدّن خف لمسيح، حما ؤر-بنّوخ خف لسّاس نّا ݣان ميدّن ياضن.
21 س-ؤياد ييخ أينا ئنا لشثاب ن ربّي: «وينّا ؤر ييويض لخبار نّس، دّان أتنّاين، ئد وينّا ؤر سلّينين غيفس دّان أتفهمن».
22 ئتّخ س-وياد ؤرغييخ شيݣان ن تيكّال أد غورون ندّوخ.
23 دغي شملخ لخدمت ن ربّي ݣ تمناضين-اد، والايني ئنغايي ليقناض ريخ أندوخ غورون مشتا أياد.
24 أر تمنّاخ أكون أنّايخ ݣ-ؤبريد ئنو، أدّاي ئريخ أدّوخ غر إسْبَانِيَا، أها ثعاونمي أندّوخ غر دّيس زّريخ أݣيدون شان لوقت واخّا تدروس.
25 والاينّي دغي هايي دّيخ ݣ ؤبريد غرتمدينت ن لقدس حما أد عاونخ أيتما ئمومن.
26 ئتّخ ئمومن ن تمازيرت ن مَكِدُونِيَّا د أَخَائِيَا فرحن أد عاونن ئمومن ئمژلاض ݣ تمدينت ن لقدس.
27 ئتّخ فرحن أثن عاونن، ݣ لحقّ ئلازم غيفسن أد ݣين أيا، ئتّخ مش ؤمژن لݣنوس ؤر ݣنين ؤداين لباركات ن رّوح زݣ ئمومن ن لقدس أود لݣنوس ؤر ݣنين ؤداين ئخصّياسن أت تن عاونن س لباراكات ئتهمّان دّات.
28 أدّاي شمّلخ لخدمت-اد، سّيوضخن أياد نّا س ثن عاونن أيتماتسن، أدن زريخ غورون أدّاي ندّوخ ݣ-ؤبريد ئنو غر اسْبَانْيَا.
29 هاثين سّنخ ئد أدّاي غورون ندّوخ، أد ئليخ عمرخ س لباراكات ن لينجيل ن لمسيح.
30 أرتتّرخ زيݣون أيا يتما، س مولانا نّخ عيسى لمسيح، د تايري ن رّوح أد جاهدم س توترا ئ ربّي غفي،
31 حما أد منعخ زݣ ئفاسّن ن ميدّن ؤر دا تّامنّين س لمسيح ݣ تمازيرت ن ليهوديّا، ثتّوقبل لخدمت ئنو ݣ لقدس غر أيتماتنخ ئمومن.
32 داي مش ئرا ربّي دّيخ أن ندّوخ س-ؤفراح أها سݣونفاخ غورون.
33 دا تتّرخ ئ ربّي نّا دا ياكّان لهنا أد ييلي أݣيدون كول نّون! آمين.