I Kerisitu anu motulungi kita
2
1 Komi anaku, etumo mpane kuuki ei, bona inee komi mobabei dosa. Agaiana ane ria anu mobabei dosa, ria sadua anu mewali topetongo-tongoita anu mamperurui kita i lio ni Pue Ala Tuamata, iamo i Yesu Kerisitu anu manoto. 2 Ai Iamo anu mamate mewali pasuru nu wotota bona i Pue Ala moampuni dosata. Ai baria wule dosata anu Nasuru, agaiana dosa nu tau wori mbui i sumalele dunia.3 Ane tapeulai parenta ni Pue Ala, etu anu mopakanoto mpuu ka tainsanina i Pue Ala. 4 Tau anu manguli, “Kuinsanimo i Pue Ala,” agaiana baria sira mampeulai parentaNa, modongko sira ai baria sira mopairara patudu anu mamonso. 5 Tau anu mangula Ngkora ni Pue Ala, sira etumo anu monso-monso mampokaasi i Pue Ala. Ai anu mopatongawa posintuwuta ai i Pue Ala. 6 Ima-ima anu manguli mosintuwu sira ai i Pue Ala, babeiara sangangaa ewa babeia ni Kerisitu.
Sawaa anu bou
7 Poka-poka anu kupokaasi, sawaa anu kuukika komi ei, baria parenta anu bou. Sawaa ei, masaemo rapadongka si komi. Sawaa ei iamo bambari anu masaemo niepe anu mopatuduka komi bona mombepokaasi komi sadua ai sadua. 8 Agaiana nauda ewa etu, batena kuukika komi parenta ei ewa parenta anu bou. Sawaa ei tongawamo kamonsona i rara nu katuwu ni Yesu ai i rara nu katuwumi, lawi kamadedi ina paiamo, mpane kamabaa mepuu mewangka.
9 Tau anu manguli tuwu sira i rara nu kamabaana, agaiana mokasisi sira pokara, batena tuwu mani sira i rara nu kadediana. 10 Tau anu mampokaasi pokara, tuwu sira i rara nu kamabaa, ai baria ria anu mopakanawu sira.a 11 Tau anu mokasisi pokara, batena tuwu mani sira i kadediana ai baria rainsanira imba kalauaara, lawi kadedi etu mopakabilo sira.
12 Komi anaku, kuukika komi sura ei,
lawi teampunimo dosami nakeningka i Pue Yesuna.
13 Uma-uma, kuukika komi sura ei,
lawi niinsanimo Ia anu ria lako ni mpolinguruna.
Ope-ope anantomoane ai anantowawine, kuukika komi sura ei,
lawi ninangimo Datu nu Seta.
14 Komi anakoi kuukika komi,
lawi niinsanimo i Pue Ala Tuamata.
Komi uma-uma kuukika komi,
lawi niinsanimo Ia, anu riamo lako ni mpolinguruna.
Komi anantomoane ai anantowawine kuukika komi,
lawi marosomo pepotuumi,
nipairara liliu Ngkora ni Pue Ala,
ai ninangimo Datu nu Seta.
15 Inee komi mampomabose apa anu ria i dunia ei. Ima anu mampomabose anu-anu dunia ei, baria sira mampokaasi i Pue Ala Tuamata. 16 Lawi ope-ope anu ria i rara dunia ei, iamo peundea nu rarata anu madaa, apa anu taita ai tapokailu, ai apa anu moparia pampemaboseta; ope-ope etu baria lako si Pue Ala Tuamata, batena lako i dunia. 17 Mpane dunia ei mepuumo magero simbela-mbela ai sinangka isina anu naunde nu manusia. Agaiana tau anu mangula peundea ni Pue Ala batena tuwu duduuna kasae-saeana.
Inee komi mepotuu i patudu anu mosapuaka ka i Yesuna Datu Topesorema
18 Komi anaku, bariamo masae ina dongka kasopoa dunia. Rapatudukamo komi kaina dongkana iwali ni Kerisitu i kasopoa dunia. Ai ei-ei dongkamo sira tau wori anu mampoiwali i Kerisitu. Etumo mpane tongawa mpuu kadongkanamo kasopoa dunia. 19 Iwali ni Kerisitu etu ria i olota ni banimpia, agaiana kamonsona baria sira rangata. Etumo mpane lambumo sira mopatani lako si kita. Ane rapana monso-monso rangata mpuu sira, ketuwu liliu sira simbela-mbela ai kita. Agaiana megaakimo sira lako si kita, etumo mpane manoto kabariara mpuu mogalo sadua anu simbela-mbela ai kita.
20 Agaiana komi poka-poka, nidokomo Inosa Magali anu lako si Kerisitu. Etumo mpane niinsanimo ope-ope patudu anu mamonso. 21 Mewali, tunggaiaku moukika komi sura ei baria nakeningkabariana niinsani patudu anu mamonso. Kuukika komi sura ei, lawi niinsanimo patudu anu mamonso, ai niinsanimo mbui kabariana ria dongko i rara nu patudu etu.
22 Ima anu modongko? Anu modongko, iamo tau anu mosapuaka sira ka i Yesuna Datu Topesorema. Siramo iwali ni Kerisitu, lawi mosapuaka sira i Pue Ala Tuamata ai i Yesu AnaNa. 23 Tau anu mosapuaka Ana ni Pue Ala, baria ria posintuwura ai i Pue Ala Tuamata. Tau anu mopangaku ka i Yesuna Ana ni Pue Ala, mosintuwu mbui sira ai i Pue Ala Tuamata.
24 Mewali, poka-poka, bambari anu niepe lako ni mpolinguruna etu, sangangaa nipairara liliu. Ane nipairara liliu bambari etu, ina mosintuwu komi ai i Pue Ala Tuamata ai i Yesu AnaNa. 25 Ai eimo dandiNa si kita: iamo katuwu malompe anu baria mokasopoa.
26 Kuukika komi sura ei kono i tau anu mampenoka mopakanawu komi. 27 Agaiana poka-poka, Inosa Magali anu lako si Kerisitu riamo i rarami. Bariamo komi paraluu rapaguru nu tau ntanina, lawi Inosa Magali etu anu mopaguru komi i sinangkana. Manotomo ope-ope patuduNa, baria dongko. Mewali, mosintuwu liliumo komi ai i Kerisitu mangula apa anu Napatuduka komi.
28 Kaliliuana anaku, sangangaa mosintuwu liliu kita ai i Kerisitu, bona ane dongka mpesola luwu Ia, pebai kita mampombelioka Ia, ai bariamo kita maea Nakadongkai. 29 Poka-poka niinsani mpuu i Kerisitu mobabei liliu peundea ni Pue Ala. Etumo mpane niinsani mbui: ope-ope tau anu mobabei liliu peundea ni Pue Ala, napoana sira ni Pue Ala.