7
1 ألّيݣ ئيزدغ ؤݣلّيد ݣ تادّارث نّس، ئسهنّاث ربّي زݣ كول ثانيلا ن-ئيعداون نّس نّا س-ئيدور.
2 ئنّاياس ؤݣلّيد يي نّبي ناثان: «حقّا». ها نك زدغخ ݣ تدّارث ن-ئيثݣل ئد تّابوث ن ربّي ئيزدغ ݣ ومّاس ن ثخامث.
3 ئنّاياس ناثان يي ؤݣلّيد: «ئݣ كول أينّاش ئرا ؤول، ئتخ ربّي ئلاّ ديدش».
4 ݣ ييض نّاݣ ئساول ربّي غر ناثان ئنّاياس:
5 «دّو ثينيثاس يي ئسمغ ئينو دَاوُد، أياد أيداي تّيني ربّي: ؤر ئد شݣ أيي ئبنّون تدّارث نّاي زدغخ؟
6 ئتخ ؤر دجين زديغخ ݣ تدّارث زݣ مايد سوفغخ أرّاو ن-إسرائيل زݣ مصر أر أسّا، والاينّي كّيخ لاترحالخ ئتسن دايمن أك ماني غر دان.
7 ݣ رحيل ئنو كول د ورّاو ن-إسرائيل، ؤر دجين نّيخ يي أود يون زݣ ئخثار نّا يومرخ أد كسين إسرائيل شعب ئنو: ماخ أليݣ ؤور يي ثبنيث ثدارث زݣ ئثݣل؟
8 دغي أياتخ أس تنيث يي ئسمغ ئنو دَاوُد: أياد أيد ئنّا ربّي ناݣ قدان: "نك ئويخشيد زݣ تزريبث، فير ن وولي، أتݣث أنبّاض خف شعب ئنو إسرائيل.
9 ئليخ أݣيدش كول أينّا غر ثدّيث، محوخ ئيعداون نّش دثاش، ݣيخش د ئسم أختار أم ئسم ن-ئخثار نّاݣ لاّن ݣ دّونيت.
10 جّوجدخ أدغار يي شعب ئنو إسرائيل زرعخت جما أد زدغن ديݣس أها ؤر ئتّوزعزاع ياد ولا أدجخ ئعداون أكن مرمدن أم ؤينّا ؤنݣان ݣ ؤمزوارو.
11 زݣ واس نّا ي عينخ ئد لقاضي خف شعب ئنو إسرائيل أك سهنّاخ زݣ ئعداون نّش كول أها ئعلماش ربّي ئس ئدّا أد ئسبد ئݣلدان زݣ ثريكث نّش فّيراش.
12 أدّاي شملن ووسّان نّش ثمّت أدرناش تاما ن لواليدين نّش، دّيخ أد شخ ثانباط يي زرّيعث نّش نّا ديدّان ضراش. نّا ئدّان أد ئيفغ زݣ ترّيكث نّش، صرصّاخ ثانباط ن تݣلديث نّس.
13 نتّا أݣ دّان أد ئبنو تادّارث خف ئسم ئنو أها ثبتخ لعرش نّس أبدا ن دّونيت.
14 نك أد ݣخ بّانس د نتّا أد ئݣ ممّي. مش ئݣا أينّا ؤر ئحلين أت تربّاخ س ؤمعراض ن ميدن أمّي دا ث ثكّاثخ س-ؤفوس ئنو.
15 ئد رحمث ئنو ؤسار زّيكس ثفّيغ ئمشينّا تسّوفغخ زݣ شاول نّا كسخ زݣ دثاش.
16 تبتخ ثاروا نّش د تݣلديث نّش أبدا ن دّونيت داثي د لعرش نّش أد يلي ئثبث أبدا».
17 س-ؤياد أس ئسيول ناثان يي داود س كول ئواليونّا د ؤينا س-ئضهر كول.
18 ئكشجم ؤݣلّيد دَاوُد ئقّيم داث ن ربّي أها ئنّا: «مايد مسخ نك أسيدي ربّي؟ د مايد سوان أيت تادّارث ئنو ألّيݣ يي تّيويث غر دا؟
19 ئدروس ؤياد كول ݣ والّن نّش أسيدي ربّي، ثغريثي ألّو، نك ئسمغ نّش، حما أت تدام تريكث ئنو يان زمان ئغزيفن، زݣ مشثاد أيا لقاعيدا ن بنادم أياد أسيدي ربّي.
20 مايد ئتزاياد داود أداش ييني شݣ أسيدي ربّي، ثسنث ئسمغ نّش.
21 س لفضل ن لعاهد د ثايري ن وول نّش أس ثݣيث أيا ناݣ مقّور أها ثسعالمثيي غيفس.
22 خف ؤياد ؤر ئيلّي ماك يوݣر أسيدي ربّي، ئتخ ؤر ئيلّي أم شݣ، ؤر ئلّي شان ربّي بلا شݣ ݣ كول أينّا مي نسلا س-ئمجّان نّخ.
23 ؤر ئلّي شان لقوم ݣ دّونيت ئݣان أم شعب نّش إسرائيل نا ثخثارث يي ئخف نّش، ثݣثاس ئسم ثݣثاسن لموعجيزاث ثيخثارين ئسخلاعن ثزعث دات-اسن ثيقبلين د ئد ربّي نّسن.
24 تسرصّاث يي ئخف نّش ثاروا ن-إسرائيل أد ݣين شعب نّش أبدا ن دّونيت د شݣ أربّي تݣيد ربّي نّسن.
25 دغي، أربّي قّيم ݣ لعاهد نّش أر أبدا، لعاهد نّا س يي تواعت نك د ترّيكث ئنو، ثݣيث س-ؤينا س ثنّيث.
26 أد ئمغور ئسم نّش أبدا، أها ئتيونّا: ربّي ئقدّان نتّا أݣان ربّي ن-إسرائيل. ئد تادّارث ن-ئسمغ نّش داود أت ترصّا داثاش.
27 ئتخ شݣ أربّي مولانا، ربّي ن-إسرائيل، ثعلمث س-ؤياد سلّيخث أليݣ ثنّيث: أداش بنوخ تدّارت، س-ؤيا أس ئشّجع وول ئنو، نك ئسمغ نّش ئران أداش ئژال ثاژاليت-اد.
28 دغي أسيدي ربّي شݣ أيد ئݣان ربّي، شݣ أݣان ربّي أوال نّش ئصحا، د شݣ أيي شان لعاهدا نّاݣ غودان.
29 دغي، رضو ثبارشث تدّارث ن-ئسمغ نّش أتّيلي دثاش أبدا، ئتخ شݣ أسيدي ربّي تسيولث س لبركاث نّش أس دا توبارش تادّارث ن-ئسمغ نّش أبدا ن دّونيت!»