3
أود يون ؤر ئلّي خف لحقّ.
1 ئس ئلّا شا ن رّبح غر بنادم مش ئݣا ؤداي؟ د ماتّا نفع ئلّان ݣ ؤزيّن؟
2 هان أينّا ئعدّا شيݣان زݣ كول تمناضين. د-ؤسكّين أمزوارو، ربّي ئسييمن ؤداين خف واوال نّس.
3 ئوا ماݣ دّان أد ئجرو مش لّان شان ئتسن ؤردا تامنن؟ ئس ئدّا ويا أد ئكّس لامان ن ربّي؟
4 حاشا! ربّي ئلّا خف لحقّ واخّا كول ميدّن دا سْحيلّيلن. أم ؤينّا ئتيارون ݣ لشتاب ن ربّي : «ثديث أتّليث خف لحقّ ݣ واوال نّش، أدّاي غيفش حكمن تدّيث أثن تربحث».
5 والاينّي مش ثلّا تيخوت نّخ دا تسبايان لحقّ ن ربّي، ئوا ماي نرا أنّيني؟ ئس ئݣا ربّي ضّالم ئتّخ د يسوݣز لغضاب نّس؟ هاثين دا ساوالخ دغي خف لحساب ن لفهم ن بنادم.
6 حاشا! ميمش ئتݣا ربّي أد-ئحكم خف دّونيث؟
7 والاينّي مش ئحلّال ئنو سباين لحقّ ن ربّي د لعزّ نّس، ماخ ألّيݣ ئسول دا يحكم غيفي ربّي أم شان يون ئدنبن؟
8 ئوا ماخ ؤر نتيني: أنݣ دّنوب حما أد-ئفّغ زيݣسن لخير، ميمش داخ تهامن شان ميدن س زّورأرتّينين غيفنخ ئس دا نتّيني أياد؟ ميدّن-اد ستاهل لعيقاب.
9 ئوا مايد نتّيني؟ ئد نكني ؤداين نوف لݣنوس ياضن؟ حاشا! هاثين سباينخ ياد ئد ؤداين د وينّا ؤرثن ئيݣين كول نّسن لّان دّاو ن تنباط ن دّنب،
10 ئمشيتخ ئتيارو ݣ لشتاب ن ربّي: «ؤر ئلّي أود يون ئصلحن، واخّا غاس يون.
11 ؤر ئلّي أود يون ئتّفهامن، أود يون ؤر دا يورزّو خف ربّي.
12 كول نّسن فغن أبريد ئمنان، ؤرديكسن ثقيمي لفايت، ؤر ئلّي أود يون ئتݣّان لخير، واخّا غاس يون.
13 أݣرجوم نّسن أم تانضلث ئرزمن، س-والسيون نّسن دا تغشّان. دّاون وانشوشن نّسن ئلّا سّم ئفاغريوْن.
14 ئقما نّسن عمرن س ثركّام د واوال نّا دا ئجرحن.
15 ئضارن نّسن زربن أد دّون أد نغين،
16 ݣ-ؤبريد نّسن ئلّا غاس ؤهدام د ؤخوب،
17 ؤر دجين سين أبريد ن لهنا
18 أها ؤر ئلّي لخوف ن ربّي دات ن والّن نّسن».
19 نكني نسّن ئد كول أينّا ئتّيني شّرع ن موسى دا ئس ئساوال ئ وينّا ئلّان دّاو ن تنباط ن شّرع، حما أود يون ؤر غورس ئتّيلي لعوضر، أتعايد دّونيث كول دّاو ن لحكام ن ربّي.
20 ئتّخ س لخدمت ن شّرع أود يون ؤر ئدي أديصلح دات ن ربّي، لحقاش س شّرع أس داي تياسّن دّنب.
21 واليني دغي، ئسنعثاخ ربّي ميمش نتݣا أنصلح بلا شّرع، أياد دا غيفس ئتشهاد شّرع ن موسى د لشتوب ن لانبيا.
22 صّلاح-أد دا تياكّا ربّي ئ كول وينّا ؤمنّين س عيسى لمسيح، ئتّخ ؤردا ئتݣّا تودماوين ئنݣر مدّن.
23 ئتّخ كول ميدّن دنبن أها تّوحرمن زݣ لعزّ ن ربّي.
24 والاينّي س لفضل ن نعمت ن ربّي أغولن صلحن بلا أثيݣ، ئتّخ ئفداتن عيسى لمسيح.
25 د ونّا ئشا ربّي أد ئيݣ تامغروصت ئتّخ س-ئدامّن نّس أس تّوغفرنت دّنوب ئ كول ميدّن نّا ئس ئتامنّ حما أد ئسباين ئس دا ئحكّم ربّي س لحقّ، س صّبر نّس ؤر ئعاقب ميدّن خف دّنوب نّا زرينين،
26 ݣ لوقت ن صبر نّس حما أديسباين ئس داي حكم س لحق ݣ زماناد أها يرار كول وينا ئتامن س عيسى صلحن.
27 ئس ئلّا ماس نتعنّا؟ ؤهو، ؤر ئلّي. د ماتّا شّرع أس دا أنتعنّا؟ ئسد س شّرع ن لاعمال؟ ؤهو، والاينّي س شّرع ن ليمان.
28 ئتّخ دان تّيسين بنادم نّا ئصلحن دات ن ربّي خف لحساب ن ليمان نّس، بلا أديݣ س شّرع.
29 ئس ئݣا ربّي غاس وين ؤداين؟ ئس ؤر ئݣي وين ن لݣنوس ؤر ݣينين ؤداين؟ ييه! هاثين ئݣا وين لݣنوس كول.
30 ئتّخ ئلّا غاس يون ن ربّي، نتّا ئدّا أد ئرار وينّا زينّين د وينّا ؤر زينّين أد صلحن س ليمان نّسن.
31 ئوا، ئد أنكّس شّرع س ليمان؟ حاشا! والاينّي س ليمان دا ندزياد أنصرصّا شّرع.