57
ثامديازث ثيسّ 57
ئي وخاثار ن ـ ئمديازن. س ـ لّغا ن ـ " أد ؤر خلّو". ثايفّارث ن ـ داوود لّيݣ ئرول زݣ شاوول ئفّراس ݣ ـ ئفري.
1 رحمي يا ربّي رحمي،
ئدّخ شݣ أمي أغخ أمور،
د ـ ݣ ـ دّاو ن ـ وافريون نّش أݣ دا سّنثالخ
أر ثزري ثمزاكّيث.
2 دا قّارخ ئي ربّي أنافلّا،
ئي ربّي نّا دا غيفي ئتشمّالن س ـ ؤينّا يژيلن.
3 ئدّا أد ئي دّيازن أفوكّا زݣ ييݣنّا،
أها يسّحشم وينّا دا يي تّركّاشنين،
(أسݣونفا)a.
ربّي دا ديتّازن لامين نّس د ـ ثايري نّس نّا ؤر دا يتّقضون.
4 مّوترن غيفي ئزماون،
محضخ ئنݣر ن ـ ميدّن ݣانين أمّ لوحوش؛
ؤخسان نسن أمّ ثفاليوين د ـ ثانّبلين،
ئلّساون نسن أمّ ثفروثين ئشوان.
5 كّد أربّي نّيݣ ن ـ ئݣنوان،
ثسّيليد لعزّ نّش نّيݣ ن ـ دّونيث س ـ ماس ثلّا.
6 ݣران ثاراتّسا دّاو ن ـ ئضارّ ئنو،
ران أد ئي رژين ئدامّن ݣ ـ وودم.
غزاني ثاسرّيفث
ئميل نثني أي تّين ياغن.
(أسݣونفا)
7 ؤول ئنو ئهنّا يا ربّي،
ئهنّا وول ئنو.
دّيخ أداش تنشّادخ أر تّينيخ ثيمديازين.
8 فافاد أييخف ئنو.
فافاد أسّنيترا د ـ لوطار.
هاثين دّيخ أدّ سفافاخ أنقّر.
9 دّيخ أش تّحمادخ أمولانا ئنݣر ن ـ ميدّن،
أراش تّينيخ ثيمديازن ئنݣر ن ـ لݣنوس.
10 ئدّخ ثايري نّش نّا ؤر دا يتقضون ثمقّور ثيوضنّ ئݣنوان،
د ـ لامين نّش ييوضن ئسيݣنو.
11 كّد أربّي نّيݣ ن ـ ئݣنوان،
ثسّيليد لعزّ نّش نّيݣ ن ـ دّونيث س ـ ماس ثلّا.