3
1 Mabose mpuu asi ni Pue Ala Tuamata si kita, etumo mpane Naimbamo kita anaNa, ai monso-monso mpuu ana ni Pue Ala kita. Tau anu baria mepotuu si Yesu baria manginsani ka kitana ana ni Pue Ala, lawi baria sira manginsani i Pue Ala. 2 Poka-poka anu kupokaasi! Ei-ei, ana ni Pue Alamo kita. Agaiana baria mani tainsani ba adiwa luwu kita i eo anu ina mai, lawi baria mani kita rapopainsanika. Agaiana anu tainsani: ane dongka mpesola i Kerisitu, kita ina mewali ewa Ia, lawi ina taita mpuu adiwa kamonso-monsona Ia. 3 Mpane ope-ope tau anu ria pesarumakara etu si Ia, rapari-parira mokaraosi babeia anu madaa, bona magali katuwura ewa kamagali ni Kerisitu.4 Ope-ope tau anu mobabei dosa, moliungi sira parenta ni Pue Ala. Lawi anu rauli dosa iamo poliungita parenta ni Pue Ala. 5 Ai niinsani mpuu, tunggaia ni Yesu dongka i dunia ei, bona mai mobakosi dosa nu manusia. Agaiana Ia saduduaNa baria ria dosaNa. 6 Mewali, ope-ope tau anu mosintuwu ai Ia, bariamo sira mobabei dosa. Ope-ope tau anu mobabei liliu dosa, baria sira mangita ba manginsani i Yesu.
7 Komi anaku, inee mpuu sira nipogeaka tau mopakanawu komi. Tau anu mobabei peundea ni Pue Ala, siramo anu napoana ni Pue Ala ewa i Yesu. 8 Tau anu mobabei liliu dosa, napoana sira Datu nu Seta. Lawi Datu nu Seta iamo anu madosa lako i mpolinguruna. Eimo tunggaia nu Ana ni Pue Ala dongka i dunia, bona mopakaropu bago Datu nu Seta.
9 Ope-ope tau anu napoana ni Pue Ala, bariamo sira mobabei dosa, lawi pangkeniaka ni Pue Ala ria liliu i rarara. Bariamo sira pensani mobabei dosa, lawi napoanamo sira ni Pue Ala. 10 Eimo anu mopatongawa kaimana anu napoana ni Pue Ala, ai kaimana anu napoana Datu nu Seta: ope-ope tau anu baria mobabei apa anu manoto, baria sira napoana ni Pue Ala. Ewa etu mbui, ope-ope tau anu baria mampokaasi pokara, baria mbui sira napoana ni Pue Ala.
Kita ana ni Pue Ala sangangaa mombepokaasi kita
11 Eimo bambari anu niepe lako ni mpolinguruna: sangangaa mombepokaasi kita sadua ai sadua. 12 Inee kita mampeulai babeia ni Kai ni banimpia. I Kai etu napoana Datu nu Seta, duduuna mampopate toina. Mangkiada mpane mampopate ia toina? Lawi ope-ope babeiana madaa, agaiana babeia nu toina manoto i petotoki ni Pue Ala. 13 Mewali poka-poka, inee nipowuli ane rakasisi komi nu tau, anu baria sira mepotuu si Yesu. 14 Ane tapokaasi pokata, tainsani katepawiata lako i kamate mpane mansumba kita katuwu malompe anu baria mokasopoa. Tau anu baria mampokaasi pokara, baria mani sira tepawia lako i kamate. 15 Ima anu mokasisi pokana, iamo topepopate. Ai niinsani mpuu poka-poka: baria ria topepopate anu mansumba katuwu malompe anu baria mokasopoa.
16 Ei anu mopatongawaka kita apa anu rauli asi: i Yesu mosusumo katuwuNa bona mansumba kita katuwu malompe. Mewali, kita mbui sangangaa mosusu katuwuta bona motulungi pokata. 17 Pandirina, ria sadua tau anu malompe katuwuna, mangita ia pokana anu mesiasi katuwuna. Ane tau etu mampokabosikada apa anu naparaluu nu pokana, mewali ane ewa etu, baria ria asi ni Pue Ala i rara nu tau etu. 18 Komi anaku, inee wule i pololitata maasi. Sangangaa tapatongawa kamaasita i babeiata, lawi etumo asi anu mamonso.
Inee kita maeka mogompilisi i Pue Ala
19 Etumo anu mopatongawa ka kitana ana ni Pue Ala, ai malene rarata mampombelioka i Pue Ala. 20 Ane baria malene rarata nakeningka tainsanina salata, inee kita maeka, lawi nainsani ni Pue Ala ope-ope katuwuta, ai asiNa si kita melumbu lako i rarata anu mosasalai kita. 21 Mewali, poka-poka anu kupokaasi, ane bariamo kita nasasalai nu rarata, pebaimo kita mogompilisi i Pue Ala, 22 ai apa anu taperade si Ia batena Nakiraka kita, lawi mampeulai kita parentaNa ai mobabei kita apa anu mopakatono raraNa. 23 Eimo parentaNa si kita: sangangaa mepotuu kita si Yesu Kerisitu AnaNa, ai sangangaa mombepokaasi kita sadua ai sadua. Etu anu napaguruka kita ni Pue Yesu.
24 Tau anu mangula parenta ni Pue Ala, mosintuwu liliu sira ai i Pue Ala, ai i Pue Ala mbui mosintuwu ai sira. Etu tainsani, lawi i Pue Ala mokiraka kita InosaNa.