Sangangaa niinsani mampopontani Inosa ni Pue Ala ai inosa nu tomadaa
4
1 Poka-poka anu kupokaasi! Inee mpuu sira nipotuu ope-ope tau anu manguli, kariana Inosa ni Pue Ala si sira. Nipeita lompe sala sira, ba monso-monso mpuu lako si Pue Ala sira, ba baria. Lawi imba ngkida, ria sira nabi anu mepakawuli. 2 Ei anu mopakanotoka kita ima anu nakuasai nu Inosa ni Pue Ala: sira etumo tau anu mopangaku ka i Yesu Kerisituna anu mai i dunia mewali manusia, tau etu napoanamo sira ni Pue Ala. 3 Ope-ope tau anu baria mopangaku ka i Yesu Kerisituna ana ni Pue Ala, tau aretumo anu nakuasai nu inosa anu lako i iwali ni Kerisitu. Niepemo patudu anu manguli kaina dongkana iwali ni Kerisitu, ai ei-ei riamo i rara dunia.4 Agaiana komi anaku, napoanamo komi ni Pue Ala, ai ninangimo sira nabi anu mepakawuli aretu, lawi melumbu kuasa nu Inosa Magali anu ria i rarami mpane lako inosa anu lako i iwali ni Kerisitu. 5 Nabi anu mepakawuli aretu, lako i dunia anu madaa ei. Etumo mpane patudura mensuwu mbui lako i dunia anu madaa. Mpane tau anu baria sira mepotuu si Pue, siramo anu mampetingai ai mampeulai patudura. 6 Agaiana kita napoanamo kita ni Pue Ala. Mpane tau anu manginsani i Pue Ala, sira anu mampetingai ai mampeulai patuduki. Tau anu baria sira napoana ni Pue Ala, baria sira mampeulai patuduki. Etu anu mopakanotoka kita kaimana anu nakuasai nu Inosa ni Pue Ala, anu mopadongka patudu anu mamonso, ai kaimana anu nakuasai nu inosa anu mepakawuli.
Mombepokaasi komi lawi napokaasi komi ni Pue Ala
7 Poka-poka anu kupokaasi! Mombepokaasi kita sadua ai sadua, lawi asi mepuu lako si Pue Ala. Ope-ope tau anu mampokaasi rangara, sira anu napoana ni Pue Ala ai anu manginsani i Pue Ala. 8 Tau anu baria sira mampokaasi rangara, baria mani sira manginsani i Pue Ala, lawi i Pue Ala iamo asi. 9 Eimo dala ni Pue Ala mopatongawa asiNa si kita: Ana saduduaNa Natudu mai i dunia, bona lako i AnaNa etu, mansumba kita katuwu. 10 Eimo anu rauli asi: baria kita anu mpolinguruna mampokaasi i Pue Ala, agaiana i Pue Alada anu mpolinguruna mampokaasi kita, duduuna motudu mai AnaNa mewali pasuru nu wotota bona teampuni dosata.
11 Poka-poka anu kupokaasi, ewa etumo kabosena asi ni Pue Ala si kita! Etumo mpane sangangaa mombepokaasi mbui kita sadua ai sadua. 12 Baria mani ria sadua anu mangita i Pue Ala. Agaiana nauda ewa etu, ane mombepokaasi kita sadua ai sadua, i Pue Ala mosintuwu liliu ai kita, ai tetambai asiNa i rara nu katuwuta duduuna bariamo ria kamakurana.
13 Mosintuwumo kita ai i Pue Ala, ai i Pue Ala mosintuwu ai kita. Etu tainsani lawi Nakiraka kita InosaNa anu magali. 14 Kami anu mewali suroNa, kiitamo Ana ni Pue Ala, ai kisabikimo ka Iana anu natudu mai ni Pue Ala Tuamata mewali Datu Topesorema i tau i dunia. 15 Ima anu mopangaku ka i Yesuna Ana ni Pue Ala, i Pue Ala mosintuwu ai ia, ia mbui mosintuwu ai i Pue Ala. 16 Tainsanimo ai tapotuu asi ni Pue Ala si kita.
I Pue Ala iamo asi. Mewali, ima anu mampokaasi liliu pokana, iamo anu mosintuwu ai i Pue Ala, ai i Pue Ala mosintuwu ai ia. 17 Ane asi ni Pue Ala baria ria kamakurana si kita, baria kita maeka mampombelioka i Pue Ala i eo pobotusi kasopoa dunia. Lawi apa anu tababei i rara dunia ei mangula apa anu nababei ni Kerisitu. 18 Ane tainsani mpuu asi ni Pue Ala si kita mpane tapokaasi pokata, bariamo kita maeka mampombelioka i Pue Ala i eo pobotusi i kasopoa dunia. Lawi asi anu baria ria kamakurana mopakatonto kaekata. Mewali ane tapokaeka mani kaina nasukuta ni Pue Ala, lempona baria mani kita manginsani asiNa si kita.
19 Mampokaasi kita i Pue Ala ai pokata, lawi i Pue Ala anu mpolinguruna mampokaasi kita. 20 Ima anu manguli, “Kupokaasi i Pue Ala,” agaiana mokasisi ia pokana, tau etu modongko. Lawi ane baria ia mampokaasi pokana anu naita, apa mani i Pue Ala anu baria naita. 21 Mewali, eimo parenta ni Kerisitu si kita: ima anu mampokaasi i Pue Ala, sangangaa mampokaasi mbui ia pokana.