14
أدور حكم خف مدن ياضن
1 قبلاث ئنݣراون ونا ئيضعفن ݣ ليمان بلا أتحكمم خف رّاي نّس.
2 هاثين ئلّا ونّا ئمقور ݣ ليمان ئيغيي أد ئتّش زݣ ماݣان شا، ييلي ونّا ئيضعفن ݣ ليمان داي تّتا غاس لخوضرت.
3 ونّا داي تتّان كولشي، ؤر-اس ئخصّا أد ئحقّر ونا داي تتّان غاس لخوضرث، ئد ونّا داي تتّان غاس لخوضرث ؤر-اس ئخصّا أد ئحكم خف ونّا داي تتّان كولشي، ئتّخ ربّي ئقبلت.
4 ماي تمست شݣ أتحكمث خف ؤخدّام ن يون ياضن؟ مش ئتبت، نغد ياتّوي، أياد شغل ن باب نّس، والاينّي ئدّا أد ئتتبت ئتّخ ربّي ئغيي أتّيستبت.
5 غر ئتس ن ميدّن، شان-ووسّان خاترن ؤݣار ن-ؤسّان ياضن، غر ميدّن ياضن، ؤسّان كول ݣان كيفكيف. ئوا كو يون ئخصّاص أد ئوكد ئس ئصحا ؤينّا ݣ لعقل نّس.
6 ونّا داي ئسمغور س شا ن واس، دا ئتݣّا أينّا حما أد ئݣ لعزّ ئ ربّي. ئد ونّا ور داي سمغور س شان واس أود نتا دياك لعزّ ئ ربّي، ئد ونّا دا ئتتّان كولشي أود نتّا دا ئتشكار ربّي، ئد ونا داي تتان غاس لخوضرث أود نتا داي تشكار ربّي.
7 ئتّخ أود يون زييݣنخ ؤر داي تعيش ئ ئخف نّس، د أود يون ؤردا ئتمتات ئ ئيخف نّس.
8 ئتّخ مش نعيش لنتعيش ئ ربّي، ئد مش نمّوت دا نتّمتات ئ ربّي: مش نعيش نغد نمّوت، هاثين نكني وين ربّي أينݣا.
9 خف ؤياد ئمّوت لمسيح، أها ئكّرد زݣ لموت ئحيو، حما أد-ئݣ مولانا ن وينّا مّوثنين د وينّا دّرنين.
10 والاينّي شݣين، مّاخ ألّيݣ دا تحكّمت خف ؤماش؟ د شݣّين مّاخ ألّيݣ دا تحقّارت ؤماش؟ ندّا كولنّخ أ نبدّ دات ن ربّي حما أد غيفنخ ئحكم.
11 ئتّخ ئتّيارو ݣ لشتاب : «نكّين ربّي نّا ئدّرن، دا تݣالّاخ ئد كّو أفود ئدّا أد ئسجد داتي د كّو ئلس ئدّا أد ئقرّا ئد نكّ أݣّان ربّي».
12 س-ؤياد كّو يون ديݣنخ ئدّا أد ئشف لحساب خف ئخف نّس دات ن ربّي.
13 ئوا ؤر-اخ ئخصّا أنتّمحكام ئنݣراخ، والاينّي حكماث س-ؤيا: ؤر ئتݣّا شان يون لعثرث ئيماس ولا ئسببّاس ݣ دنّوب.
14 نكّين سّنخ أها حقّاخ زݣ مولانا عيسى، ئس ؤر ئلّي شان ؤسكّين ئحرمن زݣ-ئخف نّس. والاينّي داي تّيلي ئحرم غر ونّا دا ئتّينين ݣ-ئخف نّس ئس ئحرم.
15 مش ئلّا شان ؤماش دا ئتحراق س-سباب ن شان ؤتشي نّا دا تّتاث، هاثين ؤردا تدّوت ݣ-ؤبريد ن تايري. أها ؤر ئخصّا س-ؤتشي نّش أتسببث ݣ ؤهلاك ئ ونّا خف ئمّوت لمسيح.
16 ئوا أد ؤر تّادجات ميدّن أد ئنين ݣارأوال خف ئسكّين نّا دتنّايم زيلناون.
17 ئتّخ تاݣليت ن ربّي ؤر ئد نتّاث أݣان ؤوتشي د تسّي، والاينّي نتّاث أݣان صّلاح د لهنا د لفراحيث س-رّوح لقدوس.
18 ونّا دا ئ خدّمن ئ لمسيح لخدمت-اد، هاثين لمرضي أݣا غرربّي أها ئتّوقبل غر ميدّن.
19 ئوا ئخصّاخ أنقلّب خف ئسكّين نّاخ د-ئتّاوين لهنا، د ئسكّين نّاخ ئسّمغورن ݣ ليمان.
20 أد ؤرهدّم لخدمت ن ربّي س سّباب ن-ووتشي، ستيت ؤتشي كول ئحلّا. والاينّي ؤر ئغودي أد ئتش شا يون شان لحاشت ئ تݣّان لعثرت ئ وايض.
21 يوفاش مش ؤر ثتشيث أكسوم ولا تسويت شّراب ولا تݣد شان ؤسكّين نّا ئتادجان ؤماش أد ئتوتي ݣ دّنوب.
22 ئد ليمان نّش أدجث ݣراش د ربّي، أياعريت نّس ئ ونّا ؤر دا ئتلّاما ئخف نّس ݣ ئسكّين نّا دا ئتانّاي غودان.
23 والاينّي ونّا غر ئلّا شّك ݣ ؤينّا داي تّتا، دا د ئتروس غيفس لحكام ن ربّي، ئتّخ ؤر دا ئتݣا أينّا زݣ ليمان، كول لحاجت نّا دا تݣات بلا ليمان هاثين دّنب أي تݣا.