12
تودرت ثوجديت د لمسيح.
1 خف ؤياد أيايتما، ئدّخ-أخ ئرحم ربّي، دا زّيݣون تترخ أتفم دّات نّون ئ ربي أم يوت ن تمغروصت ئدّرن تݣ تامقدّست، أها ثتّوقبل غورس، ئمشيتخ أس تدّام أتعبدم ربّي زݣ ؤلاون نّون.
2 أد-ور تݣياث أم ؤوينّا دا تݣّان ميدّن-ن دّونيث-اد، والاينّي جدداث لعقل نّون حما أتبدلم، ثيسينم لموراض ن ربّي: أينّاي ژيلن، ئتّوقبل أها ؤر ديكس لعيب.
3 س لفضل ن نّعمت نّا يّيشا ربّي، دا توصّاخ كّو يون زّيݣون، حما أد يلي ئيرژن، ؤر ياكّا لقيما ئ ئخف نّس ؤݣار ن-ؤينّا ثيلازمن خف لحساب ن لقياس ن ليمان نّايشا ربّي ئ كو يون.
4 وخّا ئخلق ربّي شيݣان ن-لمفاصل ݣ دّات نخ، والاينّي ماشي كول نّسن دا تݣّان يوث ن لخدمت.
5 س-وياد وخّا نعدّا، هاثين نݣا يوث ن دّات ݣ لمسيح، نعايد نݣا لمفاصل ئنݣراتنخ.
6 كو يون ماس ئشا ربّي، خف لحساب ن نّعمت، ئلّا ونّا غر تّلا لموهبا ن-ؤنبّأ، ئخصّاص أد ئتنبّأ خف لحساب ن ليمان نّا غورس ئلّان.
7 ونّا مي ئشا ربّي لموهبا ن-ؤعاون، ئخصّاص أد-ئعاون، ئد ونّا مي ئشا ربّي لموهبا ن-ؤعلّم، ئخصّاص أد ئس علّم.
8 د ونّا غر تلّا لموهبا ن-ؤشجّع، ئلازمث أد-ئشجّع، ئد ونّا غر تلّا لموهبا ن توكّي أد ئيوش س سخاويث، ئد ونّا غر تلّا لموهبا ن-ؤحرّوي ئخصّاص أد-يݣ لمجهود نّس كول، ئد ونّا غر تلّا لموهبا ن رّحمت ئلازمث أد ئرحم س لفراحيث.
9 ئخصّا أتّيلي تايري نّون بلا نفاق، شرهات ثيخوث، ثامزم ݣ لخير.
10 مياراث ئنݣراون زݣ وولاون نّون أم واوماتن، ثوقّرم لغير نّون ؤݣار ن-ئخفاون نّون.
11 ݣات ئمحروشن أد-ؤر تݣات ئمعݣازن، تخدمم ئ ربّي س رّوح ئحران.
12 فرحات س رّجا نّا غورون ئلّان، تصبرم ݣ لمحاين، تژّالم دّيما.
13 عاونات ئمومن نّا ئحلادجّان، ترحبم س-ئبرانيين دّيما.
14 بارشاث وينّا دا ئتعدّان غيفون، بارشات، أد-ؤر تلعناث.
15 فرحاتد وينّا فرحنين، تروم د وينّا ترونين.
16 مساسات ئنݣراون، أد-ؤر ئتّيلي ديݣون لكيبر، والاينّي موناث د ميدّن تواضعنين، أد-ؤر تحاساباث ئخفاون نّون ئس غورون ثلا لحكما.
17 أد-ؤر تراراث لعار س لعار. تݣم لمجهود نّون أتݣم لخير دات ن ميدّن كول.
18 داي مش تغييم، ݣاث لهنا ئنݣراون د ميدّن كول.
19 أيايتما ئعزّن، أد-ؤر تّامژات لحقّ ئ ئخفاون نّون، أدجات ربّي أد يامژ لحقّ ئدّخ ئنّا ݣ لكتاب نّس: «نكّين أداي تّامژن لحقّ، د نكّين أداي يكّان ئ كّو يون أينّا ئستاهل!».
20 نغد «مش ئنغا لاژ أعدّاو نّش ؤشاس أد ئتش، مش تينغا ئريفي ؤشاس أد ئسو. ئتّخ مش تݣيث أيا أمي دا س تݣاد تيرݣين خف-ئخف».
21 أد-ؤر تّادجا تيخّوث أك ثرّو والاينّي رّو تخّوث س خير.