5
لمسيح ئمّوت غيفنخ أها ئسمصلحاخ د ربّي.
1 س-وياد أليي أخ ئحاسب ربّي نصلح س ليمان، هاثين غورخ لهنا أݣيس س مولانا عيسى لمسيح.
2 دغي يغول غورخ لحقّ س ليمان أنكشم غر نعمت ن ربّي نّاݣ نلاّ، أها نفرح س رّجا نّا غورخ ئلّان حما أد نامّو ݣ لعزّ ن ربّي.
3 ؤر-ئد غاس أيا، والاينّي دا نفرّح أݣد ݣ ومّاس ن لمحاين، ئتّخ نسّن ئد ثمارا لا تسعلّام صّبر،
4 د صّبردا ييس نترّو لمحنا، أدّاي تنرّو داي تيلي غورخ رّجا.
5 ئد رّجا ياد ؤر داخ ئتخيّاب، ئتّخ رّوح لقدوس نّاخ ئتّوشان ئعمّر وولاون نّخ س تايري ن ربّي.
6 ألّيݣ نسّول نضعف، ئمّوت لمسيح خف وينا دنبنين ݣ لوقت نّا ئختار ربّي.
7 هاثين ئصعب أديمث شان يون خف بنادم ئصلحن، والاينّي أد ئغي شان يون أد-ئمّت خف شان ن بنادم ئ تݣّان لخير.
8 والاينّي ربّي ئسضهراخد تايري نّس، ئتّخ ألّيݣ نسول نݣا ئمعصان، ئمّوت لمسيح غيفنخ.
9 س-ؤياد أس آخ ئحاسب ربّي د وينّا ئصلحن س-ئدامن ن لمسيح، أها ئس أس ندّا أد نراح ستيت زݣ لغاضاب ن ربّي.
10 ئتّخ مش نكّا نݣا ئعداون ن ربّي أها نمصالاح ئس س لموت ن ممّيس. أليݣ ئس نمصلاح ؤيار نويا ندّا أن نراح س تنشرا د تودرت ن ممّيس.
11 والايني ؤر-ئد غاس أيا، دا نفرّح ألتو س ربّي ئتخ مولانا عيسى لمسيح ئسمصالاحاخ دغي د ربّي.
آدم دعيسى لمسيح
12 ئمشينا ئيكجمد دّنب غر دّونيث س سّباب ن يون ؤرݣاز، د دّنب ئيويد لموت، س-ؤياد أس تزري لموت غر ميدّن كول ئتّخ كول نسن دنبن.
13 هان دّنب ئلاّ ݣ دّونيث قبل أد ييلي شّرع ن موسى، والاينّي ؤر ئكّي دا ئتّوحاساب ئتّخ ؤر ئلّي شّرع.
14 ئد لموت تكّا دا تحكّم خف ميدّن زݣ ؤسّان ن آدم أر ؤسّان ن موسى، تيلي دا تحكّم أود خف وينّا ؤرئدنيبن أم دّنب نّا ݣّا آدم، ييلي آدم أم ونّا ݣ دّان أد ئدّو فّيراس.
15 والايني هان دّنب ؤريݣي أم توكي ن ربي، ئتخ مش لاّن شيݣان ن مدّن لاتمتاتن س سباب ن دّنب ن يون ؤرݣاز، هان توكي ن نعمت ن ربي تݣوت شيݣان س يون ؤرݣاز نّا ݣّان عيسى لمسيح تتونشفا ئ شيݣان ن مدن.
16 لغلت ن توكي ن ربّي ؤر ئد أم لغلت ن دّنب ن يون ؤرݣاز، ئتّخ دّنب ن يون ؤرݣاز ئحكم خف ميدّن كول س لموت، والاينّي توكّي ن ربّي تيويد ئيمدّن صّلاح واخّا ݣان شيݣان ن دّنوب.
17 ئتّخ س دّنب ن يون ؤرݣاز، تحكم لموت خف ميدّن س سباب نّس، والاينّي وينّا يتّامژن نّعمت ن ربّي ئݣوتن، د توكّي ن تّقوا، دّان أد ملكن تودرت ن وابدا س يون ئݣان عيسى لمسيح.
18 س-وامشي، س دّنب ن يون بنادم ئتّوحكم خف ميدّن كول س لموت، ئد س لخدمت ن صّلاح ن يون أغولن ميدّن كول صلحن أها تلي غورسن تودرت ن وابدا.
19 ئتّخ ئمشنّا أغولن شيݣان ن ميدّن دنبن س لمعصييت ن يون ؤرݣاز، ئمشيس أݣد س طّاعت ن يون ؤرݣاز أغولن شيݣان ن ميدّن صلحن غر ربّي.
20 ئد شّرع ئدّاد حما أد ئسّضهر ئس عدّان دّنوب، والاينّي أينّا ݣ عدّان دّنوب، دا تزاياد أتعدّو نّعمت ن ربّي.
21 ئمشينّا ئحكم دّنب أها يسبب ݣ لموت، أود نّعمت ن ربّي تحكم خف لحساب ن صّلاح أر تاكّا تودرت ن وابدا س مولانا عيسى لمسيح.