2
لحكام ن ربّي
1 اود شݣين، هاثين ؤرغورش أود يون لعوضر أݣد ماتا نتا شݣ أونّا دا ئحكّمن خف ميدّن ياضنين، ئتّخ أدّاي دا تحكّمث خف وين ضنين، د شݣّين دا ثݣّاث أينّا تݣّان نيتني، هان شݣين دا تحكّمث خف ئيخف نّش.
2 نكني نسّن ئد ربّي دا يحكّم س لحقّ خف ميدّن تّݣانين أم ئسكّينّ-اد.
3 ئس تغالت أونّا دا يحكّمن خف ميدّناد ارتݣّاث ام نيتني، ئس تدّيد أتمنعث زݣ لعقاب ن ربّي؟
4 ئس دا تحقّارت لوطف ن ربّي أخثار د لخاضرنّس ئوسعن د صّبرنّس، د شݣين ؤر تسّينت ئد لّوطف ن ربّي نتّا أك ئتراران غر أبريد نّس؟
5 والاينّي س لقسوحيت ن-وول نّش د-ؤعاند نّش دا تجماعث ئ ئخف نّش لغاضاب ن ربّي ئ واس ن لغاضاب، ديس أݣ ئدّا أد ئيضهر ئد ربّي دا يحكّم س لحقّ خف ميدّن.
6 لوقت نّا ئدّا أد-ئخلّص ئ كّو يون خف لفعايل نّا ئݣا.
7 ئدا أديوش تودرت ن دوام ئ وينا ئتݣين س صبر لخدنت لخير أها ار ؤرزون لعز دشّان د تودرت ن دوام.
8 نغد س لغاضاب د سّخط خف وينّا ئتيرين ئخفاون نّسن، أرنكرن لحقّ، أرتفورن لباطل.
9 أد يلي لعداب د تمارا ئ كو يون ئ تݣّان لمعصيات، ؤداين د-ئمزوُورا د-أود وينّا ؤر تن ݣين.
10 والاينّي أد يلي لعزّ د شان د لهنا ئ كّو يون ئ تݣّان لخير، ؤداين ئمزوُورا د وينّا ؤرتن ئݣين.
11 ئتّخ ربّي ؤر دا يتݣا تودماوين.
12 ئدّخ ميدّن كول نّا دنبنين أها ؤر سّين شّرع ن موسى، دّان أد مّتن بلا شّرع نس، ئد ميدّن نّا سّنين شّرع نس أها فغن أبريد، ئدّا أد غيفس ئتّوحكم س-ؤينّا ئلّان ݣ شّرع ن موسى.
13 ؤر ئد وينّا دا يتسلان ئ شّرع نيتني أݣ صلحن غر ربّي، ماشان وينّا دا تݣّان أينّا ئلّان ݣ شّرع كول نيتني أݣ صلحن.
14 ئتّخ لݣنوس ؤر ݣينين ؤداين أها ؤرغورسن شّرع ن موسى، أدّاي دا تݣّان س-ؤينّا ئنّا شّرع ݣ وولاون نّسن، هاثين ݣان شّرع ئ يخفاون نّسن واخّا ؤر ئلي غورسن شّرع،
15 أرسضهارن ئد أينّا س تن ئوصّا شّرع ئتّيارو ݣ وولاون نّسن، د ؤياد دا ئتشاهاد غيفس لخاضر د ئخميمن نّسن، مرّا ئلامّاثن مرّا أر ئتدافاع غيفسن.
16 أياد ئدّا أد ئباين ݣ واسّ نّاݣ ئدّا ربّي أد ئحكم خف ؤينّا يلان ݣ وولاون ن ميدن ميمش دا ئتيني لينجيل ن عيسى لمسيح نّاس دا تبشّارخ.
ؤداين د شرع
17 ئد شݣين ئتّينين ݣ-ئخف نّش ئس تݣيث ؤداي أرتعوّالت خف شّرع، أر تعنّات س ربّي،
18 أر تّيسينت لموراض نّس، أر تميّازث ئسكّين ژيلنين س-ؤينّا تعلمتّ زݣ شّرع.
19 يلي غورش ليقين ݣ ئخف نّش ئس دا تسنعاث أبريد ئ ئدرغالن، تݣث أسيد ئ وينّا لّانين ݣ تالّست،
20 أر تسْربَّات وينّا ؤر دا يتفهامن أر تسغراث ئمژيان، ئتّخ ثلا غورش توسنا د لحقّ ناݣلان ݣ شّرع.
21 ئوا شݣ ئتعلّامن ميدّن ماخ ألّيݣ ؤر دا تسعلّامت ئخف نّش؟ شݣين ئتوصّان ؤر تّيلي توكرضا، ئس ؤردا تّاشرث؟
22 شݣين ئسّحرامن لفساد ماخ ئس ؤردا تّفساد؟ د شݣين ئتشراهن لاصنام، ئس ؤردا ثن تّاشرث ݣ وانّسيون نّاݣ لّان حما أتن زنزت؟
23 شݣين نّا دا ئتعنان س شّرع ئس ؤر دا تشواهث س صورث ن ربّي أداي دا تعصوت شّرع؟
24 ئمشينا ئتيارو ݣ لشتاب ن ربّي : "خف نّيرت نّون أس ئتيونّا واوال ن لكفر خف ئسم ن ربّي ئنݣر ن لݣنوس ؤر ݣينين ؤداين.
25 ئتّخ أزيّن (معنى لختانا) دا يتّنفاع مش دا تكاث س شّرع، والاينّي مش ثخالفث شّرع أزيّن نّش أمّي ؤر دجين ئلّي.
26 ئوا مش ئلّا شان يون ؤر ئزيينن أر ئتݣا س لفرايض ن شّرع، ئس ؤر ثيتحاساب ربّي أم وينّا ئزينن؟
27 ئد ونّا ؤر ئزيّين والاينّي دا يتّݣا س شّرع، أد ئحكم غيفش شݣين، نّا غر ئلّا لشتاب ن موسى دوزيّن أها ؤر دا تݣاث س شّرع.
28 ئتّخ ؤداي نا ئحقان ؤر-ئد س دّات أس ئݣا ؤداي، ئد أزيّن ئتّضهارن ݣ دّات، ؤر ئد أزيّن أينّا.
29 والاينّي ؤداي أحقاقي ئباين يجاج ن وول نّس، ئد ازين ئݣات ازين ن وول س رّوح ن ربّي، ؤر ئد س شّرع ئتيارون. أيا ؤر دا ت تشكارن ميدّن والاينّي ربّي أيدا ت-ئتشكارن.