7
أمومن د شّرع.
1 ئس ؤر ثسّينم أيايثما، نكّ دا سوالخ ئ وينّا سّنين شّرع هان شّرع دا يحكّم خف بنادم ماحد ئسول ئدّر؟
2 ئتّخ تامطّوط نّا ييول، لا تين ئتسمونا شّرع د-ؤرݣاز نّس ماحد ئسول ئدّر، والاينّي مش ئمّوت، دات فوكّا زݣ شّرع نّا تّيسمون د-ؤرݣاز نّس.
3 ئوا مش ئسول ؤرݣاز نّس ئدّر دا تّوسمّا دا ثفسد مش ثيول أرݣاز ياضن، ماشان مش ئمّوت ؤرݣاز نّس، هاثين تفّغ دّاو ن شّرع، ؤردا تّفساد مش ثيول أرݣاز ياضن.
4 ئمشيد أود كونّي أيايثما، هاثين تمّوتم زك لجيهث ن شّرع ن موسى س دّات ن عيسىى لمسيح، حما أتعايدم أتݣيم وين يون ياضن ونّا ديكّرن زݣ ئنݣر ئمتّين أها توشم لغلت ئژيلن ئ ربّي.
5 ألّيݣ نكّا دانتعيش خف لحساب ن-دّات، لّانث شّهوات ن دنوب نّخ نّاي سباين شّرع، دا خدّمنث ݣ دّات نخ حما أنݣ لخدايم نّا ئتاوين غرلموت.
6 والاينّي دغي نتّوحرّر زݣ شّرع، ئتّخ نمّوت زݣ لجيهت ن-ئسكّين نّاخ ئشرفن أم ئحبّاسن٘. حما أنخدم ربي س رّوح ؤجديد، ماشي س - ؤوبريد ن شّرع أقديم ئتيارون.
شّرع ن موسى د دنوب.
7 ئوا مايد نتّيني؟ ئد شّرع أݣان سباب ن دّنب؟ حاشا! والاينّي نكّين ؤر سّينخ دّنب غاس س شّرع، ئتّخ ؤر كّيخ دا تّيسينخ شهوت مور ئد ئس ؤر ئنّي شّرع: «أد-ؤر تشهّات».
8 والاينّي دّنب يوفا أبريد نّس ݣ لوصيت-اد حما أد-ئحرّش ديݣي كول شّهوات، ئتّخ بلا شّرع دّنب ئمّوت.
9 كّيخ زݣ قبل دا تعيشخ بلا شّرع، والاينّي ألّيݣ تّدّاد لوصيث ئحيو دّنب، ئد نكّ مّوتخ.
10 خف ؤياد لوصيث نّا ئخصّان أد ئ ثاوي غرتودرت، نتّاث أيد ئوين غر لموت.
11 ئتّخ دّنب ألّيݣ يوفا أبريد س سباب ن لوصيث، ئغضريي أها ئنغيي ئس.
12 س-ؤياد هان شّرع ئقدّس، د لوصيت تقدّس ألثو، تمنوأها تژيل.
13 ئوا ئد أسكّين ئژيلن أيي تسبّابن ݣ لموت؟ حاشا! هان دّنب حما أد ئضهر ئس ئݣا دّنب ييويييد لموت س-ئيسكّين ژيلنين. س-ؤياد أس تسّضهر لوصيث تيخويت د دّنب بلا لقياس.
ئمنغي ن بنادم ئنݣراس د-ئخف نّس
14 ئتّخ نكني نسّن ئس ديدّا شّرع زݣ ربّي، والاينّي نكّ غاس بنادم ئنزان أم شان ئسمغ ئ دنب.
15 ؤر سّينخ ماي تݣّاخ، ئتّخ أينّا ريخ ؤر دا ت تݣّاخ، والاينّي أينّا شرهخ نتا أدا تݣّاخ.
16 مش دا تݣّخ أينّا ؤر رّيخ، هانك مساساخ د شّرع ئس ئژيل.
17 ئوا دغي ؤر-ئد نكّين أݣ تݣن أينّا ؤر رّيخ، والاينّي دّنب نّا ئزدغن ديݣي.
18 سّنخ ئس ؤر ديݣي أود يون ن-ؤسكّين ئژيلن، دا سّوالخ خف جاج ئنو، ئتّخ ريخ أد ݣخ لخير، والاينّي ؤر غيّيخ أتݣخ.
19 ئتّخ لخير نّا ريخ، ؤر دا ت تݣّاخ، والاينّي دّنب نّا ؤر دا تّيريخ نتّا أدا تݣّاخ.
20 مش دا تݣّاخ أينّا ؤر رّيخ، ؤر-ئد نكّ أيدا ت-ي تݣّان، والاينّي دّنب نا ئزدغ ديݣي.
21 س-ؤياد، ؤفيخ ݣ جاج ئنو أدّاي ريخ أد ݣخ لخير، دا تّافاخ غاس تيخّوت أݣلان ديݣي.
22 ݣ-ؤول ئنو لا تّفراحخ س شّرع ن ربّي.
23 والاينّي دا تّافاخ ݣ لجوارح ئنو يون جّهد دا يتناغ د لعقل ئنو، أري ئتّادجا أدݣخ أحبّاس ن دّنب ئلّان ݣ لاجوارح ئنو.
24 أويهانو أنك ئݣان بنادم أمخيب! مائ ئتفوكّان زݣ دّات أد ن لموت؟
25 دا تشكارخ ربّي نّا ئ ئفوكّان س مولانا عيسى لمسيح، ئيمشي س لعقل ئنودا تضاعخ شّرع ن ربّي والاينّي س دّات ئنو لّيخ دّاون جّهد ن دّنب.