Patudu i toposamboko
3
1 Komi towawine anu mosambokomo, sangangaa mengkoru komi i tomoanemi bona ane ria sira tomoanemi anu baria mepotuu i Ngkora ni Pue Ala, babeiami etu ina mobaliki rarara duduura mepotuu. Baria sira paraluu niulika ba apa-apa, 2 lawi ane mangita sira babeiami anu malompe ai pengkorumi si sira, etu anu ina mangkeni sira mepotuu si Pue Yesu. 3 Inee nipenoka perae anu wule i raoana ngkida, ewa mobunga-bungai wuluami ba mampoperae wotomi ai bulawa ai sampi anu masuli balukina. 4 Agaiana kamonsona peraemi, mensuwu lako i rarami, babeiami anu maalusu, ai rarami anu malene. Etumo perae anu baria ria katebalikina, ai mopakatono i Pue Ala. 5 Towawine anu napelisimo ni Pue Ala ni banimpia, ewa ei pampoperaera wotora, iamo mesarumaka sira si Pue Ala ai mengkoru sira i tomoanera. 6 Simbela ewa, i Sara mengkoru si Burahima tomoanena, ai i Burahima etu nauli tuana. Komi pensani rauli, ana ni Sara ane nipeulai babeiana anu malompe ai baria komi maeka i apa ngkida anu ina morumpa komi.7 Ewa etu mbui komi tomoane, sangangaa nibila towawinemi, ai sangangaa nipekiri adiwa dalami motulungi towawinemi, lawi karosora baria ewa karosomi. Komi tomoane ai towawinemi simbela ngkida komi i petotoki ni Pue Ala, lawi i Pue Ala mokiraka mbui towawinemi katuwu anu baria mokasopoa simbela ai komi. Mewali, sangangaa nibabei etu, bona ntena mosomboki pekakaemi.
Sangangaa malompe babeiata ai mosintuwu kita
8 Mewali, komi ope-ope sangangaa mosintuwu ai sampepekiri komi. Sangangaa mombepokaasi komi ewa topopoka. Ai sangangaa buke kamaasimi ai mengkaiwoi komi. 9 Ane ria tau anu mobabei kadaa si komi, inee nisurungi kadaana. Ai ane ria anu mokaisii lolita si komi, inee nisurungi ai pekaisii lolita mbui. Agaiana babeiara etu, sangangaa nisurungi ai pekakae bona nawati sira ni Pue Ala. Lawi etumo tunggaia ni Pue Ala mopelisi komi. Ane etu nibabei, mansumba mbui komi pewati lako si Ia. 10 Lawi i rara Sura Ngkora Magali teuki ewa ei:
“Ima anu mampokatono katuwuna,
ai naunde bona mangita katuwuna anu malompe,
sangangaa nakampai pololitana,
bona ntena ia mampololita anu madaa ai mepodongkoka.
11 Sangangaa nakaraosi babeiana anu madaa
ai mobabei apa anu malompe.
Sangangaa napari-pari mosintuwu ai rangana.
12 Lawi i Pue Ala mokampai ope-ope tau anu mangula peundeaNa, ai Napetingai pekakaera,
agaiana i Pue Ala moewa ope-ope tau anu madaa babeiara.” (Dulua Petoia 34:13-17)
Aginamo mantodisa kita kapari nakenimpobabeita anu malompe
13 Baria ria tau anu mobabei daa si komi, ane nibabei liliu babeia anu malompe. 14 Agaiana matono mpuu komi i pantodisami kapari nakenimpobabeimi anu malompe! Tau anu mopakaeka komi, inee sira nipokaeka ai inee karao rarami. 15 Agaiana, sangangaa nitoia i Kerisitu i rara nu katuwumi, ai nipangaku ka Iana ngkida Puemi. Sangangaa timama liliu komi mosonoi tau anu mekune si komi, kono i pesarumakami si Pue Ala. Ai ane nisonoi sira nipakaalusu pololitami ai niadai sira. 16 Ane ewa etu babeiami, tau anu mopakoi komi nakenimpobabeimi anu malompe, i rara mpeulami si Kerisitu, ina maea sira.
17 Aginamo mantodisa kita kapari nakenimpobabeita anu malompe, ane etu mangula peundea ni Pue Ala. Mpanena mantodisa kita kapari nakeni nu babeiata anu madaa. 18 I Yesu Kerisitu mbui mantodisa kapari, naudapae baria ria kamasalaNa. Sambela ngkida Ia mosusu wotoNa rapopate bona mosuru dosa nu manusia, bona mangkeni manusia lau si Pue Ala. Rapopate Ia, agaiana rapatuwu mpesola Ia ai kuasa nu Inosa Magali. 19 Ai nakeningkamakuasa nu Inosa Magali, laumo Ia mopadongka bambari lako si Pue Ala i tanuana nu tomatea sira anu rataha mani i petarunggua, 20 iamo tanuana nu tau anu mosapuaka i Pue Ala ni banimpia i tempona tuwu mani i Noho. I tempo etu, tongawamo kasabara ni Pue Ala, lawi mampegia Ia katebalikina rarara tongo ni Noho mobabei duanga mabose. Agaiana kasopoana, i pogero ni Pue Ala dunia ai ue, walu dua ngkida sira tau anu mesua i rara duanga mabose anu tesorema lako i kamate.
21 Ka Nasoremara lako i ue anu molaboa dunia, pensani rapopandiri ada periu i tau anu mepotuu si Pue Yesu ei-ei, lawi ada periu etu mopatongawa katesoremami, nakeningkatuwu mpesola ni Yesu Kerisitu. Ane tababei ada periu etu, baria wule mobakosi wotota, agaiana kamonsona anu ratunggai iamo pamperadeta si Pue Ala, bona mobakosi kita lako i dosa. 22 Ai awetu rapatuwu mpesolamo Ia, mengkaoremo Ia lau i suruga, mpane momeso mbai i kuana ni Pue Ala. Ope-ope malaeka, ope-ope anu makuasa, ai ope-ope anu meparenta, Napopengkoru asa ni Pue Ala si Yesu.