11
ؤر ئسامح ربّي ݣ شّعب نّس إسرائيل
1 ريخ أد كون سالخ : ئس ئسامح ربّي ݣ شّعب نّس؟ حاشا! ئتّخ أود نكّين زݣ أيت إسرائيل أيد ݣيخ، زݣ ئفسان ن ابراهيم ݣ تقبيلث ن بنيامين.
2 هان ربّي ؤر ئسامح ݣ شعب نّس نّائكّا ئختار زݣ ثيزويري. ئس ؤر تسّينم ماداي تّيني لشثاب ن ربّي خف نّبي إيليّا ألّيݣ ياشثكا غر ربّي خف أيت إسرائيل؟ ئنا:
3 «أربّي! نغان لانبيا نّش، هدمن ئصغراص نّش، قّيمخ غاس نكّين بوحدي أر ؤرزّون أد ئنغين».
4 والاينّي ماس ت-ئواجب ربّي؟ ئنّاياس: «هاتين ؤدجيخ ئ ئخف ئنو سبعالاف ن-ؤرݣاز نّا ؤر دجين ئسجيدن ئ لاصنام نا مي سمان: بعل.
5 هاثين أود ݣ لوقت-اد، سولن شان ميدّن دروسنين ئختارثن ربّي س سباب ن نّعمت.
6 مش تن ئختار ربّي س نّعمت هاثين ؤر-ئد خف لحساب ن لافعايل نّسن، نغد هان نّعمت ن ربّي ؤسار تݣي نّعمت. نغد مشد س لافعايل هاثين ؤر ثقيمي نّعمت، نغد هان لافعايل ؤسار يينث عاد لافعايل.
7 ماݣان لمعنى ن-ؤيا؟ أينّا خف كّان دا تقلابن أيت إسرائيل ؤر ثوفين، والاينّي وينّا ئختار ربّي ؤفان أينّا خف دا تقلّابن، ئد وينّا ئقّيمان قسحن ؤلاون نّسن.
8 ئمشينّا ئتيارو ݣ لشتاب ن ربّي: «يودجاتن ربّي هوان، ئشاسن ألّن ؤردا تّاناين، د-ئمجّان ؤر دا تسلّان أر أسّاد».
9 أود داود داي تّيني: «أداغولن زرادي نّسن أدݣين تازقّورت د شباكي د ئسلي ن لعترت د لعيقاب.
10 أها عمونت والّن نّسن حما-ؤر تانّاين، تعايد تاداوت نّسن تحودر أبدا».
أفوكّا ن لكنوس نّا ؤر كينين ؤداين.
11 دغي دا كون تسالخ: ئس توّت لعطرت ؤداين أد تّوتّين حما أد ؤرتكرن؟ حاشا! والاينّي لخاطا نّسن ييويد نّجا ئ لݣنوس ؤر ݣينين ؤداين، حما أتن حسدن ؤداين.
12 مش ئݣا لخاطا نّسن لباراكا ئتّغنون ميدّن ن دّونيث، ئݣ ؤخسّور نّسن لباراكا ئتغنون لݣنوس ؤر ݣينين ؤداين، ئوا مش عايدن ووداين قبلن نّجا؟ أدعايدنث غورسن لباراكات ؤوݣار.
13 دغي داون تّينيخ ألݣنوس ؤر ݣينين ؤداين، ألّيݣ ييخ أمازان غورون ها نكّ دا تعنّاخ س لخدمت ئنو.
14 بار أتيلي لغيرا ݣ وينّا ݣانين زݣ ئدامن ئنو، حما أد-يخ سباب ݣ ؤفوكّا ن شان ئيتسن زييسن.
15 داي مش ئسامح ربّي ݣ ؤداين حما أد ئمصالاح د ميدّن ن دّونيث، ئوا مش ئعايد ئقبلثن، ئس-ور ئتݣا ؤينا تودرت فير ن لموت؟
16 مش ئݣا طّرف أمزوارو ن-ؤرشثو أمقدّس هان أود أرشتو كول ئدّا أد-ئقدّس! ئد مش ئݣا ؤژور أمقدّس، هان أود ئشبضان دان أد قدسّن.
17 مش تيابّين شان ئشبضان زݣ يون ؤسكلو ن زّيتون، د شيّين نّا ئݣان أشبّيض زݣ يات تسكلوت ن زّيتون ن لخلا تتّولقمت ݣ-ؤدغار نّسن، ثعايت تشّارت ݣ-ؤزور ن تسكلوت ن زّيتون د وامان ئلّان دييس.
18 أد ؤر تحقّار ئشبضان نا تيابّين، ئد مش تسخاثرت ئخف نّش، هاثين ؤر-ئد شݣ أݣ-وسين أژور أخثار والاينّي نتّا أك يوسين.
19 والاينّي ثديث أتينيث: «هان ئشبضان-اد تيابين حما أتّولقمخ نكّين».
20 أياد ئصحا! ئتّخ أليݣ ؤر ؤمين تيابّين، ئد شݣ س ليمان نّش ثتولقمث، هان أك ئغرّا لحال، والاينّي ئخصاياش أتݣّتّ.
21 ئتّخ مش ؤر ئحنّا ربّي خف ئشبضان ن لاصل، هاثين ئغيي ؤر ئتحنّا غيفش أود شݣ.
22 ئوا راعا لّوطف ن ربّي د لعقاب نّس، لعقاب ئ وينّا يتّوتين، ئد لوطف ن ربّي ئلّا غيفش ماحد تسول تبثت ݣ لّوطف. مش ؤر ديكس توميژت أود شكّ أك ئبّي.
23 أود نيتني، مش ؤر قّيمين ؤمژن ݣ لكفر نّسن، هاثين دّان أد تّولقمن، ئتّخ ربّي ئغيي أتن ئيلقّم منّا ؤجديد.
24 داي مش تلّيت شك ݣ ؤوسكلو ن زّيتون ن لخلا، ئبّيش ربّي ئلقّمش ݣ ؤسكلو ن زيتّون أصيلي، نّا زݣ ؤرثييث، شحال أݣ وهن شيݣان خف وينّا ئݣان زݣ لاصل ن-ؤسكلو أصيلي، حما أثن ئلقم ربّي ديݣس.
25 هاثين ؤر ريخ، أيايتما، أكون ئزري سّر-اد، حما أد-ؤر تحاسبم ئخفاون نّون ئس ثلا غورّون لحكما، هان شان ئتسن زݣ أيت إسرائيل أديقيم ؤول نّسن ئقسح أرد شملن وينا تامنين زݣ لݣنوس ؤر ݣينين ؤداين.
26 س-ؤياد أس ئدّا أد ئتّوفوكّا شّعب ن-إسرائيل كول، ئمشينّا ئتيارو ݣ لشتاب ن ربّي: «ئدّا أدّيفّغ زݣ تمازيرت ن صْهْيُون ونّا ئتفوكّان، أها ئكس تيخّوت خف ثاروا ن يعقوب.
27 واد أݣان لعاهد ئنو ديتسن، أدّاي محوخ دّنوب نّسن».
28 هان ؤداين ؤر قبيلن لينجيل، س-ؤياد أس ݣان ئعداون ن ربّي أياد ݣ نّفع نّون، والاينّي ئدّخ تن ئختار ربّي، هاتين ئسول دا تن ئتّيري خف ؤدم ن لاجدود نّسن.
29 ئتّخ ربّي ؤر داي ندم خف ؤوينّا يشا، ولا خف ؤوينّا ئختار.
30 كنّي نّا ؤرئݣين ؤداين تعصام ربّي زݣ قبل، والاينّي نتّا ئرحم كون دغي س سباب ن-ؤداين نّا ث-ئعصان.
31 س ؤياد أود نيتني عصان ربّي دغي، حما أثن ئرحم أمشينا كن ئرحم.
32 ئتّخ ربّي يودجا كول ميدّن ݣ لحبس ن لمعصييت حما أثن ئرحم كول.
أسبّح ئ ربّي
33 مشتا أݣ مقّور لخير ن ربّي د لحكما د لعيلم نّس! أود يون ؤر ئتيغيي أد ئعالم خف لحكام نّس أها ئيفهم ئيبردان نّس!
34 «ماتّا واد ئسنن ماݣ لّان ݣ لعقل ن ربّي؟ د ماݣ مس واد ئغيين أد-يس ئمشاوار؟
35 ماݣ شان شا ئ ربّي ݣ تيزويري حما أداس تيرار؟»
36 ئدّخ ماݣان شا كول ئدّاد زݣ ربّي، علا حقاش نتا د زييس د غورس أزي ديدا كولشي. لعزّ ئ ربّي أبدا. أمين.