Sangangaa nipatimama rarami mantodisa kapari i rara peulami si Kerisitu
4
1 I Kerisitu mantodisa kapari tongona mani tuwu i dunia ei. Etumo mpane, komi mbui sangangaa nipakaroso rarami bona matimama komi mantodisa kapari ewa Ia. Lawi ima anu mantodisa kapari tongona mani tuwu i dunia, bariamo ia nakuasai nu kuasa dosa. 2 Mewali komi, i rara nu katuwumi i dunia ei, ina mangula komi peundea ni Pue Ala, baria peundea nu manusia. 3 Lawi naliuna, maisi gagamo tempo anu nipake mobabei ewa apa anu raunde rababei nu tau, anu baria manginsani i Pue Ala. Katuwumi ni tempo etu, mobabei komi babeia anu merikati mangula peundeami, malangu-langu komi, mosusa-susa liliu komi duduuna mobabei komi babeia anu madaa, ai menomba komi i anitu anu baria sintoto rapenombai. 4 Agaiana ei-ei, tau anu baria manginsani i Pue Ala tingkara sira, lawi bariamo nipeulai sinangka babeiara anu madaa, etumo mpane rakaisiira lolitamo komi. 5 Agaiana sambela tempo, tau aretu sangangaa mampombelioka i Pue Ala, mopadongka babeiara anu madaa etu. Lawi i Pue Ala ina mobotusi kara-kara nu ope-ope tau, malompe anu tuwu mani ba anu mamatemo. 6 Etumo mpane, i Kerisitu mopadongka Bambari Malompe i tau anu mamatemo. Bona naudapae wotora mamatemo nakenimpesuku ni Pue Ala i ope-ope tau, agaiana ei-ei tanuanara tuwumo duduuna i kasae-saeana sintoto ai peundea ni Pue Ala.Kapande anu nidoko nipopobundu i rara pombetulungimi
7 Poka-poka, gompimo tempona kasopoa dunia. Etumo mpane, sangangaa mampekiri lompe komi ai nirempeki peundea nu rarami anu madaa, bona pensani komi mekakae. 8 Anu melumbu lako i sinangkana etu, iamo sangangaa lako i rarami mpii mombepokaasi sadua ai sadua. Ane ewa etu babeiami, batena nibuku moampuni sala nu singka manusiami. 9 Ane ria toraremi, sangangaa nirora lompe sira, ai inee komi modeade.
10 Ope-ope kita, montani-ntani kapande anu tadokomo lako si Pue Ala. Mewali, sangangaa tapopobundu ai tapopolumako lompe kapande anu nakiraka kita ni Pue Ala etu, bona motulungi kita rangata. 11 Mewali, ima ngkida anu modoko kapande mopadongka Ngkora ni Pue Ala, sangangaa napadongka sintoto ai apa anu nadoko lako si Pue Ala. Ima ngkida anu modoko kapande motulungi rangana, sangangaa natulungi lako i karoso anu nadoko lako si Pue Ala. Sangangaa nibabei ewa etu, bona i sinangkana anu mewali, i Pue Ala ngkida anu rapopeawa mampoliungi i Yesu Kerisitu, lawi Ia anu makuasa ai anu sintoto rapopeawa duduuna i kasae-saeana! Amin.
Patudu i tau anu rapopesiasi nakenimpeulara si Kerisitu
12 Poka-poka anu kupokaasi! Inee nipotingkara kapari anu morumpa komi, lawi kapari etu paka mewalimo i rara nu katuwuta. Kapari etu pensani rapandiri ewa apu, lawi napake ni Pue Ala mampetandaka karoso nu pepotuumi. 13 Agaiana nipakatonoda rarami, lawi modokomo komi kirami i rara nu kapari anu morumpa i Kerisitu, bona ane dongkamo tempona i Kerisitu mopatongawa peawa nu katuwuNa i ope-ope tau, ina matono mpuu komi. 14 Morasi komi ane rakaisii lolita nakenimpeulami si Kerisitu, lawi Inosa Magali anu meawa anu lako si Pue Ala, meari liliu i rarami. 15 Agaiana, inee mpuu ria sadua i olomi anu mansumba kapari nakenimpepopatena, nakenimpanangkana, ba nakenimpobabeina anu madaa ba nakenimpampesuakina liliu urusia nu tau. 16 Mewali, ane rapopesiasi komi nakenimpepotuumi si Pue Yesu Kerisitu, inee nipokaea. Agaiana, niuli maisi kalompena si Pue Ala, lawi rauli komi topeula ni Kerisitu.
17 Dongkamo tempona, i Pue Ala ina mobotusi kara-kara nu ope-ope tau. Ai kita anu Napopewalimo tauNa, ilodo luwu Nabotusi kara-karata. Mewali ane kara-karata anu ilodo Nabotusi, manoto ina melumbu pesukuNa i tau anu baria sira mepotuu i Bambari Malompe anu lako si Ia. 18 I rara Sura Ngkora Magali teuki ewa ei:
“Mogaloda tau anu manoto babeiara,
mapari mani mansumba katesorema,
apa mani tau anu madaa,
anu baria mepotuu si Pue Ala!”
19 Etumo mpane, ane ria komi anu narumpa kapari nakenimpeundea ni Pue Ala, nipaninda katuwumi si Pue Ala anu mampopewali sinangkana, ai sangangaa nibabei liliu babeia anu malompe. Lawi batena ina Napabukei ope-ope dandiNa si kita.