24
1 ئيعاود لغضب ن ربّي ئيحمو خف إسرائيل، ئسحورش غيفسن دَاوُد ئنّاياس: «دّو حاسب إسرائيل د يهوذا».
2 ئنّاس ؤݣلّيد يي يوآب لكمندار ن لعسكر نّا ئيتس ئيلاّن، ضور عفاش ݣ ثقبيلين كول ن-إسرائيل ثحاسبث شعب، أد ئيسينخ لعدد نّس.
3 ئنّاس يوآب يي ؤݣلّيد: «أد ئيزايد ربّي نّش ݣ شعب أم نيتني ميّا ن تيكّلت، أر د تنّايث س والن نّش أسيدي أݣلّيد. ئيوا ماخ ألّيݣ ثفرحث يي لامر-آد أسيدي؟»
4 ئزايد ؤݣلّيد ئوكّد خف يوآب د خف لكمندرات ن لعسكر ئيفغ يوآب د لكمندرات ن لعسكر زݣ داث ن-ؤݣلّيد أد حاسبن شعب ن-إسرائيل.
5 نضون أسيف ن لأردن، خيمن ݣ عَرُوعِير ݣ أويفّاس ن ثمدينت نّا ئيلاّن ݣ وامّاس ن واسيف ن جاد ئمقبال ثمدينث ن يعزير.
6 دّوند غر جلعاد تمازيرت ن تحتيم حودشي، دّون غر دان يعن، ضور غر صيدون.
7 أوضنن لصْوار ن ثمدينث ن صور د ثتمدينين كول ن-ئيحيوّين د-ئكنعانيين، فغند غر دّاو ن يهوذا، غر بير شبع.
8 سّاراند تمازيرت كول، عايدند ݣ ؤشمل ن تسعا ن وايورن د عشرين واسّ، غر لقدس.
9 ئش يوآب لعدد ن لحساب ن شعب ئ-ؤݣلّيد، يافن إسرائيل ديݣس ثمنميا تالف ن-ؤرياز جهدنين قادّان أد اسين أسلاح، د-ئريزن ن يهوذا خمسميا تالف ن-ؤرياز.
10 ئحرّش وُول ن دَاوُد ضارث ن-ؤحاسب ن شعب. ئنّاس دَاوُد يي ربّي: «خضيخ شيݣان ݣ-ؤينّا ݣيخ دغي أربّي محو عفاش دّنب ن-ئسمخ نّش ئتخ س تيحّيط ثخاثارت نّا ݣيخ».
11 ئكرد دَاوُد ݣ ثيفاوت، يافد أوال ن ربّي غر جاد ئݣان نّبي أمكاشف ن دَاوُد ئنّا:
12 «دّو ثينيثاس يي دَاوُد: «ئمشيتخ أيدا ئتيني ربّي: شراط لحوايج أيدا ش تّينيخ خثار يي ئخف نّش يوث زݣ ديݣسنث أد-اشت ئيخ».
13 ئدّود جاد غر دَاوُد ئيعلماس ئينّا: «ئيد أد يلي لاژ سبعا ن-ئيسݣاسن ݣ تمازيرت نّش، ميد شراض وايور أيد ترݣلد داث ئيعداون نّش أها أر ش تفّورن، ميد شراض وُوسّان ن واطّان ي تمازيرث نّش، ئيوا دغي ئسين تحقّاد ماتّا لجواب ترراخ يي مايديد يوزن».
14 ئنّاس دَاوُد يي جاد: «ئيژيْري لحال شيݣان أناتّوي عفاش ݣ أوفوس يي ربّي ئتخ تعدّا رحمث نّس، أدور تتّوتويخ ݣ أوفوس ن بنادم».
15 ئش ربّي أطّان ݣ إسرائيل زݣ ثيفاوت أر لوقت ن لميعاد، ئمّث زݣ شعب زݣ دان أر بير شبع سبعين ألف ن-ؤرياز.
16 يازن لملاك أفوس نّس غر ؤورشليم أتيوث، ئيمݣراز ربّي خف ؤوينّا ؤر ئحلين، ئنّاس يي لملاك ئكّاثن شعب: «بركا دغي رار أفوس نش». يلي لملاك ثمان ن-ؤنرار ن أَرُونَةُ أيابوسي.
17 ئساول دَاوُد يي ربّي أينّا ݣ ينّاي لملاك ئيكّاثن شعب ئينّا: «هايي نك خضيخ، هايي دنبخ، ئد ئيشروانا مايد ئݣان؟ عفاش ثيثي ن-ؤفوس نّش أت تيلي غيفي د خف ثادّارت ن بّا».
18 ئدّود جاد ݣ واسّ نّا غر دَاوُد ئنّاس: «ݣعد ثعدلد أسغرص يي ربّي ݣ ؤنرار ن أَرُونَةُ أيابوسي».
19 يالي دَاوُد ئيݣ أم ؤينّا س-ئيوصّا ربّي جاد.
20 ئسّيݣ أَرُونَةُ يانّاي أݣلّيد د-ئيسمخان نّس نضوند غورس، ئيفغد أَرُونَةُ ئسجد يي ؤݣلّيد خف وُودم نّس غر أشال.
21 ئينّا أَرُونَةُ: «ماخف ديدّا سيدي غر ئسمخ نّس؟» ئنّاس دَاوُد: «حما أد سغخ زݣ غورش أنرار أد بنوخ ديݣس أسغرص يي ربّي أت تبد تيتي خف شعب».
22 ئنّاس أَرُونَةُ يي دَاوُد: «أمژث أسيدي أݣلّيد ثسّاليد أينّاش ديوسان ئيغودا داث والن نّش. حقّا هاش ئيزيار يي تمغراص ئتغوسن، دوسفرض ن-وروا د لقوام ن-يزيار يي كشّوضن».
23 كولشي ئيشات أَرُونَةُ بوشّي يي ؤݣلّيد، ئينّا أَرُونَةُ يي ؤݣلّيد: «ربّي نّش أد غيفش ئيرضُو».
24 ئنّاس ؤݣلّيد يي أَرُونَةُ: «لا، والاينّي مسوغت أيد نّيخ أد سغخ زݣ غورش س تّمان، ؤر سّالايخ يي ربّي نُو تيمغراص ئيتغوسن باطل». ئسغ دَاوُد أنرار د ئزݣار أتّاين ن ستميا تݣرام ن لفضّا.
25 يبنو دَاوُد أسغرص يي ربّي ئسّالي تيمغراص ئيتغوسن د تمغراص ن لمان، داي حنّا ربّي زݣ جّيهث ن تمازيرت، ئيبد واطّان إسرائيل.