2
1 Mewali poka, nakeningkamansumbamimo katuwu anu mabou, sangangaa nipawia sinangka babeiami anu madaa, inee komi modongko, ai inee komi mengkalompe, inee komi masina, inee komi mopapakoi rangami. 2 Agaiana ewa sadua analeida komi anu lako toa anu mampenoka mesusu i tinana, komi mbui sangangaa mampenoka mangkadelo boku nu tanuanami, iamo Ngkora ni Pue Ala, bona kalalaua maroso ai kalalaua manoto rarami, duduuna katesoremami etu tongawa i tempo pesorema. 3 I rara Sura Ngkora Magali teuki ewa ei, “Niepekamo adiwa kalompena i Pue Ala si komi.”I Yesu rapandiri ewa watu peongkoa nu tombi
4 I Pue Yesu Kerisitu iamo puu nu katuwu. Ia ewa watu anu ratende nu tau, lawi raulira baria mobundu. Agaiana i petotoki ni Pue Ala, watu etuda anu mobundu mpii, ai i Pue Ala mopelisi watu etu mewali arii ntongo nu tombi. 5 Ai komi anu mewalimo tau ni Pue Ala, rakirakamo komi katuwu. Mewali, rapandiri komi ewa watu anu napake ni Pue Ala mowangu tombi penombaa, anu napobago nu Inosa Magali. Napopewali mbui komi ewa tadulako menomba anu magali, bona mosusu mbui komi popenombami si Pue Ala iamo katuwumi saduduami. Popenombami etu, batena napokatono ni Pue Ala nakenimpobago ni Yesu Kerisitu. 6 I rara Sura Ngkora Magali teuki ewa ei:
“Peita! Kupelisimo sambua watu anu mobundu mpii,
Kuboli i Bulu Sion,
Kupopewali watu peongkoa arii nu tombi.
Ima-ima anu mepotuu si Ia,
baria ia ina menonso.” (Yesaya 28:16)
7 Komi anu mepotuu si Ia, watu etu mobundu mpii si komi. Agaiana tau anu baria mepotuu si Ia, ina tepabukei apa anu teuki i rara Sura Ngkora Magali, anu manguli:
“Watu anu ratende nu topowangu tombi,
watu etuda anu mewali arii ntongo nu tombi.” (Dulua Petoia 118:22)
Ai
8 “Watu etu katesubeara,
anu mopakadungka sira.” (Yesaya 8:14-15)
Tesube sira, lawi baria sira mampotuu Ngkora ni Pue Ala. Etu mewali mangula apa anu napakanotokamo ni Pue Ala kono si sira.
9 Agaiana komi poka, napelisimo komi ni Pue Ala mewali tauNa. Napopewalimo komi ewa tadulako menomba, anu motongo-tongoi tau ai i Pue Ala Datuta. Napatanimo komi mewali tauNa anu magali. I Pue Ala mampelisi komi ai moronde komi lako i kadediana, mesua i rara nu kamabaaNa anu merae mpii bona nipadongka i ope-ope tau kono i babeiaNa anu malompe. 10 Ni banimpia, baria komi tauNa, agaiana ei-ei mewalimo komi tauNa. Ni banimpia, baria komi manginsani asiNa, agaiana ei-ei nidokomo asiNa.
Sangangaa malompe babeiata i rara nu dunia anu madaa ei
11 Poka-poka anu kupokaasi! I rara dunia ei, kita ewa torare ba topodaga. Etumo mpane kukiraka komi lolita: inee komi mangula peundea nu rarami anu madaa, lawi peundea nu rarami anu madaa etu moewa tunggaiami mengkoru si Pue Ala. 12 Lawi meari komi i olo nu tau anu baria manginsani i Pue Ala, etumo mpane sangangaa nipakalompe-lompe babeiami, bona ane rapana rasasalaira komi raulira tau madaa komi. Kasopoana, ina tongawa si sira kalompe nu babeiami, duduuna ina motoia sira i Pue Ala i eo kadongkaNa.
Sangangaa mengkoru kita i topoparenta
13 Mengkoru komi i ope-ope topoparenta i dunia, lawi ewa etumo peundea ni Pue Ala. Mengkoru komi i tadulako nu ope-ope topoparenta, lawi iamo topeparenta anu i wongko mpii kamakuasana. 14 Mengkoru komi i gubernur, lawi iamo anu rakiraka kuasa nu tadulako ope-ope topoparenta, mosuku tau anu madaa babeiara ai motoia tau anu malompe babeiara. 15 Sangangaa nibabei ewa etu, lawi etumo peundea ni Pue bona lako i kalompena babeiami, tau anu baria gaga matopa, bariamo sira mosasalai komi. 16 Kamonsona, komi tau anu mepotuu si Kerisitu, napawiamo komi ni Kerisitu lako i kuasa nu dosa. Agaiana ka Napawiami etu, inee nipopobundu mpesola mobabei dosa. Aginamo tuwu komi mewali batua ni Pue Ala anu wule mampeulai peundeaNa. 17 Niadai sira ope-ope tau, nipokaasi pokami sampepepotuumi, mengkoru komi si Pue Ala, ai nibila tadulako nu ope-ope topoparentami.
Pantodisa ni Yesu Kerisitu mewali pandiri
18 Komi anu batua katuwumi, nipengkorui ai nibila tuami. Ai baria wule mengkoru komi i tuami anu malompe ai anu maalusu babeiara, agaiana ane ria komi anu napobatua nu tuami anu maseke, sangangaa nipengkorui mbui sira. 19 Ane ria komi anu rapopesiasi nu tuami nauda baria ria salami, aginamo tetida komi mantodisa kapari etu nakeningka niinsaninamo peundea ni Pue Ala. Ane nibabei ewa etu, ina nawati komi ni Pue Ala. 20 Ba ina mansumba komi petoia lako si Pue Ala, ane tetida komi mantodisa pesuku nakeningkamasalami? Baria. Agaiana ane mansumba komi kapari nakenimpobabeimi anu malompe, ai tetida komi mantodisa kapari etu, batena napokatono komi ni Pue Ala. 21 Etumo puuna mpane narondemo komi ni Pue Ala, bona malompe babeiami naudapae komi rapopesiasi. Lawi i Kerisitu mantodisa kapari nakeningkamadosami, ai mewalimo Ia pandiri si komi bona nipeulai.
22 Baria Ia sambela mobabei dosa ba modongko.*
23 Nauda Ia rapakoi, baria Nasurungi ai pepakoi. Nauda Ia rapopesiasi, baria Ia meewa. Mopaninda ngkida Ia katuwuNa si Pue Ala, anu mobotusi kara-kara i kanoto-notoana. 24 I Yesu mosompo dosata ai wotoNa saduduaNa i karapopateNa i kau anu rapopombesape bona tepawia kita lako i kamakuasa nu dosa ai tuwu kita mangula peundea ni Pue Ala. Ai belaNa aretu, anu mopakaosa komi. 25 Ni banimpia komi ewa dimba anu mapusa. Agaiana ei-ei mesolamo komi mangula sadua Toporewu anu mokadipuraka komi.