Patudu i tadulako-tadulako jumaa ai i tau wori
5
1 Ria mbui pamperadeku si komi, anu mewali tadulako-tadulako jumaa. Kuukika komi ei, lawi aku mbui motadulakoi tau anu mepotuu si Kerisitu, ai kusabikimo kapari anu morumpa i Kerisitu ni banimpia. Ai ane dongka i Kerisitu i rara peawa nu katuwuNa anu ina rapatongawa i ope-ope tau, ina mansumba mbui aku peawa, i rara peawa nu katuwuNa etu. 2 Kuperade bona nikadipuraka lompe pokami sampepepotuumi si Pue Ala, anu ria i olomi. Lawi sira etu ewa dimba, anu napotuuka komi ni Pue Ala bona niporewu sira. Niporewu sira lako i kabula nu rarami, mangula peundea ni Pue Ala; inee nipobago etu ai kamantimi nu rarami. Nitulungi sira lako i kabula nu rarami, inee komi wule mangkadelo rasimi. 3 Inee komi mamposawaaka tau anu rapotuuka komi, ewa posawaa nu sadua topoparenta mamposawaaka tauna. Aginamo mewali komi pandiri si sira 4 bona ane dongka Toporewuta anu mabose peawaNa, ina Nakiraka komi sambua songko datu anu mengkila-ngkila liliu duduuna i kasae-saeana.5 Ewa etu mbui komi anu mangura mani, sangangaa mengkoru komi i tomana, ai ope-ope komi sangangaa mengkaiwoi ai mombetulungi. Lawi i rara Sura Ngkora Magali teuki ewa ei:
“I Pue Ala mokasisi tau anu mampemabose,
agaiana mampokaasi tau anu mengkaiwoi.” (Pepatudu ni Salomo 3:34)
6 Etumo mpane poka, mengkaiwoimo komi, ai mengkoru komi si Pue Ala anu makuasa, bona Napaiwongko katuwumi ane dongka tempona. 7 Nipaninda si Ia ope-ope kapari nu rarami, lawi Ia anu mokadipuraka komi.
8 Sangangaa matimama komi ai mainga-inga komi, lawi Datu nu Seta anu mewali iwalimi, ewa sambaa singa anu mongao-ngao molulumako liliu, mangkadelo pangkonina. 9 Sangangaa niewa mpuu Datu nu Seta etu lako i pepotuumi anu maroso. Lawi niinsani, pokami sampepepotuumi i sumalele dunia, mantodisa mbui sira kapari ewa anu nitodisa. 10 Ai ane liumo kapari anu sampalai etu, i Pue Ala ina mopasondoi kamakurami. Lempona, ina mopakaroso pepotuumi, mopakanoto katuwumi ai mopatetida rarami. Lawi i Pue Ala iamo puu nu ope-ope asi, anu moronde komi mewali anaNa mampoliungi i Kerisitu, bona mansumba komi kirami i rara kabose nu peawaNa, anu baria mokasopoa. 11 Tetoiamo i Pue Ala, lawi Ia anu makuasa duduuna i kasae-saeana. Amin!
Kasopoa nu sura
12 Isi nu suraku anu marede ei, i Silwanusa anu mampoukika aku, iamo pokata sampepepotuuta si Pue Yesu, ai kuinsani tetida liliu ia i rara nu pepotuuna. I rara nu suraku ei, kupadongkakamo komi i kanoto-notoana adiwa asi ni Pue Ala si kita, bona maroso rarami. Sangangaa tetida liliu komi i rara kamaasiNa etu.
13 Tabea lako i pokami sampepepotuumi anu ria i se ei, i kota Babelib anu napelisi mbui sira ni Pue Ala ewa komi. Anaku i Markus, mopakatu mbui ia tabeana. 14 Mombetabe-tabe komi sadua ai sadua lako i kabose nu asimi i pokami sampepepotuumi.
Kuperade si Pue Ala bona ope-ope komi Nakiraka kalompe nu katuwu nakenimposintuwumi ai i Kerisitu.