Sura ni Suro Paulu anu napakatu si
Titu
1
1 Sura ei lako si aku i Paulu, batua ni Pue Ala ai suro ni Yesu Kerisitu. I Pue Ala motudu aku mopakaroso pepotuu nu tau anu Napelisi, ai mopaguruka sira patudu anu mamonso, anu tapeulaimo. 2 Patudu etu, mangula pesarumakata kaina mansumbata katuwu malompe anu baria mokasopoa ewa anu Nadandikamo kita. Lawi lako baria mani dunia ei Nateru, Nadandikamo kita kaina mansumbata katuwu anu malompe. I Pue Ala baria modongko. 3 Mewali, i tempo anu Napakanoto, Napopainsanika mpuumo kita dala mansumba katuwu anu malompe, lawi Natudu kami mopadongka NgkoraNa. Ai aku eimo sadua anu mopadongka NgkoraNa etu, mangula parenta ni Pue Ala, anu mosorema kita lako i suku dosata.4 Sura ei kupakatu si iko Titu, anu kupoana, lawi sampepepotuu kita. Mekakae aku si Pue Ala Tuamata ai si Yesu Kerisitu Datu Topesoremata, bona Nawati iko ai Nakiraka iko kalompe ngkatuwu.
Patudu kono i tadulako nu topepotuu si Pue Ala
5 Kupalengimo iko i Kreta, bona iko anu mourusi pobagota anu baria mani roo, awetu mbui ewa anu roomo kuparentaika iko, sangangaa nupelisi mpane nuongko tau i boea-boeana, anu pensani motadulakoi topepotuu si Kerisitu i se etu. 6 Ai tau anu raongko mewali tadulako nu topepotuu si Pue Ala, sangangaa tau anu baria tesumba babeiana anu baria malompe, anu sadua ngkida towawinena. Awetu mbui anana sangangaa mepotuu mbui si Kerisitu ai baria sira anu mangkasara ai anu matundu i tomanana. 7 Tau anu motadulakoi topepotuu si Kerisitu, sangangaa mokadipuraka sira bago ni Pue Ala. Etumo mpane, sangangaa nuongko tau anu baria ria kamasalana, anu baria mampemabose ba anu paka marumpu, anu baria malangu-langu ba anu mobungka-bungka liliu ba anu wule mangkadelo doi. 8 Agaiana, tau anu manginsani modoko torare, malompe liliu babeiana, nabuku morempeki peundeana anu madaa, manoto rarana, magali katuwuna ai sangangaa matopa ia. 9 Sangangaa maroso pampotuuna patudu anu mamonso, ewa anu roomo tadoko, bona nainsani adiwa dalana mopaguru tau i patudu anu mamonso etu ai mopakaroso rarara, ai baria mbui ia maeka mopatongawa kamasala nu tau anu moewa patuduta.
Nukambarokamo sira tau anu mangkeni patudu anu masala
10 Tunggaiaku mopatudu iko ewa etu, lawi mawori sira tau anu moewa patuduta, pelumbunamo sira anu mampeulai patudu agama Yahudi.a Modongko sira ai mopakanawu sira rangara ai patudu anu baria mobundu. 11 Tau aretu sangangaa raombo, inee sira nupaliu mepatudu! Lawi basangkia ntombi tau rapakawuli nakenimpepatudura anu baria sintoto. Ai tunggaiara mepatudu, bona mansumba ngkida sira doi. Baria malompe babeiara anu ewa etu. 12 Banimpia ria sadua guru anu lako i Kreta anu manguli ewa ei, “ToKreta modongko liliu sira, ewa binata anu maseke sira, mesioro sira ai malose sira mobago.” 13 Monso mpuu anu niuli ni guru etu! Etumo mpane, sangangaa nukambaroka mpii sira, bona mepotuu liliu sira i patudu anu mamonso. 14 Nuombo sira bona inee rapotuura lolita mpaturu nu toYahudi, ai inee wule mangula atura-atura anu nababei nu tau anu mosapuaka patudu anu mamonso. 15 Tau anu manoto i petotoki ni Pue Ala, baria ria anu madaa i rarara ai i pampekirira. Agaiana tau anu madaa ai anu baria mepotuu si Pue Ala, baria ria kalompe si sira. Lawi bariamo ria anu malompe anu lako i rarara mpii. 16 Raulira, rainsanira i Pue Ala, agaiana modongko ngkida sira, lawi babeiara baria mampeulai apa anu raulira. Madaa mpuu babeiara. Baria sira pensani mampeulai parenta ni Pue Ala, ai baria rabukura mobabei apa anu malompe.