10
كو يون ئغي اد ئتّوفوكّا
1 أيايتما، دا تمنّاخ زݣ وول ئنو أرتتّرخ ئ ربّي نّجا ئ شّعب ن-إسرائيل.
2 نكين دا سن تشاهادخ ئس تلّا غورسن لغيرا خف ربّي، ماشان ؤر غورسن لفهم ئصحان.
3 ألّيݣ ؤر سّين صّلاح نّا ياكّا ربّي، أر ؤرزّون ميمش تݣّان أد صلحن داتاس، س-ؤياد أس ؤرقبيلن أبريد ئتّاوين غر صّلاح ن ربّي.
4 هان لمسيح ئيشمل أينّا ئرا شّرع، حما كول ميدّن نّا ئسّ يومن أد أغولن صلحن غر ربّي.
5 هان أينا يارو موسى خف صّلاح نّا ديدّان ݣّ شّرع، ئنّا: «ونّا ئتݣّان س لْوصيياث ن شّرع ئدّا أد ئسنت ييدير».
6 والاينّي صّلاح نّا ديتدّون زݣ ليمان، دا ئتّيني غيفس لشتاب ن ربّي: أد-ؤر تّيني ݣ-وول نّش، ماتّا واد ئدان أد يالي غر ئݣنا؟ لمعنا نّس: حما أد ئزوݣز لمسيح.
7 نغد: «ماݣ دّان أد-يݣز غر أبوض ن وشال؟» لمعنا نّس: حما أدي سّيلي لمسيح زݣ ئنݣر ئمتّين.
8 ئوا ماداي تّيني لشتاب ن ربّي؟ «هان أوال ن ربّي ئيقرباش، ݣ ئمي نّش د-وول نّش». لمعنا نّس: أوال ن ليمان نّا س دا نتبشار.
9 ئتّخ مش ثقرّاث س-ئيمي نّش ئد عيسى أݣّان مولانا، ثامنث زݣ وول نّش ئد ربّي ئسكرثيد زݣ ئنيرئمتّين، تديث أت توفوكّات.
10 ئتّخ ليمان زݣ وول دا ئتّاوي غر صّلاح، د ونّا ئقرّان س-ئمي دا ئتوفوكّا.
11 ئتّخ لشتاب ن ربّي دا ئتّيني: «كول ونّا ئسّ يومنن ؤريدّي أت ت-ئسخيّيب».
12 ئتّخ ؤر ئلّي لفرق ئنݣر ؤداي د ونّا ؤر ئݣين ؤداي، كول نسن يون ربّي أي غورسن ئلّان، نتّا أدا ياكّان لباراكاث بلا لحساب ئ كول ميدّن نّا دا س-ئقارن.
13 ئتّخ : «كول ونّا ئقارن س-ئسم ن مولانا أد ئتّوفوكّا».
14 والايني ميمش تݣّان أداس غرين د نيتني ؤر ئسّ ؤمين شا؟ د ميمش تݣّان أد ئسّ أمنن د نيتني ؤرغيفس سلين شا؟ د ميمش تݣّان أد غيفس سلّين بلا أتن ئبشّر شان يون؟
15 د ميمش تݣّان أد بشّرن ميدّن مش ؤر تيوزين؟ ئيمشينّا ئتيارو ݣ لشتاب ن ربّي: «مشحال أي غودان ئيضار ن وينّا ئتبشّارن س لخير».
16 والاينّي لّان شان ميدّن ؤر ضاعن لينجيل، نّبي إِشَعْيَاءَ دا ئتّيني: «أربّي ماݣ ؤومن س لخبار نّخ؟».
17 ئوا ليمان-اد دا د-ئتدّو زݣ ؤسفلد ن-ؤبشّر، ئد أسفلد-اد دا د-ئتّدّو زݣ ؤبشر ن واوال ن ربّي.
18 دغي، داكن تسقساخ: ئس ؤر سلين ووداين ئ واوال-اد؟ بلا شّكّ سلان-اس «هان أبرّح ن لانبيا ييوضن ميدّن كول أها أوضنن ئواليون نّسن لحدّ ن دّونييت».
19 أر تّسقساخ ألتو: ئس ؤر ئسّين شّعب ن-إسرائيل؟ ئسّ ئنّا موسى ݣ ؤمزوارو: «ديخ أد كون أدجخ أت حسدم يون شعب ؤر ثݣين، أها سقلقخكن س يون ن شّعب ؤر داي تّفهامن».
20 ئد إِشَعْيَاءُ ئزعم ئنّا: «ؤفاني وينّا ؤر دا ئتقلّابن غيفي، أغولخ ضهرخ ئ وينّا ؤر ديݣي ئسقسان».
21 والاينّي ئنّا ربي خف أيت إسرائيل: «ؤزضخ ئفاسّن ئنو ماݣلا واسّ ئ يون شّعب ئعصان، ئقّوراس ئخف».