Sura ni Suro
Peturu
anu mpolinguruna
1
1 Sura ei lako si aku, i Peturu, suro ni Yesu Kerisitu. Sura ei kupakatuka komi pokaku anu tongomi modaga, i propinsi Pontus, Galatia, Kapadokia, Asia ai Bitinia. 2 Napelisi komi ni Pue Ala Tuamata, lawi ewa etumo tunggaiaNa lako i mpolinguruna. Ai nakenimpobago nu Inosa Magali, Napopewalimo komi tauNa saduduaNa anu magali. Etumo mpane, mengkoru komi si Kerisitu ai Napakagalimo komi ai raaNa.Kuperade si Pue Ala bona Nakiraka komi maisi pewati ai kalompe nu katuwu.
Tatoia i Pue Ala lawi Nakiraka kita pesarumaka anu maroso
3 Tetoiamo i Pue Ala, Tuama nu Pueta i Yesu Kerisitu! Nakeningkabose nu asiNa si kita, Nakirakamo kita katuwu anu mabou, ai katuwu anu mabou etu tasumba lako i katuwu mpesola ni Yesu Kerisitu. Etumo anu mopakaroso pesarumakata. 4 Tasarumaka kaina mansumbata sosora. Sosora etu, iamo pewati anu napatimamamo ni Pue Ala i suruga, anu baria pensani marugi ba mewali madaa ba tebaliki. 5 Ai nakenimpepotuumi, nakampai komi ni Pue Ala ai kuasaNa lako i ope-ope anu madaa, duduuna mansumba komi katesorema anu ina Napatongawa i kasopoa dunia.
6 Etumo mpane sangangaa nipokatono liliu katuwumi, naudapae ei-ei mapari rarami lawi ria maisi mpangkana kapari anu morumpa komi, agaiana baria komi narumpa liliu nu kapari etu. 7 Narumpa komi nu kapari etu, bona mopatongawa ba maroso mpuu pepotuumi ba baria. Ane bulawa anu baria mantaha duduuna i kasae-saeana, sangangaa ratunu i rara apu bona tongawa tainsani ba bulawa ba baria. Agaiana pepotuumi melumbu kamasulina mpane lako i bulawa etu, etumo mpane sangangaa raparesa. Pepotuumi raparesa i tempomi narumpa nu kapari, ane maroso mpuu pepotuumi, komi ina ratoia, rabila ai rapakabose i kadongkaNa mpesola i Yesu Kerisitu i dunia. 8 Naudapae baria mani niita i Yesu Kerisitu, agaiana nipokaasi Ia. Ewa etu mbui ei-ei, baria mani niita i Yesu Kerisitu, agaiana nipotuumo. Etumo mpane matono rarami, ai kamatonomi etu melumbu lako i apa anu pensani rapololita. 9 Katonomode komi, lawi nisumbamo wua nu pepotuumi, iamo tanuanami anu tesoremamo.
10 Katesoremami etumo, anu rapepekiri nu nabi-nabi ni banimpia mpane raparesara apa lempona, ai rapadongkaramo si komi adiwa i Pue Ala ina mopatongawa asiNa si komi. 11 Agaiana nabi-nabi aretu, baria rainsanira adiwa pewalina ope-ope etu. Etumo mpane raparesara mpii, lawi rapenokara manginsani kaimpiana dongka ai adiwa pewalina, apa anu napadongkaka sira nu Inosa Magali i rarara, kono i karuminsina kapari anu sangangaa morumpa i Kerisitu, ai adiwa peawa nu katuwuNa ane liumo kapari etu. 12 Ai i Pue Ala mampopainsanika nabi-nabi ni banimpia, bambari anu rapadongkara etu baria i wotora saduduara, agaiana anu natunggai ni Pue Ala komida. Ai ei-ei apa anu rapadongka nu nabi-nabi ni banimpia, etu mbui anu niepe ai manotomo i pekirimi, lawi riamo sira tau ntanina anu mopadongkaka komi Bambari Malompe etu, ai kuasa nu Inosa Magali anu lako si Pue Ala. Mogaloda malaeka, rapenokara mbui manginsani kono i Bambari Malompe anu rapadongkaka komi etu.
Sangangaa magali katuwuta
13 Etumo mpane poka, nipatimama liliu rarami, nirempeki peundea nu rarami anu madaa, ai nipakaroso pesarumakami i kabula raraNa anu ina rakiraka komi i kadongka mpesola ni Yesu Kerisitu. 14 Nakeningka napoanamo komi ni Pue Ala, etumo mpane sangangaa matundu komi si Ia. Inee komi mangula peundeami saduduami ewa ni banimpia, i tempomi baria mani manginsani i Pue Ala. 15 Sangangaa magali komi i sinangka babeiami, simbela ewa i Pue Ala anu magali katuwuNa, anu morondemo komi. 16 Lawi ria teuki i rara nu Sura Ngkora Magali, ewa ei, “Sangangaa magali katuwumi, lawi magali Aku.”
17 Poka-poka, i Pue Ala anu niuli Tuamami i tempomi mekakae, Iamo anu mobotusi kara-kara nu ope-ope tau mangula babeiara, ai baria Ia mampopontani tau. Mewali, sangangaa mengkoru komi si Pue Ala, tongomi mani meari i dunia ei. 18 Lawi niinsanimo adiwa ka Nasoremamimo ni Pue Ala. Napawiamo komi lako i katuwumi anu baria mobundu. Katuwumi etu, iamo sosorami anu lako i ulububumi. Ka Nasoremami etu, baria rabaiari ai anu-anu, anu pensani maropu ewa bulawa ba salaka, 19 agaiana rabaiarida ai pobaiari anu melumbu kamasulina, iamo raa ni Kerisitu. I Kerisitu etu, ewa sambaa ana dimba anu rapopenomba, anu baria ria sakina ba kamakurana. 20 Lako baria mani dunia ei rateru, i Yesumo anu napakanoto ni Pue Ala mewali Topesorema. Ei-ei i tempo kasopoa dunia, dongkamo Ia bona tesorema komi. 21 Mampoliungi Iamo, mpane mepotuu komi si Pue Ala. I Pue Ala mopatuwu mpesola Ia lako i kamate, ai mokiraka katuwu meawa si Ia, duduuna mepotuu komi ai mesarumaka komi si Pue Ala.
22 Ei-ei, mampeulaimo komi patudu anu mamonso lako si Pue Ala, etumo mpane magali katuwumi duduuna mampokaasi komi pokami sampepepotuumi i kamonso-monsona. Etumo mpane kukiraka komi lolita bona mombepokaasi komi sadua ai sadua lako i rarami mpii. 23 Etumo anu sangangaa nibabei, lawi komi anu modokomo katuwu anu mabou. Katuwu anu mabou etu, baria nidoko lako i manusia anu pensani mamate, agaiana nidoko nakenimpepotuumi i Ngkora ni Pue, ai NgkoraNa etu meari liliu i rarami duduuna i kasae-saeana. 24 Ria teuki i rara nu Sura Ngkora Magali anu manguli:
“Katuwu nu manusia ewa owo,
perae nu manusia ewa bunga owo.
Owo batena mewali malele,
ai bungana ina maundu,
25 agaiana Ngkora ni Pue Ala batena ria duduuna i kasae-saeana.” (Yesaya 40:6-8)
Ngkora ni Pue Ala etu, iamo Bambari Malompe anu rapadongkakamo komi.