Tau anu mepotuu si Kerisitu rapatudu bona babeiara sintoto ai patudu anu mamonso
2
1 Agaiana iko Titu, sangangaa mepatudu iko ai patudu anu mamonso iamo: 2 Ane tomana tomoane anu matuamo sira, sangangaa nupatudu sira bona matopa sira, bona babeiara ewa tomana anu sintoto rabila, ai bona rainsanira morempeki peundea nu rarara anu madaa. Pepotuura si Pue Yesu sangangaa maroso mpuu. Sangangaa maasi sira i rangara lako i rarara, ai sangangaa tetida sira i rara nu kaparira.3 Awetu mbui sira totomana towawine anu matuamo, nupatudu sira bona babeiara sintoto ai tau anu mengkoru si Pue Ala. Inee sira mokaisii lolita rangara, pampekirira inee wule i panginu anu melangui. Sangangaa mopatudu liliu sira rangara bona malompe babeiara. 4 Ane ewa etu babeiara, totomana towawine anu matua aretu pensanimo sira mopatudu towawine anu mangura mani, bona rainsanira mampokakaia tomoanera ai anara, 5 tuwu sira i rara kamatopa, ai magali sira, manoto pangkeniakara i lio ni Pue Ala, mokadipuraka lompe sira anara ai tombira, malompe rarara ai mengkoru sira i tomoanera. Ane ewa etu pangkeniakara, baria ria tau anu ina mopakoi Ngkora ni Pue Ala.
6 Awetu mbui sira tomoane anu mangura mani, nupatudu sira bona mewali sira matopa. 7 Mpane iko, sangangaa mewali iko pandiri i ope-ope anu nubabei. Ane mepatudu iko, sangangaa mepatudu iko i kalompe-lompena ai lako i raramu mpuu. 8 Sangangaa matopa pololitamu, bona baria pensani nasasalai nu tau, ai ope-ope iwalimu mewali maea sira, lawi baria ria kamasala anu rasumbara lako si kita anu pensani rasalaikara kita.
9 Ane tau anu batua katuwura, nupatudu sira bona mengkoru sira i tuara i pangka-pangkana, ai mobabei liliu sira peundea nu tuara. Inee sira mebesoi, 10 ai inee sira mopanangka anu-anu nu tuara. Sangangaa rapakalompe-lompera liliu babeiara, bona mewali sira tau anu pensani rapotuu nu tuara. Lawi ane ewa etu babeiara, ope-ope tau ina motoia patuduta anu manguli ka i Pue Alana anu mosorema kita lako i suku dosata.
Nakeningkabula rara ni Pue Ala tesore kita lako i suku dosata
11 Titu, sangangaa nupatudu sira i babeia anu sintoto, lawi i Pue Ala mobungkasimo dala i ope-ope tau, bona tesoremo kita lako i suku dosata. Etu Nababei lako i kabula nu raraNa. 12 Nakeningkabula nu raraNa, Napatudu kita bona mopawia kita babeiata anu mangula ngkida peundea nu rarata anu madaa, ai anu baria sintoto ai peundeaNa. Napatudu kita bona tapakanoto rarata, tapakalompe babeiata ai mengkoru kita si Ia tongota mani tuwu i dunia ei. 13 Lawi ei-ei, tapegia mani tempo anu malompe mpii anu mewali pesarumakaata. I tempo etu, ope-ope tau ina mangita kuasa ni Pue Ala anu mabose katuwuNa ai Datu Topesoremata, iamo i Yesu Kerisitu. 14 I Yesu etu anu mosusu wotoNa rapopate mosuru dosata. Napawia kita lako i ope-ope babeiata anu madaa. Napopewalimo kita tauNa saduduaNa, ai anu madota mobabei apa anu malompe.
15 Mewali Titu, ope-ope ei sangangaa nupatuduka sira. Nupakaroso rarara ai nukambaroka sira. Inee iko maeka, lawi rakirakamo iko kuasa mopaguru sira, bona ntena ria tau anu mopakoi iko.