9
ربّي د شعب ن-إسرائيل
1 هاثين داون تّينيخ لحقّ ݣ لمسيح ؤردا سحيلّيلخ، أود لخاضر ئنو داي تّشاهاد غيفي س رّوح لقدوس
2 هاثين حزنخ شيݣان ئد وول ئنو دا ئ ئنقّا دّيما.
3 دا تمنّاخ مور ئد نكّ أݣ تّولعنن زݣ ربّي أها تّوحرمخ زݣ لمسيح خف أيتما ئݣان لقوم ئنو زݣ ئدامّن ئنو.
4 نيتني أݣّان آيت إسرائيل ئخثارثن أد ݣين أرّاو نّس، ئسبيناسن لعزّ نّس، ئݣ ئتسن ئد لعاهد، ئشاسن شّرع، ئسنعثاسن ميمش تݣّان أتعبدن، ئزايد ئشاسن أينّاس ن ئقاول.
5 هاتين نيتني أݣان أراون ن لجدود نّخ ئمزوورا، زݣ تريكث نّسن أزݣ ديدّا لمسيح خف لحساب ن دّات، نّا ݣان ربّي خف كولشي، ئيݣ أمبارش خف دوام. آمين.
6 والاينّي ؤر رّيخ أد ئنيخ ربّي ؤر ئقّيمي شا ݣ لقيوال نّس، ئتّخ ؤر ئد كول أرّاو ن-إسرائيل أݣان شّعب ن-إسرائيل نّاݣ حقّان.
7 ماشي كول وينّا ݣانين زݣ تريكث ن إبراهيم أݣان أرّاو ن نّس. ربّي ئنّا ئ إبراهيم هاثين زݣ إسحاق أزݣ تدا أد غورش تّيلي تريكث.
8 لمعنا ن-ؤياد: أرّاو ن دّات ؤرݣين أرّاو ن ربّي، والاينّي أرّاو نّا س-ئقاول ربّي أݣّان ترّيكا ن-ابراهيم.
9 ئتّخ أوال نّا س-ئقاول ربّي نتا أيا: «هايي دّيخ أداغولخ ئيمال أم لوقث-اد أها ييلي غر سارا يون ن لعيل».
10 ؤر ئد غاس أياد، والاينّي هان رفقة تورو ئشنيون زݣ يون ؤرݣاز إسحاق باباثنخ.
11 قبل ؤرلولين ئشيرّان سول ؤر ݣين لخير نغد دّنوب حما أد ئتوشمّل لموراض ن ربّي ݣ ؤخثار نّس.
12 أختار-اد ن ميدن ؤر-ئد خف لحساب ن لفعايل نسن والاينّي خف لحساب ن ونّا ثن ئخثارن، ئنّا ربّي ئ رفقة: «لعيل أخاثارأد-ئݣ أخدام ئ ؤومزيان».
13 ئمشينّا ئتيارو ݣ لشتاب ن ربّي : «ريخ يعقوب أها شرهخ عيسو».
14 ئوا ماي نتيني؟ ئس ئݣا ربّي ضّالم؟ حاشا!
15 هاتين ئنّا ربّي ئ موسى: «نكّين أد رحمخ ونّا ريخ أد رحمخ، أها حنّاخ خف ونّا ريخ أد حنّاخ».
16 أياد ؤر ئد خف لحساب ن لموراض ن بنادم ؤلا لمجهود نّس، والاينّي خف لحساب ن رحمث ن ربّي.
17 ئنّا ألتو ربّي ݣ لشتاب نّس ئ فرعون أݣليد ن مصر : «ݣيخش داݣليد حما أديك سباينخ جّهد ئنو، أها يتيسن ييسم ئنو ݣ دونيث كول».
18 ئوا مش ئرا ربّي أد ئرحم شان يون دا ت-ئتّرحام، ئد مش ئرا أد ئسقسح ؤل ن شان يون دا ت-ئسقساح.
لغضاب د رّحمت ن ربّي
19 و لاينّي ئدّا شان يون زيݣون أد ئ ييني : «ئوا ماخ ألّيݣ ئسول ربّي داخ ئتلامّا؟ ئتّخ مايد ئتّيغين أد ئضاضّا لموراض نّس؟».
20 والاينّي مايد تمست شݣ أبنادم حما أتضاضّث ربّي؟ ئد أد ئغيي ؤفشكو أد ييني ئ ونّا تيعدل، ماخ ألّيݣ ئ تعدلث ئمشي؟
21 ئس ؤر ئلّي لحقّ غر بويتقّي أد ئيعدل زݣ يوت لعجنت يون ؤفشكو ئغلان د ونّا ئرخصن؟
22 ئوا، ئرا ربي أد ئسنعث لغاضاب نّس د جّهد نّس. والينّي ئصبر شيݣان خف ئفشكا ن-ؤهلاك نّا يستاهلن أهلاك.
23 حما أد ئيسباين لعزّ نّس أخاثار ݣ ئفشكا ن رّحمت، نّا ئسّوجد ئ لعزّ.
24 هاتين أود نكني ئغرا ياخ ربّي ؤر ئد غاس ؤداين وحدهوم والاينّي أود زݣ لݣنوس ياضن.
25 ئمشينا دا ئتّيني ربّي ݣ لشتاب ن نّبي هوشع: «شّعب ؤر ئݣين وينو، دّيخ أتسمّاخ د شعب ئنو، د ثنّا ؤرغيفي عزّن أتسمّاخ تنّا ئيعزّن».
26 أها ينّا هوشع ألثو: "ݣ ؤدغار نّاݣ أسن ئتونّا: «ؤرتݣيم شعب ئنو، ديس نيت أياون قّارن أرّاو ن ربّي ئدّرن»".
27 أرئسغويّو نّبي إشَعْيَاء خف أيت إسرائيل، ئنّا: «مقّار عدّان أيت إسرائيل أم رّملا ن لبحر، هاثين ئدروس ونّا ݣدّان ديݣسن أد ئتّوفوكّا.
28 ئتّخ أينّا ئنّا ربّي، ئدّا أت تييݣ كول فيساع ݣ دّونيت».
29 ئمشينّا ئنّا نّبي إِشَعْيَاء قبل ن-ؤيا، مور-ئد-ئس ؤر يودجي ربّي نّا ئغيين ئ كولشي شان ئتسن زݣ تريكث نّخ، تالي نخلا أم ئمزداغ ن تمدينث ن سدوم د تمدينث ن عمّورا.
30 ئوا، ماي نتّيني؟ هان لݣنوس ؤر ݣينين ؤداين ؤر قلّيبنين خف تّقوا عايدن صلحن دات ن ربّي س ليمان نّسن.
31 ئد شّعب ن-إسرائيل نّا دا ئتقلّابن خف صّلاح س لاعمال ن شّرع، هاتين ؤر غييّن أتّاوضن.
32 ماخ؟ ئتّخ ران أد عايدن صلحن دات ن ربّي ؤر-ئد س ليمان والاينّي س لاعمال، داي مناقارن د ئسلّي ن لعترت.
33 ئمشينّا ئتيارون ݣ لشثاب: «ها نكّين دّيخ أد ݣخ ݣ تمازيرت ن صْهْيُونْ يون ئسلّي ئ تݣّان لعترت ئستوتّوين، ئد كول ونّا ئس يومن ؤر دات ئتخيّاب.