Pepotuuta si Yesu monangi kuasa i dunia ei
5
1 Ope-ope tau anu mampotuu ka i Yesuna Datu Topesorema, sira anu napoana ni Pue Ala. Mpane ima anu mampokaasi i Pue Ala Tuamata, batena mampokaasi mbui ope-ope tau anu napoana ni Pue Ala. 2 Ane tapokaasi i Pue Ala ai tapeulai parentaNa, lempona mampokaasi mbui kita tau anu napoana sira ni Pue Ala. 3 Lawi ane tapokaasi i Pue Ala, lempona mampeulai kita parentaNa. Ai parentaNa etu, baria mapari tapeulai. 4 Lawi ope-ope tau anu napoana ni Pue Ala, monangi sira sinangkana anu madaa i dunia ei. Nakenimpepotuuta, monangi kita sinangkana anu madaa. 5 Ima anu monangi sinangkana anu madaa i dunia ei? Batena ngkida tau anu mampotuu ka i Yesuna Ana ni Pue Ala.I Yesu iamo Ana ni Pue Ala anu mewali manusia ai anu mokiraka kita katuwu malompe
6 I Yesu Kerisitu iamo Ana ni Pue Ala anu mai i dunia. Iamo anu rariu ai ue ai anu mabubu raaNa i kau anu rapopombesape. Mewali, manotomo ka Iana Ana ni Pue Ala, baria wule rariu agaiana rapopate mbui. Mpane Inosa Magali mbui mopakanoto ka i Yesuna Ana ni Pue Ala, ai apa anu nauli nu Inosa Magali etu, batena mpuu mamonso.
7-8 Mewali, ria tolu mpangkana anu mopakanotoka kita ka i Yesuna Ana ni Pue Ala: Inosa Magali, ue anu rapoperiu mpane raa ni Yesu i kamateNa.a Anu tolu mpangkana etu simbela tunggaiana: mopakanotoka kita ka Iana Ana ni Pue Ala. 9 I Pue Ala saduduaNa anu mosabiki AnaNa. Ane tapotuu pesabiki nu manusia, pelumbunamo pesabiki ni Pue. 10 Etumo mpane, tau anu mepotuu i Ana ni Pue Ala, rainsanira i rarara kamonsona pesabiki etu. Ima-ima anu baria mampotuu i Pue Ala, mampopodongko sira i Pue Ala, lawi baria sira mampotuu pesabiki anu mampololita kono i AnaNa.
11 Eimo pesabiki ni Pue Ala: Nakiraka kita katuwu malompe anu baria mokasopoa, ai katuwu etu, ria i AnaNa. 12 Ima-ima ngkida anu mosintuwu ai AnaNa, mansumba sira katuwu anu malompe. Ima-ima ngkida anu baria mosintuwu ai Ana ni Pue Ala, baria sira mansumba katuwu anu malompe.
Katuwu malompe anu baria mokasopoa
13 Sura ei kuukika komi anu mepotuu i Ana ni Pue Ala bona niinsani mpuu kamansumbamimo katuwu malompe anu baria mokasopoa.
14 Ai pebai kita mekakae si Pue Ala, lawi tainsani kaina Naepena pamperadeta, asala pamperadeta mangula peundeaNa. 15 Ane tainsani ka Naepena pamperadeta, tainsani mbui pansumbata apa anu taperade si Ia.
16 Ane niita sadua tau anu sempepepotuumi mobabei dosa, iamo dosa anu baria mangkeni kamate anu baria mokasopoa, sangangaa nipekakaeka kowo ia, bona i Pue Ala mokiraka katuwu malompe anu baria mokasopoa etu si ia. Anu kutunggai ei iamo tau anu mobabei sira dosa anu baria mangkeni kamate anu baria mokasopoa. Agaiana ria mbui dosa anu mangkeni tau i kamate anu baria mokasopoa,b agaiana kono i se etu, baria komi kutudu bona nipekakaeka. 17 Ope-ope babeia anu madaa, batena dosa. Agaiana ria dosa anu baria mangkeni kita i kamate.
18 Anu tainsani: ope-ope tau anu napoana ni Pue Ala, baria sira mobabei liliu dosa, lawi Ana ni Pue Ala mokampai sira, etumo mpane baria sira pensani napopangkia Datu nu Seta.
19 Anu tainsani: Naudapae sumalele dunia ei nakuasai Datu nu Seta, kita ei batena napoanamo kita ni Pue Ala.
20 Anu tainsani: dongkamo Ana ni Pue Ala i dunia, mpane Ia anu mokiraka kita pampekiri anu manoto, bona manginsani kita i Pue Ala anu mamonso. Nakeningka i Yesu Kerisitu AnaNa, mosintuwumo kita ai i Pue Ala. Iamo i Pue Ala anu mamonso. Lako si Ia tasumbamo katuwu malompe anu baria mokasopoa.
21 Komi anaku, inee komi menomba i anitu-anitu.