8
تودرت ن-ؤمومن خف لحساب ن رّوح ن ربّي
1 دغي ؤر ئقّيمي أود يون لحكام خف وينّا ݣانين وين عيسى لمسيح.
2 ئتّخ جّهد ن رّوح نّا ياكّان تودرت س عيسى لمسيح، ئفوكايي زݣ جّهد ن دّنب د لموت.
3 أينا مي ؤر ئيغي شّرع ن موسى أتّيݣ س سباب ن دّات نّخ نّات ئسضعفن، ئيݣات ربّي ألّيݣ ديوزن ممّيس ݣ دّات ئتشباهن دّات-نّخ ئدنبن. خف لحساب ن دّنب ئحكم ربّي غيفس ݣ دّات.
4 ئݣا أياد حما أد ئيشمّل لحكام نّا داي تتّر شّرع زّيݣنخ، نكني نّا دا ئتعيشن ؤر ئد خف لحساب ن دّات، والاينّي خف لحساب ن رّوح ن ربّي.
5 ئتّخ وينّا ئتعيشن خف لحساب ن دّات دا تتّاوين ݣ ئسكّين ن دّات، والاينّي وينّا ئتعيشن خف لحساب ن رّوح ن ربّي، دا تتّاوين ݣ ئسكّين ن رّوح.
6 د وينّا تيتّاوين ݣ ؤوينا ثرا دّات دا تّمتاتن، واليني وينّا تيتّاوين ݣ ؤوينا يرا رّوح ن ربّي دا تّيديرن يلي غورسن لهنا.
7 ئتّخ ونّا داي تݣّان أينا ثرا دّات داي تضاضّا ربّي، ؤرداي ئضاع شّرع نّس، ولا ئقادّا أد ئس ئݣ.
8 د ميدّن تعيشنين خف لحساب ن دّات، ؤر تّيغيين أد ݣين أينّا ئسرضون ربّي.
9 ئد كنّي، هاثين ؤر دا تعيشم خف لحساب ن دّات، والاينّي خف لحساب ن رّوح مش ئلّا رّوح ن ربّي ئزديغ ديݣون. مشان مش ئلّا شان يون ؤر ديكس رّوح ن لمسيح، هان ونّا ؤر ئݣي وين لمسيح.
10 مش ئلّا ديݣون لمسيح، هان دّات نّون تدا أت مّت زݣ لجيهث ن دّنب. والاينّي رّوح نّون ئدّر ئتّخ ربّي ئحاسبكن تصلحم غورس.
11 مش ئلّا رّوح ن ربّي نّا ديسكّر عيسى لمسيح زݣ ئنݣر ئمتّين ئزدغ ديݣون، ئوا ربّي نّا ديسكّر عيسى لمسيح زݣ ئنݣر ئمتّين ئدّا أد ئحيو أود دّات نّون ئمّوتن س رّوح نّس ئزدغن ديݣون.
12 خف ؤياد أيايتما، ؤر-اخ ئخصّا أنضفور دّات نّخ، حما أنعيش خف لحساب ن شهوات نّس.
13 ئتّخ مش تضفورم شّهوات ن دّات، تدّام أت تمتم، والاينّي مش ثنغام لفعايل ن دّات س رّوح ن ربّي تدّام أت تيديرم.
14 ئد كول وينّا داي حرّي رّوح ن ربّي، نيتني أݣان أرّاو ن ربّي.
15 ئتّخ كني ؤر ثوميزم روح نا كن ئترارانئسمغان ألثوغر لخوف، والاينّي ثومزم رّوح نّا س ثعايدم ثݣام أرّاو ن ربّي، نتّا أمي دا نقّار: «بابا، آباباتنخ».
16 ئد روح-اد س-ئخف نّس دا ئتشهاد ئ رّوح نّخ ئس نݣا أرّاو ن ربّي.
17 ألّيݣ نيا نكني أرّاو ن ربّي، نيا ئورّاثن، س لمعنا: ئورّاثن ݣ-ؤينّا س-ئقاول ربّي، أها نشّار لورث د لمسيح، داي مش نلّا نشّار أݣيدس ݣ لعداب نّس، أنشّار أݣيدس أود ݣ لعزّ نّس.
18 نكين حقّاخ لعداب نّخ ݣ دّونيت-اد دغي ؤر ئسوي والو دات ن لعزّ نّايدّا ربّي أد ئسباين ديينخ.
19 ئتّخ كول لمخلوقاث دا تݣونوين س شيݣان ن صبرميلمي أيد ئسبايان ربّي أرّاو نّس.
20 ئتّخ لمخلوقاث دا تضاعنث لباطل ماشي س لخاضر نّسنث، والاينّي س لحكام ن ربّي. واخّا أياد ئلّا غورسنث رّجا.
21 أود نتني دّان أد توفوكان زݣ ثمارا ن-ئسكّين أسن ئتسبّابن ݣ لموت، حما أد شّارن ݣ ؤحرّر د لعزّ ن وارّاو ن ربّي.
22 هان نكني نسّن ئد تاندرا د لعداب ن لمخلوقاث كول أم ؤقضاع ن ثاروا غر دغي.
23 ؤر ئد غاس لمخلوقات أيد ئندرن، والاينّي أود نكني نّا غر ثلّا لغلت تامزواروت ن رّوح ن ربّي، نكني س-ئخفاون نّخ دان ندّر، أرنتݣونّوي زݣ ربّي أنعايد أنݣ أرّاو نّس س لفدا نّس ئ دّات نّخ.
24 ئتّخ س رّجاياد أس-اخ ئفوكّا، والاينّي رّجا نّا دا ئتّويانّاين ؤر ئݣي رّجا، ئوا ميمش ئتݣّا بنادم أد ئراجا أينّا داي تّانّاي؟
25 والاينّي دا نترجّا أينّا ؤر دا ئتّويانّاين، أها أرت نتݣونوي س صّبر.
26 ئد رّوح لقدوس أݣد نتّا داخيتعاوان ݣ ضّعف نّخ، ئتّخ نكني ؤر نسّين أنتّر أينّا ئصلحن ݣ تژّالّيت نّخ، والاينّي رّوح س-ئيخف نّس دا خ-ئتّشفاع آرئسحوزّور ربّي زݣ لجيهت نّخ س-ؤينّا ؤرغين ئواليون أد غيفس سّيولن.
27 د ربّي نّاي سّن ماݣ لّان ݣ-وولاون، داي تّيسين لموراض ن رّوح لقدوس ئتّخ دا ئتشفاع خف-وينّا قدّسنين أم-ؤينّا ئرا ربّي.
28 نكني نسّن ئد ربّي دا ئتّادجا كول ئسكّين أد خدمن ئ لخيرئ وينّا ت-ئتّيرين، ئوينّا مي ئغرا خف لحساب ن لموراض نّس.
29 ئتّخ وينّا ئسّن ربّي زݣ ؤومزوارو ئخثارثن زݣ تيزويري حما أد شبهن ئ تصويرا ن ممّيس، حما أد ئݣ أمنزو ئنݣر شيݣان ن واوماتن.
30 ئد وينّا ئيخثارربّي زݣ ثيزوري أود نيتني ئغرياسن، د وينّا مي ئغرا ئروراثن صلحن، د وينّا يرورا صلحن ئشاسن لعزّ نّس.
ماݣ ران أداخ ئبضود تايري ن عيسى لمسيح
31 ئوا مايد نتّيني تفّير ن-ؤياد كول؟ مش ئلا ربّي أݣّيدنخ ماݣ دّان أد ييلي ضد نّخ؟
32 ربّي ؤر ئسعزّا مميس غيفنخ، والاينّي ئيشاث ئ لموت غيفنخ كول، ئوا ميمش ألثو ؤراخ ياكّا أݣيدس كولشي؟
33 ماݣ دّان أد ئتهم وينّا يخثار ربّي؟ هاثين ربّي أيثن ئروران صلحن.
34 ماݣ غيين أد غيفسن ئحكم؟ ئتّخ عيسى لمسيح ئمّوت، ؤوݣار ن-ؤويا، ئكّرد زݣ ئنݣرئمتّين، نتّا أݣلّان خف ؤوفاسي ن ربّي حما أد غيفنخ ئشفع.
35 ماݣ غيين أداخ ئبضو د تايري ن لمسيح؟ ئد لمحاين، ماد ژيّار، ماد ضُّلم ماد لاژ ماد لعرا ماد لخطار ماد سّيف؟
36 ميمش ئتيارون ݣ لشتاب ن ربّي: «دا نتحطار ئ لموت غيفش كّوياس، نݣا أم وولّي ئتّوحرين غر تغرصا».
37 والاينّي ݣ لومور-اد كول ندّا أنرّو تيرّيت تختارت س ونّاخ ئران.
38 نكّين ئلّا غوري ليقين ئد لا لموت ولا تودرت ولا لملايكا ولا رويّاس ولا ئسكّين ن لوقت-اد ولا وين لوقتنّا ديدّان و لا لقوّات ن-ئݣنّا،
39 لا لعلو ولا ثيغبا ولا أود شان لمخلوقاث ياضنين أد ئغيين أداخ بضون د تايري ن ربّي نّاي ضهرن ݣ عيسى لمسيح مولانا نّخ.