13
طّاعث ئ-أيت تنبّاط.
1 ئخصّا كّو يون ديݣون أد ئضاع وينّا تنباضنين، ئتّخ ؤرثلّي شان تنباطّ غاس تنّا ديدّان زݣ ربّي، هان وينّا دا تنباضنين دغي، ربّي أيثن ئخثار.
2 هان وينّا دا خلافنين ئنبّاضن، دا تخلافن ثانباطّ ن ربّي، ئتّخ كول وينا تݣّانين أياد، دّان أد تّوعاقبن.
3 ئد وينّا تݣّانين لخير ؤر دا تݣّدن زݣ أيت تنباطّ، والاينّي ونّا ئ تݣّان تيخوث نتّا أدا ئتݣّدن زيݣسن، ئس ثريث ؤر تݣّتّ زݣ أيت تنباط؟ ئوا تݣّا لخير حما أك وقرن.
4 ئتّخ دا تݣّان لخدمت ن ربّي نّا ياش ئلا لخير. والاينّي مش دا تݣات تيخّوث، ئخصياش أت ݣّتّ! ئتّخ أيت تنباطّ ؤردا تعاقابن بلا سباب، س-ؤياد أس دا تݣّان لخدمت ن ربّي، أرئسضهار لغضب خف وينّا تݣّانين ئسكّين ؤرئحلين.
5 خف ؤيا ئلازماخ أنيلي داو ن وينّا تنباضنين، ؤر-يد غاس زݣ لخوف ن لغضب ن ربّي، والاينّي أود خف لحساب ن لخاضر.
6 أياد أخف دا تخلّاصم ضّريبا، ئتّخ أيت ضّريبّا دا خدّمن ئ ربّي أدّاي دا تݣّان لخدمت ئژيلن.
7 ئوا ؤشاث ئ كّو يون لحقّ نّس: خلصات ضاريباث كول ئ أيت ضّريبا، تخلصم ديوانا ئ أيت ديوانا، ثضاعم وينا ستاهلين طّاعث توقرم وينّا ستاهلنين لوقر.
مييرياث ئنݣراون
8 أد-ؤر غيفون ئتّيلي أود يون ؤمرواس ن شا ن يون، غاس أمرواس ن تايري نّا ئخصّان أتّيلي ئنݣراون، ئتّخ ونّا ئتّيرين ميدّن ياضنين، هاتين ئضاع شّرع ن ربّي كول.
9 ئتّخ لّانت لوصيياث دا تينينث: «أد-ؤر تّفساد، أد-ؤر نقّا أم لمجرم، أد ؤر تّاشر، أدور تشهاد زور، أد-ؤر تّيري أينّا ؤر ئݣين وينّش». ئد لوصيياث ياضن جمعنت ݣ يون ن-واوال: «ئخصّاش أت تيريث أدجار نّش أمشينّا دا تّيريث ئخف نّش».
10 تايري ؤردا تݣّا لعار ئ وادجار، س-ؤياد أس دا تشمّال تايري شّرع.
11 نيّݣ ن-ؤيا، كنّي تسنم لوقت نّاݣ نلّا، هاثين تيوض لوقت نّاݣ ئلازم أت تكّرم زݣ ؤنودّم، ئتّخ نّجا نّخ ياغول دغي ئقرّب زݣ واس نّاݣ نومن.
12 هان ئض ئدا علاين أد ئيشمّل ئد أسّ ئيقرّب أد يالي، ئوا ئلازم أن نكّس لافعايل ن تالّست، نلس سّلاح ن-ؤسيد.
13 ئخصّاخ أن نمون د ؤبريد ئمنان س لوقرأم ميدّن نّا ئلّان ݣ ؤسيد ن واسّ، نحضو ئخفاون نّخ زݣ شايݣان ن ووتشي د تسّي ن شايݣان ن شّراب، د لفساد، د-ئمنغان د لحسد.
14 والاينّي سلحاث س مولانا عيسى لمسِيح، أد ؤر سلهويات ئخفاون نّون ݣ شهوات ن دّات.