4
ليمان ن-إبراهيم
1 ئوا ماي نتّيني خف لجد نّخ إبراهيم ݣ لجيهث ن دّات؟ مايد يوفا؟
2 مش ياغول إبراهيم ئصلح غر ربّي س لاعمال نّا ئݣا، أدغورس ييلي لحقّ أد ئتعنّا، والاينّي ؤر ئد دات ن ربّي.
3 ئتّخ مادا يتّيني لشتاب ن ربّي؟ داي تيني: «يومن إبراهيم س ربّي ئحاسبت ئصلح خف لحساب ن ليمان نّس».
4 ونّا يخدمن شان لخدمت، ئسثاهل أديامز ثيغراد نّس، ؤر ݣينث شا صَّادَقَا.
5 ونا ؤر ئيين شان لاعمال حما أد ئيشمل شرع، أها يامن س ربّي نا دا ئتغفار ئ ونّا ئدنبن، هاثين دا-ثيتحساب ربّي ئصلح خف لحساب ن ليمان نّس.
6 ئمشينا داي تّيني دَاوُد أود نتّا، لّيݣ ئسّيول خف لفراحيت ن بنادم نّا دا-يتحساب ربّي ئصلح بلا أد إراعا لاعمال نّس:
7 «أياعريت نّسن ئ وينّا مي تّوغفرنت لمعصييات نّسن أها تّوسترنت دّنوب نّسن.
8 أياعري نّس ئ ؤرݣاز نّا مي ؤر دا ئتحاساب ربّي دّنب نّس».
9 ئس ئݣا ؤفراحاد غاس وين ميدّن زيّنين ماد أود وينّا ؤرزينّين؟ نكني دانتّيني ئنا لشثاب : ربّي ئحاسب إبراهيم ئصلح خف لحساب ن ليمان نّس.
10 والاينّي ماتّا لوقت أݣ ئلّا ؤويا؟ ئد دات ن-ؤزيّن ماد فّيراس؟ هاثين ؤر-ئد فّيراس والاينّي دات ن-ؤزيّن.
11 فّير ن مايد يومژ إبراهيم ليمارت ن-ؤزيّن، حما أتݣ تمتارت ئد ربّي ئحاسبث ئصلح خف ليمان نّس قبل أد ئزيّن، حما أد ياغول أد ئيݣ ئبّاس ن وينّا تّامنّين كول بلا أد زيّنن أها ئحاسبثن ربّي أود نيتني صلحن.
12 أها ئيݣ إبراهيم ئبّاس ئ وينّا زيّنّين ؤر ئد خف نّيرت ن-ؤزيّن والاينّي ئتّخ دا تفّور أبريد ن ليمان ن-ئبّاتنخ إبراهيم نّا يومن س ربّي قبل أد-ئزيّن.
13 ئتّخ ئقاول ربّي ئ إبراهيم د تريكث نّس أد ورثن دّونيث، لعاهد-اد ؤرث ئشي ربّي ئ إبراهيم ئتّخ ئضاع شّرع، ماشان س ليمان نّس ئحاسبت ربّي ئصلح.
14 مور ئد ئس ئلّا لورث غاس ئ وينّا تضاعنين شّرع، ئوا هان ليمان ؤردييس لفايت د لعاهد ن ربّي ؤريواثا والو.
15 ئتّخ شّرع دا يتسبّاب ݣ لغاضاب ن ربّي، والاينّي مور ئد ئس ؤر-ئلّي شّرع ؤر تنّي أت تيلي لمعصييت.
16 خف ؤيا، أس ئتّوبنا لعاهد خف ليمان، حما أتّيلي نعمت زݣ ربّي ييلي لعاهد ئيضمنن ئ كول ترّيكت ن-إبراهيم، ؤر ئد غاس ئ ميدّن تعيشنين دّاو ن ثنباط ن شّرع، والاينّي أݣد ئ ميدّن تعيشنين س ليمان أم إبراهيم، ئݣان ئبّاتنخ كول.
17 ئمشينّا ئتواري ݣ لشتاب ن ربّي : «نكّين خضارخش حما أتݣث ئبّاس ن شيݣان ن لݣنوس». إبراهيم أݣّان ئبّاتنخ دات ن ربّي نّاس يومن، ربّي ئسّيديرن ئمتّين، أر ئتّامرئسكّين نّا ؤر لّينين حما أديلين.
18 واخّا ؤرئلّي رّجا، إبراهيم يومن أها ئيلي غورس رّجا ئس ئدّا أد ئيݣ ئبّاس ن شيݣان لݣنوس، خف ؤينّا س-ئنّا ربّي: «أتعدو ترّيكث نّش شيݣان».
19 ليمان نّس ؤر-ئناقص واخّا ييوض عليحال ميّا ن-ؤسݣاس ݣ لعمر نّس أها ئسّن ئد دّات نّس تݣا أمّي ثمّوث، تيلي ثمطّوط نّس سارا توسّير ؤراس ئقّيم أتّارو.
20 أها ؤر ئشكّا ݣ ؤينّا س-ئقّاول ربّي، ماشان ياغول ئجهد ݣ ليمان نّس أها ئيش لعزّ ئ ربّي.
21 غورس ليقين ئس ئدّا ربّي أد ئݣ أينّا س-ئقاول.
22 خف ؤيا: ئحاسبت ربّي د أرݣاز ئصلحن.
23 ؤر ئد غاس غيفس أيد ئنّا لشتاب: ئحاسبت ربّي د أرݣاز ئصلحن،
24 والاينّي أود نكني، أنتّوحاسب نصلح س ليمان نّخ س-ونّا ديسكّر عيسى مولانا نّخ زݣ ئنݣر ئمتّين،
25 ونّا ئتّوشفان ئ لموت خف دّنوب نّخ، أها ئسّكرتيد ربّي زݣ لموت حما أنعايد نصلح.